Read Hano Kolosi 1 Bible Online

Kolosi 1 - Hano bible

Kolosi 1

¹Nin Pol, hala non Kraes Jisas. Inau nam bora hala bwatuna kea hano be God mwa doronia. Mulei nin Timoti, gabe tuada.

²Lalai ira tuada atat binihimwasigi duluai lol Kraes be ram dogo Kolosi, hogoi i tamwata lalai kimiu nin God tamanda.

³Lol nomai tataro huri kimiu gam avkari God, taman Ratahigi Jisas Kraes,

⁴bwatuna be gan ron̄oe huri binihimwasigi garagusi be gin togo maia huri Kraes Jisas i lolotabetabe be gin haḡoe huri ira atatu non God.

⁵Batena be mwasin roroi be Roroi Tavuha mwa mai muana abemiu, gin ron̄oe huba i gim ilo doronhohov be mwa dogo alolona. Doronhohov geki kea bwatun nomiu binihimwasigi garagusi mai nomiu lolotabetabe be mwa lol vatuvwainia hurigo lol ute atamare.

⁶Lol ute duluai lol ureure, Roroi Tavuha gea mwa lon̄ahi ute n̄oto lol ureure. Roroi Tavuha geki mwa lai vatavuha vataha ute lol ureure, kun vatavuha be nu mai alumwa lol muan gubwen̄i be gon ron̄oe huri hogoi non God. Kadogaha gom iloe ginau n̄oto i mwasigi huri hogoi non God.

⁷Gim ron̄oe huri hogoi non God nin Epavras, kea be gam dabea. Mwa lol rovoga ute gaituvwa mai kamai i kea atat binihimwasigi non Kraes huri kamai.

⁸Mwa bevea mulei lalai kamai huri lolotabetabe be gom haḡoe nin Vui Sabuga.

⁹Bwatuna geki, lol gubwen̄i be gan ron̄oe hurigo, gam dataro rahurahu hurigo, nam hudali God be gov ilo didininia havanau be mwa doronia. Gam dataro be gov mataisaoga maragai i iloilo bwatuna be Vui Sabuga mwa laia lalainigo.

¹⁰Gov togo lol rahuana be mwa lol doroniva non God la hala duluai. Nom rovoga tavuha vi vwaevwae i vi mauri lol mataisao non God.

¹¹God vi lol muramurago gin non muramura tavuha huribe si hav savigo tehe lol taro be taro ririhai vi mai take gov lin̄ muleinigo.

¹²I gov samwara ba lai tabeana lalai tata be nu loligo gom haḡo dum houn ginau duluai be nu lol vatuvwainia huri non sinombu lol ute ratahigi huri gigita.

¹³God nu lai lua gida nin muramura ata lol ute meto, i mwa lai gida vai lol ute ratahigi non nituna.

¹⁴Nituna mwa bol vuroda i alolona haḡea tam haḡo binihiv kaburai vuro.

¹⁵God kea ta sav gita te dumwia gin mwasin matada, take be gom ḡita Jisas, kea kunia n̄ano be gom ḡita God. Kraes kea tuagai naturigi non God, i nu holomare hae liu ginau duluai nu loliana.

¹⁶Sivi non muramura God nu lol ginau duluai mwa lol ginau amare i ata lol ureure, ginau be mwa ḡitana i mwa hav gitana tehe, muramura duluai, ginau mutai ratahigi i tomuai. Ginau duluai mwa loli sivi Kraes i huri Kraes.

¹⁷Amua ginau duluai ram siv loli, Kraes kea rahuana. Ginau duluai ram loli bwatuna Kraes i ginau duluai ram du lol mwasin tanora.

¹⁸Kea haḡea bwatun rebehi, gabe uloilua. Ginau duluai mwa mai ninia. Kea muana gabe nu tomare nin mateana. I lol ginau duluai Jisas kea muana.

¹⁹Mwasin binihin God sibona be vi tau ginau duluai be nona alun Nituna.

²⁰I sivi Nituna, God mwa lai mulei ginau duluai huria sibona-ginau lol ureure i ginau amare. God mwa lol tamwata sivi dagan Nituna gin mateana alun volovolo.

²¹Lol taro vwate gon togo dagai nin God. Gon vora non ivwalu lol nomiu binbinihi, i ginau lete be gin lolia vai alun God.

²²Take kadogaha, God mwa lol kimiu gi ira tuana mulei sivi mateanan Kraes. I kadogaha gov mai dum lolmatan God kun atatu gabe ran sabuga, i nu melmelo be vahalana sigai.

²³Geki vi loli be gov tu rahurahu wasigi i gov ilo didinigi lol non binihimwasigi. Gosav tagara te dagai nin doronhohov be nu laiana lalainigo sivi Roroi Tavuha. Inau Pol, atatun rovoga be nam bului lol toretoreanan Roroi Tavuha gea, Roroi Tavuha gea be atatu n̄oto lol ureure ram ron̄oe.

²⁴Nam samwara lol noḡu taro ririhai hurigo. Huribe nam ron̄ḡagarasi lol rebehiku huribe namen lol nogonogoi ron̄ḡagarasi non Kraes. Ginau rituai abena be Kraes mwa ron̄ ḡagarasi sivi rebehina, gabe uloilua.

²⁵Nam mai gi atatun rovoga gea kea haḡea be nai vev n̄oto rovoga non God.

²⁶Roroi geki kea ginau hili be nu tahulinia nin atatu duluai, la bwatun tauva, take kadogaha mwa lolian seserai lalai ira atat sabuga non God.

²⁷Taritari non God be vi lol non sinombu rav ilo huri non roso sabuga i ginau dahuligi mutai be mwa haḡoe huri sinombu duluai. Ginau mutai dahuligi gea kea Kraes be mwa dogo alolomwa, doronhohov huri sarisari.

²⁸I tav tu rahurahu be tav toretore huri Kraes lalai atat gaitutuvwai, tav haḡo mataisao duluai be tai vev dau i tav vagahi atatu duluai, la hala be tav lai gaitutuvwainira vai aben God kun gabe atat mituaga lol Kraes.

²⁹Huribe men loli kun geki, nam lol rovoga i nam du wasi, gin muramura wasi non Kraes be mwa lol rovoga muramuraga aloloku.