Read Hano Filipae 1 Bible Online

Filipae 1 - Hano bible

Filipae 1

¹Nin Pol Timoti atatun rovoga non Kraes Jisas. Lalai ira sabuga duluai non God lol Kraes Jisas. Lalai ira sabuga duluai non God lol Kraes Jisas be gim dogo Vilipae, maira bwatmetue i ira Dikon.

²Hogoi i tamwata lalai kimiu nin God tamanda i Ratahigi Jisas Kraes.

³Nam avkari noḡu God vataha taro be nam binihi kimiu,

⁴tagaro nam dataro gin samsamwara huri kimiu duluai.

⁵Nam avkari God huri buluiana be gin lolia lalaiau batena be nan toretore huri Roroi tavuha buluiana gin lolia la muan gubwen̄i be gin siv binihimwasigi vaivotu kekadogaha.

⁶God nu tau bwatuna be men lol rovoga tavuha alolomiu, i inau nam binihimwasigi be vi van rahurahu aluna vaivotu be vi nogoinia batena be Kraes Jisas vi mai mulei.

⁷I inau nam iloe be nan vavtutu be nav binihia kungeki huri kimiu duluai, bwatuna be nam haḡo kimiu lol irubwiku. Kimiu duluai gim bete alolon lolotavuha non God maia kadogaha be inau lol imwa vauvauhi i kadogaha be nam duḡoro i nam seserai lua mwasigi non Roroi tavuha.

⁸God mwa iloe be nam doron maragai be nav gita kimiu, bwatuna be nam dabe kimiu duluai nin irubwin Kraes Jisas.

⁹Geki haḡea noḡu tataro huri kimiu: be nomiu lolotabetabe vi mauri liu maragai; be giv haḡo iloute i giv ilo halana mai git batoi,

¹⁰be giv gitae dolua lol davolan tavuha i hantai i giv gita lua tavuha; be giv melmelo i nomiu vahalana vi sigai huri maiana non Kraes;

¹¹be giv lol ginau tavuha ivusi mai buluiana non Jisas Kraes be vi lai roroa i avkari lalai God.

¹²Ira tuaku nam doronia be giv iloe be, hano be nu loli lalaiau, nu loli huria be vi vavtutui Roroi Tavuha.

¹³Ira radaiḡoro imwan ratahigi lavoa i kera gaitutuvwai duluai ram iloe be nam dogo lol imwan vauvauhi bwatuna be inau atatun rovoga lol Kraes.

¹⁴Bwatuna be inau lol imwa vauvauhi, ira binihimwasigi ivusi ram mai gi atat garogaro lol Kraes i ram hav matagu tehe be rav seserai avoana non God.

¹⁵Mwasigi be kera rituai ram doretore huri Kraes bwatuna be ram binbinihi hantai i ram binbinihi lavoa, take rituai ram doretore huri Kraes bwatuna be ram doron be ramen bului,

¹⁶Kera ram doretore bwatuna be nora lolotabetabe, i ram iloe be God nu laia lalaiau rovoga be nav tuḡoro Roroi Tavuha.

¹⁷Take kera rituai ram doretore huri Kraes gin bugurana i binihiv bahala, ram doron be rav lolia vi ririhai lalaiau lol imwa vauvauhi.

¹⁸Take gaituvwa n̄ano. Muan ginau kea be lol hala duluai, be huri vavtutu binihiv vahala, kera ram doretore huri Kraes. Haḡe nam ron̄ mwandavuha, i nav ron̄ mwandavuha rahurahu.

¹⁹Bwatuna be kimiu gim dataro huriau i vui non Jisas Kraes mwa buluiau, nam iloe be taro ririhai uhu vi lai lalaiau noḡu ribwesiva.

²⁰Nam binihi dautaua i nam doronhohov be nasav hovi tehe alun Kraes lol hano tehe take be nas haḡo binihiv wasi kadogaha, kun vataha mahavana, be nav seserai gaivuanan Kraes lol rahuku teti lol ureure, mwa dovon̄ai be nav togo sa nai mate.

²¹Lol binihiḡu rahuana kea havanau? Lalaiau kea Kraes, i be nas mate, si tavuha maragai.

²²Be rebehiku vi togo rahurahu, nav lol dum rovoga non Ratahigi. Nam len̄a be nav gita lua havanau rahuana sa mateana.

²³Nu ririhai be nav gita lua vwate lol davolan gairua. Nam doron be nav lin̄ rahuana uhu i be nai vora mai Kraes, kunia vi hen tavuha;

²⁴take be giv lai rahuana, nu tavuha maragai be nav togo rahurahu.

²⁵Kun be inau nam binihimwasigi huri geki, nam iloe be nav togo mai kimiu be nai bului kimiu giv mauri i giv haḡo samsamwara lol nomiu binhimwasigi garagusi.

²⁶Giv ron̄ mwandavuha lol Kraes Jisas batena inau mulei mai kimiu.

²⁷Ginau gaituvwa n̄an be nam binihi maragainia. Be giv gitae be giv togo la hala be vi lai binihi marahi lalai Roroi tavuha huri Kraes. Be nam dogo mai kimiu sa nam lago dagai nin kimiu, be gim du wasigi mai binihiv gaituvwa, be giv lol rovoga bulbulu kun gaituvwa lol binihimwasigi garagusi huri Roroi Tavuha.

²⁸I be gisav mataguinira tehe be ram lol ḡoro kimiu. Ginau duluai geki mwasigi huria be nomiu ivwalu duluai rai vora i vero nogonogo take kimiu giv rahu mai God.

²⁹God nu lai binihi marahi la hala gairua, nu hav vora te huria n̄an be gim binihimwasigi lol Kraes take mulei huria be gim ron̄ ḡagarasi huria, hala saraḡo ram lai sarisari lalai Kraes.

³⁰Batena be nan togo mai kimiu gin gita taro ririhai be nu tu lol mataku, i gin ron̄oe huri taro ririhai be mwa du lol mataku kadogaha. Kimiu sinombu gim habwe taro ririhai gea.