Read Hano Kolosi 3 Bible Online

Kolosi 3 - Hano bible

Kolosi 3

¹Lol taro be gon tomare nin mateana mai Kraes, gov binbinihi huri hano be mwa du amare, aia gabe Kraes mwa dogo la mwatuan God.

²Gov vinihi ginau n̄ano ata amare, take vorate ginau ata lol ureure.

³Nom lolian vuroga sibomwa nu mate, i rahumwa gabe ginau gara mwa dogo mai Kraes lol God sibona.

⁴Kraes kea rahuda, i lol taro gabe vi mai mulei tav haḡohaḡo lol sarisarina.

⁵Giv tau kaburai ginau hantai duluai lol rahumiu: vuro lol alen̄ bwatigoro, lolian daltalei gom lin̄ binihiv taltale mwa domuainigo, gon doron ginau lete, i ginau ravravwega i bugurana (huribe bugurana kea dovon̄an gogonaiana lalai tagaro dodolua).

⁶Ginau kerageki mwa lol God mwa lolhoro. I vi hovi alura be ram hav ron̄oe tehe.

⁷Amua lol rahumwa gabe rahuan lete gon lol ginau haḡe kerageki.

⁸Take kadogaha gov tau dagai ginau kerageki nin rahumwa: lolhoro, alen̄ wasi, loliana sage gom bev ginau be mwa lol atatu dolua mwa ron̄ mwahantai, i gam av bwarebware lol taro ron̄ mwahantai, i gom av bwarebware lol taro be gom avo.

⁹Gosav tentene tehe lalai atat dolua. Gon lai dagai gaisagan rahuan taltale ata amua i ginau be gon lolia amua.

¹⁰Gom saga gaisagan rahuan gara, kebe mwa lol garainigo i gom mai kun wani gabe nu loligo. Rahuan gara geki mwa lai lalainigo iloilo nin God.

¹¹Lol rahuan gara ginau vwate nu hav dolua tehe lol davolan ira Lolobon̄i mai ira Jius, kera gabe ran tav dovon̄ara i kera gabe ran hav tav te dovon̄ara, ira tausala sage ira len̄len̄aga, ira turi i ira mwaribwesi. Take Kraes kea lol ginau n̄oto, i Kraes mwa dogo lol ginau duluai.

¹²God nu gita luago i mwa loligo i non atat sabuga. Mwa dabego. I kunia gov sagago lol ginau haḡe kerageki: Gov hagav atat dolua, gov tabetabe, lin̄ mulei, sine hagavi, i ron̄ mwan̄ava.

¹³Gov mwemwearu mai ira tuamwa i gov binihi kaburai vurora. Be atatu vwate mwa lol vahala lalainigo, gov vinihi kaburai vuron atatu gea bwatun be God mwa binihi kaburai vuromwa.

¹⁴Gov lol ginau n̄oto kerageki; take liu n̄ano be, gov tabe tuamwa. Lolotabetabe haḡea havanau be mwa haḡo bul kimiu duluai lol tamwata.

¹⁵Gov lin̄ tamwata gabe Kraes mwa laia vi vwalau binihimwa, bwatuna be nu uloi kimiu duluai vai lol rebehi gaituvwa be giv haḡo tamwata. Giv lai avkariana vataha mahavana.

¹⁶Giv lin̄ silo vagahi non Kraes vi togo mai kimiu tagaro. Giv haḡo mataisao n̄oto be giv vagahi i giv iloilo kimiu be giv lol iboi, iboin tataro mai iboi sabuga gin avoan avkari lol irubwimiu lalai God.

¹⁷Ginau n̄oto be gom lolia i gom bevea vi loli be men gogonai Jisas nonda Ratahigi. I lol ginau n̄oto be gom lolia, gov lai tabeana lalai God tamanda sivi Jisas.

¹⁸Ira tausala, gov lin̄ muleinigo lol mwasigianan rovoga non ahoai, bwatuna be geki haḡea ginau vavtutu be gov lolia lalai God.

¹⁹Ira ahoai, giv tabe ira tasalamiu i giv lin̄ maḡemu lalainira.

²⁰Naturirigi, giv tabe ira tamamiu i ratahimiu lol ginau duluai bwatuna be kea haḡea mwa lol binihin God.

²¹Ira tama i ratahi, gisav lol te bwarebware ira nitumiu. Huribe lol taro be giv lolia kunia, kera rav ron̄ mwahantai i binihira vi hovi.

²²Ira turi giv tabe ira nomiu tomuai lol ginau n̄oto be gim lolia. Gisav tabe te silo n̄ano lol taro be ram ḡitago, be gomen lol nora doroniva, take gov lol rovoga mwasigi lalainira, bwatuna be gom dabe God.

²³Lol rovoga tavuha be gom lol dumwia, gov lolia kunia gabe gom lolia lalai God, take vorate lalai atatu.

²⁴Gov vinihi dumwia be gov lai tavwemwa nin God, gabe nu haḡoe huri non atatu. Kraes kea mwasin non Ratahigi be gom lol rovoga lalainia.

²⁵Take gov vinihi dumwia be atatu gabe mwa lol vahala vi lai silo vevegi huri vahalana gea, i God mwa lolia lalai atatu duluai dadariha.