Read Hano Filipae 3 Bible Online

Filipae 3 - Hano bible

Filipae 3

¹Ira tuaku, giv masiri gin samsamwara lol Ratahigi. Mwa hav vora te taro ririhai lalaiau be nav rav mulei ginau gaituvwa lalai kimiu, i vi bului kimiu be giv lol vatuvwai maragai.

²Giv gita ḡoro hurira be ram lol ginau hantai, kera be kun ira vwiriu, kera be ram bev maragai huri tav rebehi.

³Kamai haḡea mwasin ira tav dovon̄ana bilan God. Gam ḡogonai God sivi non vui, i nomai sasagerega kea lol Kraes Jisas. Gam hav tau te butuana alumai sibomai sa havanau tehe be gav lol dumwia lalai rebehimai.

⁴Nav tau butuana aluku mau siboku. Be ihei mwa binihia be kea mwa ilo bwatuna be vi butu aluna n̄an sibona, mwa du be si iloe be inau nam ilo bwatuna gaivua be nav butu mau aluku siboku.

⁵Inau nan lai tav dovon̄ana atagun gubwen̄ gaivwelu be nan vora. Inau ata Israel nin houn Benjemen, inau mwasin dagan ata Hibru. Binihiḡu nu wasi maragai alun Silo non ira Jius bwatuna haḡea be nan mai gi Varise.

⁶Nan masiri gin doroniva be nav lol ron̄oe be nav lol ḡagaras uloilua. Tuara vwate nu hav habwe te dum vahalana mai hala be nan ron̄ tabetabe alun silo non Moses.

⁷Ginau kera gea tanon binihi marahi lalaiau, take kadogaha nam binihia be tavuhara sigai bwatuna be Kraes.

⁸Mwa hav vora te huri ginau n̄an kera gea, take nan binihia be ginau duluai tavuhara sigai be tav dadarihainira mai iloilo huri Kraes Jisas noḡu Ratahigi. Hurira, nam lin̄ ginau duluai kera gea i kadogaha nam iloe be kera han̄ora. Geki mahin̄aiau be nav lai Kraes

⁹i bilana. Kadogaha nam bavtutu mai God, nu hav vora te huria be nan huri silo, take bwatuna be nam binihimwasigi garagusi alun Kraes. God mwa haḡo noḡu binihimwasigi garagusi mwa loliau nan bavtutu maia.

¹⁰Nam doron be nav ilo Kraes i muramura be nu ragasia nin mateana. Nam doron be nav bete lol non ron̄ ḡagarasi i nai mai kunia lol mateana.

¹¹Vuvuri nam haḡo doronhohov be inau siboku nai maragasi nin mateana.

¹²Nam hav vevea te gin binihiva be, inau huba kunia be God mwa doroniau. Nam hav votui te radui tovtovo gea, i nav laia noḡu. Kraes Jisas mwa doroniau be nav lolia kunia bwatuna haḡea gea mwa loliau nam mai gi bilana.

¹³Ira tuaku, nam iloe be nam hav votui te tovtovo gea radu, take aia ginau gaituvwa be nam lolia tagaro. Nam binihi malioi ginau ata amua nam rovo huri hano be mwa du lolmataku.

¹⁴Nam lol ron̄oe tagaro be nai votui tovtovo gea i nav lai tavwe kea be God nu uloiau sivi Kraes Jisas huri rahuana amare.

¹⁵Gida duluai be tan metua lol hogoi ata lol vui mwa du be tai binbinihi huri hala geki mulei. I be aia ginau rituai be gim hav dame te huria, God vi lolira rav melmelo lalai kimiu.

¹⁶Take mwa du be gida tav huri rahurahui mwasigi be tam haḡoe huba.

¹⁷Ira tuaku, kimiu duluai gis lol ron̄oe be giv huri maleleku i be giv lolia kunira be ram dogo la hala be gan seserainia lalainira kunia.

¹⁸Atatu ivusi ram dogo kun be ira ivwalu huri volovolo non Kraes. Vataha mahavana nan vevea lalai kimiu hurira i mwa loliau mataruaku mwa hovi be namen vevea lalai kimiu kadogaha.

¹⁹I la nogonana, rai vora vina kaburai. Ram lol hano n̄ano be rebehira mwa doronia, ram sasagerega huri nora rovogan busbusiana, i ram binihi huri ginau ata lol ureure n̄ano be vi vora nora god.

²⁰Take mwasin vanuanda kea amare, i gida tam hohovi huri varahuda Ratahigi Jisas Kraes, be vi himai nin amare.

²¹Gin non muramura be vi rovoi ginau duluai, vi leahi vihogoi i vi lolira kun rebehina sibona be nu sarisari.