Read Hano 1 Tesalonaeka 2 Bible Online

1 Tesalonaeka 2 - Hano bible

1 Tesalonaeka 2

¹Ira tuaku, gim iloe be gan visirai abemiu nomai maiana mwa hav vorate bonogai n̄an kunia.

²Amua gam siv mai vai abemiu, gan ron̄ ḡagarasi Vilipae, sinombu ataa aia ran av bavahiru kamai, kun gim iloe be, sinombu ivusi ran tuḡoro kamai. Take nomai God nu tura kamai be gosav matagu tehe i gav vev sera non Roroi Tavuha.

³Nomai vev sera wasi mwa hav mai tehe nin tenteneana, sage binihiv bahala sage be gam lol ron̄oe be gamen san kimiu.

⁴Take gam bev Roroi Tavuha bwatuna God nu haḡo ron̄ kamai i mwa butu alumai be gav lolia. Batena be gam avo gam hav lol te ron̄oe be gav lol samsamwarai lolon sinombu, take lolon God, kea mwa haḡo ron̄ lolomai.

⁵Gim iloe be gam hav lol te ron̄oe be gav sogai kimiu gin avoan lumlumuhi huri kimiu. Gam hav lol te ron̄oe be gav lai nomai homu; nomai bugurana sigai be gav tahulinia nin kimiu. God mwa iloe be geki mwasigi.

⁶Gam hav hiḡe te hala be atatu vi sagerei kamai, huri kimiu sa ira hei dodolua,

⁷gaituvwa be ira hala non Kraes, gas haḡo dum nomai roron̄o ḡoro kimiu. Take gam maḡemu mai kimiu, kun ratahi be mwa ḡitaḡoro ira nituna be ririgi radu.

⁸Bwatuna be gan tabe kimiu, gan ron̄ mwandavuha be gav bete mai kimiu, nu hav vora te Roroi Tavuha non God n̄ano take rahumai sibomai mulei. Kimiu gin mai sosori maragai gin lolomai.

⁹Ira tuaku, nam iloe be gim binihi dum nomai rovoga hahavwani i taro ririhai duluai. Gan lol rovoga hahavwani i taro ririhai duluai. Gan lol rovoga bon̄i i ute rani be gasav mai tehe gi marahin rovoga lalai ihei tehe alolomiu, taro be gan toretore huri Roroi Tavuha non God lalai kimiu.

¹⁰Batena be kamai gan togo mai kimiu, gan togo lol hala be nu sabuga i nu vavtutu, vahalana sigai aluna. Gim iloe be geki mwasigi, i God mulei mwa iloe.

¹¹Gim iloe be gan lol tabe kimiu gaitutuvwai kunia be tama mwa dabe mwasin ira nituna.

¹²Gan av dura kimiu gam av wasi lalai kimiu, gan doronia be giv togo lol rahuan tavuha huri God. God mwa doron be tav togo lol rahuana be tav tabea vataha mahavana.

¹³Mulei, gam avkari God bwatuna be batena be gin ron̄ non roroi nin kamai, gin lai ḡoḡoe kun be avoana non God, nu hav vora te avoana non atatu. I mwasigi be avoana non God, nu hav vora te avoana non atatu. I mwasigi be avoana non God be mwa lol rovoga alolomiu be gim binihimwasigi.

¹⁴Ira tuaku, nomiu rovoga huba kun ira atat non God ira binihimwasigi lol Kraes Jisas be ata Judia. Gin ron̄ ḡagarasi huri sinombu ata lol mwasin vanuamiu, kunia be ran ron̄ mwahantai, ginira ira varan ira Jius.

¹⁵Kera ran wehi saraḡo Ratahigi Jisas i ira atatun vevsera i ran garoi kamai be gav derai Vanua gea. Ram hav lol te samsamwarai lolon God i ram ban burigai sinombu duluai.

¹⁶Ram lol ron̄oe be rav tuḡoro kamai nin silo vagahi lalai ira Lolobon̄i be ram lai varahuva. Ram lolia kungeki, ram buroga mwa liu tovtovona. Lolhoro non God mwa mai mwa botui nogonana lalainira!

¹⁷Ira tuaku, gaituvwa be gam do dagai nin kimiu huri mahavan vwelvwele, binihimai duluai ram do radu mai kimiu. Gam doron maragai be gav gita kimiu, i gam lol ron̄oe maragai be gav gita kimiu, i gam lol ron̄oe maragai be gav lol dumwia.

¹⁸Gan doron be gav mai vai abemiu. Inau, Pol, nan lol ron̄oe vai vusi, take Setan nu tuḡoroau.

¹⁹Kimiu haḡea nomai doronhohov, nomai samwarana, i gai sosorin bwatu be gav ḡariḡari kamai alolona batena be nonda Ratahigi Jisas Kraes vi mai.

²⁰Mwasigi be kimiu nomai sarisari i nomai samwarana.