Read Hano 2 Korin 2 Bible Online

2 Korin 2 - Hano bible

2 Korin 2

¹Pol mwa bevea kunia be, nan binihi tuhi be lol noḡu lagoana vwate vai abemiu sihav vora te taro vwate be vi lol kimiu giv ron̄ mwahantai.

²Be nav lolia giv ron̄ mwahantai, ihei vi loliau nav ron̄ mwandavuha? Kimiu n̄an be giv lol dumwiau be nav ron̄ mwandavuha liuhage atatu be nan lolia mwa ron̄ mwahantai.

³Bwatuna higea nam rav ravrava uhu lalai kimiu. Taro be nai mai vai abemiu nasav ron̄ te mwahantai ginira be mwa du be rav loliau nav samsamwara. Nam ron̄ batoia huri kimiu duluai, be kimiu mulei giv togo mai noḡu samsamwara.

⁴Batena be nan rav ravrava lalai kimiu amua, nan habwe taro ririhai, i loloku nu hav ron̄ te mwandavuha, i nan ravae lol matarua ivusi. Nan hav ravae tehe be vi lol kimiu giv ron̄ mwahantai, take be vi lol kimiu giv iloe be nan dabe maragai kimiu.

⁵Be tuamiu vwate aia alolomiu nu lol vain ron̄ mwahantai, mwa hav vora te lalaiau, take lalai kimiu duluai. Nam bevea gin binihiva be kea mwa dau bwatun ron̄mwahantai lalai atatu duluai la hala vwate. (Nam hav doron tehe be nav lolia ron̄oanana be nu hantai liu nin mwasin halana)

⁶Vevegi be vi ivusi alolomiu ran hagainia lalainia nu dadariha huria.

⁷Take kadogaha mwa du be giv hagavia i giv av maḡomaḡoe i giv haḡo ḡoḡoe be si hav ron̄ te mwahantai liu ba bisdagai.

⁸Haḡe nam hudali kimiu be giv seserainia be gim dabea.

⁹Nan rav ravrava lalai kimiu be nav haḡo ron̄ kimiu ba ḡitae be giv ron̄ maḡemu lol ginau duluai.

¹⁰Be giv binihi kaburai vuron ihei dolua, inau mulei nam binihi kaburai vurona. Havanau be nan binihi kaburainia i havanau tehe be nai binihi kaburainia la ihamiu, kunia be Kraes kea maiau.

¹¹Nam lolia kunia be Setan sihav surai te dum havanau vwate nin kamai, bwatun be gam ilo tavuhai taritari non Setan duluai.

¹²Batena be nan mai vai Troas be nav toretore alun Leo Tavuha huri Kraes, Ratahigi nu lai taro tavuha vwat lalaiau aia.

¹³Take nan hav togo te lol tamwata, huri be nam habwe tuaku Taetus. Nan vev avoan vitulei lalainira aia Troas i nam ban vai Masedonia.

¹⁴Take avkari lalai God, kea tagaro mwa domuai gida vai lol tanoi sivi Kraes. God mwa haḡo kamai be gav lon̄ahi ute gin non iloute vataha ute kun bonin ruḡuruḡu bonboni.

¹⁵Kamai gan bonboni tavuha huri Kraes alolora kera be ran lai rahuana ninira be ram sala.

¹⁶Lalainira be ran sala huba, kamai kun be atatun mateana, be gam mai mai mateana, take lalainira be ran lai rahuana huba, kamai kun be halan rahuana be gam lai rahuana. Matu ihei be vi lol dum rovoga uhu?

¹⁷Gam hav salei te avoana non God huri be gav lai homu aluna kun sinombu ivusi ram lolia huba. Take alun Kraes gam bev mwasigi lolmatan God, kun be kamai ira vwalaua huri non avoana.