Read Hano Ifisas 5 Bible Online

Ifisas 5 - Hano bible

Ifisas 5

¹Kimiu ira nitun God gabe mwa dabe kimiu, i giv lol ron̄oe be giv vora kunia.

²Gov togo lol rahuana lolotabetabe kunia gabe Kraes nu tabe gida i nu lin̄ia sibona huri gida kun gabe hogoi bonboni i tataroi lalai God.

³Take vahalana mai vavine i mai atamwani vi sigai alolomiu, sage lalan̄an ginau hahantai sa bugurana. Ginau kera gea ran hav tavuha tehe mai sinombu sabuga non God.

⁴I mulei avoanan bwatigoro vi sigai mai kimiu, i gisav av te daltale, i gisav vev te sov hahantai ginau kera geki ran hav vavtutu tehe mai kimiu. Take ninia gea mwa du be giv lai avkariana lalai God.

⁵Giv ilo dumwia be atatu be mwa lol bwatigoro mai vavine sa atamwani sage mwa lol ginau hahantai, i bugurana (huribe bugurana kea dovon̄an gogonaiana lalai tagaro dodolua). Kea sihav togo te dumwi lol Ute Lavoa non Kraes i non God.

⁶Gosav mahin̄a tehe be atatu vi saruruhigo ginia be men vev ginau lalainigo be ram hav vora te mwasigi, bwatuna be ginau kerageki vi lai lolhoro non God vai alura be ram hav tabe te silona.

⁷Kimiu gisav bulbulu te n̄an haḡea mai atatu be kunia.

⁸Tuai huba kimiu gin togo; lol ute meto, take kadogaha kimiu gim dogo lol ute rani lol Ratahigi. Haḡe giv togo kun ira nitun ute rani.

⁹Gigita mwa lai mwasin lalan̄an tavuha duluai, i togoan vavtutu i mwasigi.

¹⁰Giv lol ron̄oe be giv huhui havanau be Ratahigi mwa doronia.

¹¹Gisav lol te havanau gabe mwa lalaḡoiana lol ute meto, be nu hav tavuha tehe huri havanau tehe. Take mwa seserainia be kera ran vahala.

¹²Vain busbusiana haḡea huria be men veveana huri sinombu kera gea be ran lolia dahuligi.

¹³Take gigita mwa lol ginau duluai mwa maron̄ron̄o be men gitana,

¹⁴i ginau duluai be mwa loliana mwa maron̄ron̄o vi mai dumwi gi gigita. Geki haḡea huri havanau mwa bevea be: “Mamata nin maturuva! Tomare nin mateana, i Kraes vi gigita alumwa.”

¹⁵Haḡe kimiu giv gitaḡoro maragai. Gisav togo tehe kun ira bwaḡele, take giv togo kun mataisao.

¹⁶Lalaḡoi taromwa duluai huri lalaḡov tavuha, bwatuna garigi gubwen̄ hantai.

¹⁷Kimiu gisav taltale tehe take giv huhui havanau be Ratahigi mwa doronigo be gov lolia

¹⁸Gisav taltale tehe gin waen, gabe vi lol hantai rahumiu, take giv masiri gin vui.

¹⁹Giv avo lalai vatvataha kimiu gin samsamwara, i iboi, i iboi ata lol vui, giv lol iboi ba lol iboi mwa gologolo lol sibwen̄imiu lalai Ratahigi.

²⁰Giv avkari God huri vataha ginau duluai, lol ihan Ratahigi gida Jisas Kraes.

²¹Giru vi vinihi marahi mulmulei kimiru kun be gumuru binihi marahi Kraes.

²²Tasalai ron̄ ahoai, kun gabe gim lolia lalai Ratahigi,

²³bwatuna be ahoai kea muai ḡoro tasalai, kun gabe Kraes kea muai ḡoro uloilua. I kea haḡea varahun rebehi, gabe uloilua.

²⁴Kun gabe uloilua mwa ron̄ Kraes. Haḡe kimiu ira tasalai mwa du be giv ron̄ ira ahoamiu lol ginau duluai.

²⁵Ahoai tabe tasalamwa kun Kraes mwa dabe uloilua i nu lin̄ia sibona huria,

²⁶be vi lolia gi bilan God. Kraes mwa avoinia gin avoana be men lol uloilua gim melmelo ginia be mwa bwagae gin wai.

²⁷Kea nu mate huribe kea vi lai uloilua lalainia sibona kun vavin lagi mwa ḡabui rebehina sibona. Kea nu mate huribe uloilua vi melmelo dumwi i vurona vi sigai.

²⁸La hala n̄an mulei kunia, ira ahoai mwa du be rav tabe ira tasalara kun gabe ram dabe rebehira sibora. Atatu be mwa dabe tasalana mwa dabe muleinia sibona.

²⁹Atatu vwate mwa hav varihai te dum rebehina sibona, take mwa ban̄ania i mwa ḡitaḡoroe. I kea haḡea havanau be Kraes mwa lolia huri uloilua,

³⁰Bwatuna be gida ududun rebehina.

³¹Ravrava sabuga mwa bevea be, “Atatu vi lin̄ tamana i ratahina i vi bulu mai tasalana, i atatu gairua raru vivora rebehi gaituvwa.

³²Ginau dahuligi geki raumatan ginau, i inau nam avo huri Kraes mai uloilua.

³³Take atatu gaitutuvwai vatvataha kimiu vi tabe tasalana kun gabe mwa dabea sibina, tasalai vi binihimarahi alolona.”