Read Hano 1 Tesalonaeka 4 Bible Online

1 Tesalonaeka 4 - Hano bible

1 Tesalonaeka 4

¹Ira tuaku, gan vagahi kimiu be hanigi giv togo la hala be God vi samsamwara ginia, i kimiu gim dogo alun hala gea. Kadogaha gam hudaligi i gam avdura kimiu lol Ratahigi Jisas be giv togo la hala gea vi liu.

²Gim ilo halana be gan vevea be giv lolia gin roron̄o non ratahigi Jisas.

³God mwa doron kimiu be giv sabuga i giv to dagai nin bwatigoro mai atamwani i vavine ram bulu lol rebehira.

⁴Mwa doron kimiu gaitutuvwai be giv huhuinia be giv togonai rebehimiu sibomiu lol hala be nu sabuga i nu marahi.

⁵Gisav lol te rebehimiu lol bwatigoro mai vavine i atamwani kun ira len̄len̄aga.

⁶Mulei, gisav lol te bahala sa gisav ruruhi te atatun Kraes vwate la hala geki. Ratahigi vi vevegi sinombu be ram lol ginau kera gea kunia be gan vev serae lalai kimiu be gisav lolira tehe.

⁷God nu hav uloi te gida be tav togo lol vuro, take tav togo melmelo.

⁸Ihei tehe be mwa hav tabe te non silo vagahi, mwa hav daha te atatu, take God gabe mwa lai non Vui Sabuga lalai gida.

⁹Mwa hav tu tehe be gav ravae lalai kimiu huria be giv haḡo tabeana huri ira atatun Kraes duluai, bwatuna be God nu vagahi kimiu huba be giv tabetabe kimiu.

¹⁰I mwasigi gim lolotabetabe atatun Kraes duluai be ram do Masedonia. Ira tuaku, kadogaha gam dura kimiu be giv tabera vivora liu.

¹¹Giv lol ginau duluai be giv togo lol rahuana be nu masiri gin rahuanan tamwata. Gisav sogai tehe bwarin̄anhumiu lol ginau non atat dodolua i giv lol nomiu rovoga sibomiu kunia be gan vevea huba lalai kimiu.

¹²Be giv lolia, kunia sinombu be ram hav binihi te mwasigi rav binihi marahi kimiu, i kimiu gisav butu tehe alun atat dodolua huri havanau be gim doronia.

¹³Ira tuaku, gam doron kimiu be giv iloe huri atatun Kraes be ran mate, be gisav ron̄ te mwahantai, kunira rituai be nora doronhohov sigai.

¹⁴Gan binihimwasigi be Kraes nu mate i be nu tomare mulei. Haḡe bwatuna gea, God vi tomarei kera be ran mate huba mai Jisas.

¹⁵Havanau be gam bevea lalai kimiu kadogaha kea roroi non Ratahigi sibona. Kamai be gam rahu batena be Ratahigi vi mai mulei sihav vano tehe amua nin kera be ram mate huba.

¹⁶Ratahigi sibona vi himai vai ataa nin mahao mai batoan wasi nin amare, mai silon muai enjel, i mai silon God gin taiva bilan God. I kera be ran mate huba take ran binihimwasigi lol Kraes, kea rav tomare amua.

¹⁷Ataguna gea, gida be tam rahu radu tav mai ute gaituvwa maira lol tenlan̄i tai visogari mai Ratahigi la mahava. I tav togo mai Ratahigi vai tuai.

¹⁸Haḡe giv turatura kimiu mai avoana kera geki.