Read Hano Kelesia 1 Bible Online

Kelesia 1 - Hano bible

Kelesia 1

¹Nin Pol, be nu uloinia be vi vora hala nu hav gita te luau be nai vora hala la hala non atatu, sage atatu ram hav horau tehe. Inau nam bora hala sivi Jisas Kraes i God Tata be nu tomarei Jisas nin mateana.

²Ravrava geki nin kera duluai ata lol imwan God be ram dogo maiau.

³Hogoi i tamwata lalai kimiu nin God tamanda i Ratahigi Jisas Kraes.

⁴Jisas mwa laia sibona huri vuroda be men lai lua gida nin ureure vuroga geki be tam dogo alolona, kunia be God tamanda nu lol vatuvwainia.

⁵Sarisari gea non God vai tuai i tuai. Amen.

⁶God, gin non hogoi sivi Kraes, mwa uloinigo be gov mai gi non atatu. I inau nam dan̄an̄a be gom ban burigai vilehi i gom binihimwasigi ginau dolua nin Roroi Tavuha.

⁷Mwasigi, Roroi Tavuha mulei vwate sigai. Take atatu rituai ram lolia gim bilen̄alen̄a; ram doronbe ramen leahi Roroi Tavuha non Kraes.

⁸Gam doretore lalai kimiu huri Roroi Tavuha. Be kamai sibomai, sage enjel nin amare, si toretore lalainigo huri ginau dolua, si harana be kamai gam bahala!

⁹Nan vev ginau geki amua, i kadogaha nam bevea mulei: Kimiu gin lai Roroi Tavuha huba vai alolomiu. Be atatu vwate mwa doretore huri ginau dolua lalai kimiu, kea vi harana be mwa bahala!

¹⁰Gim binibe nam lol ron̄oe be namen lol atatu ba ramen ron̄ hano be nam bevea? Sigai, God haḡe gaituvwa be nam lol ron̄oe be namen lol samsamwarainia. Nam lol ron̄oe be namen lol samsamwarai atatu? Be nam doron radu be namen lol samsamwarai atatu, nasav vora te atatun rovoga non Kraes.

¹¹Ira tuaku, nam doron be giv iloe be Roroi Tavuha ba nam doretore huria lalai kimiu vorate atatu vuroi ram lolia.

¹²Nam hav laia tehe nin atatu vuroi, sage atatu vwate mwa hav vagahiau tehe ginia, take Jisas Kraes nu vagahiau ginia.

¹³Gin ron̄oe huri rahuku tuai lol binihimwasigi lol vara ira Jius. Nan tuḡorogoro sine hagavi imwa tataro non God i nan lol ron̄oe be namen lol kaburainia.

¹⁴Nam mai gi tomuai lol binihimwasigi lol varan ira Jius, nam lol tavuha liu varan ira Jius ivusi be taulumai dadariha. Nam lol ron̄oe liu ihei tehe be namen huri silo vagahi be nu laiana mwa himai nin ira sibida.

¹⁵Take God nu lol vatuvwai rau matan taritari huriau i mwa dau dagaiau huri non rovoga amua vuvuri nam siv vora. Nu uloiau sivi non hogoi,

¹⁶i mwa bagahiau gin nituna bwatuna be nai vev Roroi Tavuha huria lalai ira Lolobon̄i. Lol taro be God mwa uloiau, nan hav lai te avoan dura sage buluiana nin atatu vwate.

¹⁷Nam hav vano tehe vai Jerusalem be namen gitara be ram bora hala amua niniau. Take, nam hav hohovi tehe, nam bano dagai vai Arabia i ataguna nam bano mulei vai Damaskas.

¹⁸Atagun taul gaitolu nan van vai Jerusalem nan habwe Pita i nan togo maia huri gubwen̄ han̄vul domwan gailima.

¹⁹Nan hav habwe te ira hala dodolua, hava Semes n̄ano be tuan Ratahigi.

²⁰God mwa iloe be Ginau Kera geki be nan ravae mwa hav vora te tenteneana.

²¹Ataguna nan vano vai lol ara Siria i Silisia.

²²Lol ute Judia ira binihimwasigi lol Kraes ran hav gitau tehe.

²³Ran ron̄oe n̄ano be mwa bevea be, “Atatu geki be mwa enḡorogoro gida kadogaha mwa doretore huri binihimwasigi garagusi be lol taro vwate nu lol ron̄oe be men lol kaburainia.”

²⁴I atat binihimwasigi ran avkari God bwatuna inau.