Read Hano Filipae 2 Bible Online

Filipae 2 - Hano bible

Filipae 2

¹Rahumiu lol Kraes mwa lai muramura lalai kimiu, non lolotabetabe mwa lol maḡomaḡo lolomiu. Gim bete ute gaituvwa lol Vui Sabuga, i gim haḡo sine hagavi i tabeana.

²Giv samsamwara huria be binihimiu gaituvwa, gim bete gin lolotabetabe gaituvwa, i gim haḡo binihiv gaituvwa i doroniv gaituvwa.

³Batena be gim lol ginau gisav lolia tehe gin bugurana sa binihiv sage be vi tomuai kimiu. Hala kun geki, giv haḡo binihiv bahivoi i giv lai binihi marahi lalai atat dodolua liua be huri kimiu sibomiu.

⁴Gisav binihi te n̄an huri rahumiu sibomiu, take giv binihi huri rahura atat dodolua mulei.

⁵Lol rahumiu giv binbinihi i giv lalaḡo kun Kraes Jisas.

⁶Kraes kea sibona nu ḡun God lol ginau duluai, kea nu iloe be kea nu dadariha mai God, take kea nu hav vinihia tehe be kea vi lalaḡo gin muramura gea huria sibona.

⁷Take nu lin̄ tanona mai God i mwa lolia sibona mwa bora atat vuroi. Nu vora kun atatu i nu mai gi atatun rovoga.

⁸I batena be nu togo kun be atatu, nu lin̄ muleinia sibona i nu masiri gin lolo tabetabe lalai God, vaivotu batena be mateana alun volovolo.

⁹Haḡe God nu ragasia vai lol tanoi haehae. God nu lol ihana gaivua liu iha dodolua,

¹⁰huri be bwau duluai rav hivbwaubwau vai la ihan Jisas Kera duluai lol mahao, alun ureure, i halaten tano.

¹¹I Kera duluai rav seserainia be Jisas Kraes kea Ratahigi, vi lai sarisari lalai God Tata.

¹²Ira tabetabe, kun vataha mahavana gim roron̄taiau batena be nam dogo mai kimiu, vi tavuha maragai be giv roron̄taiau batena nam hav togo te mai kimiu. Giv lol rovoga ḡaoḡao gin binihi marahi mai huiruru be giv lai dum rahuana,

¹³bwatuna be God mwa lol rovoga alolomiu, be vi bului kimiu giv doron be giv lol hano be vi lol samsamwarai lolon God.

¹⁴Gisav ḡurutu tehe lol ginau duluai be gin lolia gin vigaigaiana.

¹⁵Vuvuri giv melmelo i nomiu vahalana vi sigai. Giv vora ira nitun God be vahalana sigai. Take gim dogo mai sinombu lete i atat hahantai dalis kimiu, alolora gim ḡigita kun ira visiu lol mahao.

¹⁶Giv hagai silo vagahi be vi mai mulei, inau nav samsamwara dumwi bwatuna be noḡu rovoga mwa hav van te sabwelei. Nan rovo huri tavwe i nan laia.

¹⁷Nomiu binihimwasigi garagusi mwa lol kimiu gim lin̄ rahumiu kun be tataroi lol rovoga lalai God. Nam lai mwasin dagaku mai nomiu tataroi tuntun, nav ron̄ mwandavuha i nav masiri lol samsamwara gin kimiu duluai.

¹⁸Kimiu mulei mwa du be giv ron̄ mwandavuha i giv masiri gin samsamwara maiau.

¹⁹Nam doronhohov lol Ratahigi Jisas be vi hora Timoti vai abemiu sihav vora te vain̄ava. Nav ron̄ mwandavuha be nav huhuinia be gim do kun hanigi?

²⁰Nam hav habwe te atatu vwate kun Timoti, kea mwa ḡita ḡoro kimiu mwasigi.

²¹Sinombu rituai ram binihi huri rahura n̄an sibora, barabe huri rovoga non Jisas Kraes.

²²Gim iloe be Timoti kea lalan̄an atatu vwate. Gim iloe be nu lol rovoga maiau be nu vev Roroi Tavuha kun be naturigi mwa lol rovoga huri tamana.

²³Inau nam daritari be nav hora vilvilehinia batena nav iloe be hano vi loli lalaiau.

²⁴Nam binihimwasigi be Ratahigi vi buluiau be nai mai vai abemiu barabe vi n̄ava.

²⁵Epavrodaetas, tuaku lol Kraes, mwa lol rovoga i mwa lalaḡo maiau gi atatun bwaloana non Kraes. Batena be nan doron buluiana, gin horae vai abeku. Nam binihia kadogaha be nav hora muleinia vai abemiu,

²⁶bwatuna be mwa doron maragai be vi gita kimiu duluai. Kea mwa binbinihi maragai bwatuna gin ron̄oe be nu haro.

²⁷Uwe, nu haro, i nu abena be si mate, be nasav habwe te ron̄ mwahantai liu.

²⁸Nam doron maragai be nav horae vai abemiu huri be, batena be giv gitae giv ron̄ mwandavuha, i inau nasav binbinihi tehe maragai huri kimiu.

²⁹Giv lai ḡoḡoe la ihan Ratahigi mai samsamwara. Giv lai binihi marahi lalai sinombu be kunia,

³⁰bwatuna be nu abena be si mate huri rovogan Kraes. Mwa lin̄ rahuna be vi lai lalaiau buluiana be kimiu gisav lai te dumwia lol nomiu lalaḡov lalaiau.