Read Hano Ifisas 3 Bible Online

Ifisas 3 - Hano bible

Ifisas 3

¹Huri ginau geki, inau Pol atat vauvauhi huri Kraes Jisas huri kimiu ira Lolobon̄i, nam dataro lalai God.

²Mwasigi gin ron̄oe be God nu lai rovoga geki lalaiau sivi non hogoi be vi bului kimiu.

³Nu mahin̄aiau be nav ilo non taritari dahuligi ginia be mwa bagahiau ginia. Nan ravae tiri kolo huba hurira geki.

⁴Be goi vasogo havanau haḡea be nan ravae, gov gita dumwia be, inau nan ilo dum ginau dahuligi huri Kraes.

⁵Sinombu be ran togo lol taro dolua nu hav vev te ginau dahuligi gea lalainira. Take kadogaha, sivi Vui, God nu seserai ginau dahuligi gea lalai non ira hala sabuga mai ira atatun vevsera.

⁶Geki haḡea ginau dahuligi gea: be sivi Roroi Tavuha, ira Lolobon̄i rav bulu mai ira Jius lol vatavuha non God. Kera bilan rebehi n̄an gea, i ram bulbulu utegaituvwa lol tatauleo be God mwa lolia lol Kraes Jisas.

⁷Gin mwasin hogoi non God be mwa laia lalaiau sivi nin muramura, inau nam mai gi atatun rovoga be namen vev lua Roroi Tavuha gea.

⁸Inau nam hav vora te lavoa take tiri savele alolon ira sinombu non God, take God nu lai hogoi geki lalaiau be nai vev luae hurira Lolobon̄i, Roroi Tavuha huri roson Kraes.

⁹I God nu laia lalaiau rovoga be nav vevea lalai non sinombu, huri non taritariana be mwa du dahuligi, be mwa dahulinira ginia la bwatun tauva. Kea haḡea atatu be nu tau ginau duluai.

¹⁰Taritari non God be sivi uloilua ira vwalaua duluai mai ira muramura duluai lol ureure kadogaha rav ilo mataisao non God, gabe mavuvuna ivusi maragai.

¹¹Geki mwa dame haragaituvwa mai bwatutun binbinihi be God nu togo maia la bwativun ureure, i kea mwa lol haraharai non binbinihi sivi Kraes Jisas Ratahigi gida.

¹²Lol Kraes tam mai la lolmatan God mai binihiv rahurahu i mai mataguana sigai. Tav lol dumwia geki sivi binihimwasigi lol Kraes Jisas.

¹³Haḡe nam hudali kimiu be gisav vinihi te gairuruai bwatuna ron̄ ḡagarasi mwa dumwiau huri kimiu. Noḡu ron̄ ḡagarasi huri nomiu sarisari.

¹⁴Haḡe inau nam dai bwatuku lol tataro la lolmatan Tata,

¹⁵gabe ninia haḡea vara duluai lol ute atamare i lol ureure ram lai mwasin ihara.

¹⁶Nam hudali Tata lol sarisarina gaivua be vi lai muramura lalainigo be gov muramura lol lolomwa sivi non Vui.

¹⁷Nam dataro be Kraes vi togo lol sibwen̄imwa gin binihimwasigi garagusi i be rahumwa vi tu wasigi lol lolotabetabe i be vi haḡoe alun tabeana.

¹⁸I nam dataro be giḡo mai ira sinombu sabuga non God duluai, rav lai muramura huri iloilo alun lolotabetabe gaivua non Kraes be gaivua kunhanigi i n̄ava kunhanigi i nu holomare kunhanigi i nu roro kun hanigi huri lolotabetabe gea.

¹⁹Lolotabetabe non Kraes gaivua liu ninia be ihei tehe mwa iloe, take nam dataro be giḡo gov ilo dum huri lolotabetabe gea, i giv masiri gin alen̄an God.

²⁰Gin muramura non God be mwa lol rovoga bul mai gida, God vi lol dum gaivua liu nin havanau tehe be gida tam hudalinia sage tam binihia.

²¹Lalainira roroai lol uloilua i lol Kraes Jisas huri vataha mahavana, vai tuai vai tuai. Amen.