Read Hano 1 Tesalonaeka 3 Bible Online

1 Tesalonaeka 3 - Hano bible

1 Tesalonaeka 3

¹Gasav mai te dum abemiu, take nu ririhai be gav hohovi, gam binihi tuhi be nu tavuha be gav togo n̄an lol Vanua Atens gahemai,

²I nav hora Timoti vai abemiu. Timoti, kea tuamai mwa lol rovoga mai kamai huri God i mwa bului kamai be gai vevea lalai sinombu huri Roroi Tavuha huri Kraes. Gam horae be vi vamuramura i vi avdura kimiu lol nomiu binihimwasigi garagusi,

³i tuamai vwate sihav ron̄ te mwahantai gin taro ririhai kera geki. Kimiu sibomiu giv iloe be mwa du be tav habwe taro ririhai kera geki.

⁴Gaituvwa n̄an batena be kamai mai kimiu, gan vevea lalai kimiu be gida duluai tav ron̄ ḡagarasi, i gin iloe be nu loli huba.

⁵Bwatuna geki, batena nasav hohovi te dum vain̄ava, nan hora Timoti vai abemiu huri be nav iloe huri nomiu binihimwasigi garagusi. Nan matagu berevai Atatmate nu haḡo ron̄ kimiu huba, i kunia nomai rovoga wasi vi vora bonogai.

⁶Take Timoti kadogaha nu mai mulei nin kimiu vai abemai nu tabagilu mai Roroi Tavuha vai abemai huri nomiu binihimwasigi garagusi i lolotabetabe. Nu vevea lalai kamai be kimiu mulei gim binihi dum kamai lol hal tavuha i be gim doron be gimen gita te kamai kunia be kamai mulei gam doron be gamen gita te kimiu.

⁷Haḡe ira tuaku, batena be gam habwe hal ririhai i ron̄ḡagarasi, kimiu gim dura kamai bwatuna nomiu binihimwasigi garagusi.

⁸Rahumai mwasigi mwa masiri be gim du wasi alolon Ratahigi.

⁹Nomai samsamwarana maragai lolmatan nonda God bwatuna kimiu. Gisav lai te avoan avkari be vi dadariha huri samwarana duluai be gam ron̄oe.

¹⁰Bon̄i i rani gam dataro ḡaoḡao mai lolomai duluai be gam ḡita mulei kimiu i gam lai ginau duluai lalai kimiu be gim doronia huri be vi lol nomiu binihimwasigi garagusi.

¹¹Kadogaha nomai God i Tata kea sibora i nonda Ratahigi Jisas mwa lol vatuvwai hala huri kamai be gai mai vai abemiu.

¹²Nam dataro be Ratahigi vi lol nomiu lolotabetabe vi mauri liu i vi mauri huri kimiu gaitutuvwai i huri sinombu duluai huri be giv lolotabetabe kera dodolua kunia be kamai gam dabe kimiu.

¹³Nam dataro be lolomiu vi tu wasigi, be giv vora atat sabuga i vahalana sigai lolmatan nonda i Tata batena be nonda Ratahigi Jisas vi mai mai non ira sabuga duluai.