Read Hano 1 Timoti 1 Bible Online

1 Timoti 1 - Hano bible

1 Timoti 1

¹Nin Pol, hala non Kraes Jisas, gin avoan wasi non God varahuda i Kraes Jisas nonda doron hohovi.

²Lalai Timoti, kea mwasin nituku lol binihimwasigi garagusi: Hogoi, sine hagavi i tamwata nin God Tata i Kraes Jisas nonda Ratahigi.

³Nam hudalinigo be gov togo hen vain̄ava Ivisas kunia be nan vevea lalainigo amua batena be nan haroro Masedonia i giḡo goi vev wasi dumwia be sinombu rituai aia be rav mambui vagahi tentene.

⁴Vevea lalainira be rasav sabwelei te nora taro alun ira vevuri tentene i alun varavarain iha lol vevuri ata la varara tuai. Ginau kera geki ram lol vigaigaiana n̄ano; ram hav bului tehe huri taritari non God, kea be mwa loliana gin binihimwasigi garagusi.

⁵Binihiva huri avoan wasi geki huri be sinombu rav haḡo lolotabetabe, kea be mwa mai nin lolo melmelo i binihiva be nu tavuha i binihimwasigi garagusi vavtutu.

⁶Atatu rituai ran vahal ginau kera geki i ran van huri avoana be mwasina nu sigai.

⁷Ram doron be rai vora vagahin silo, take ram hav ilo te halana mulei be ram bev havanau sa be ram binihimwasiginia.

⁸Take kamai gam iloe be silo nu tavuha be atat vwate si haḡoe la mwasin silona.

⁹Gam iloe mulei be silo mwa hav vora te huri atat tavuha take hurira be ram du ḡoro silo i hurira be ram hav doron tehe be rav huria. Hurira be ram du ḡoro God, i ran masiri gin bwatigoro, kera be ran hav sabuga tehe i ram hav haḡo te halan binihimwasigi, kera ram wehi ira tamara i ratahira, kera ram wehi surai.

¹⁰Ram bulu lol bwatigoro lol rebehi, be atamwani mai atamwani sa vavine mai vavine, kera be ram surai turin rovoga, kera be ram dentene, kera be ram bev avoan tentene, i ram lol ginau duluai ḡoro silo vagahi mwasigi God.

¹¹Silo vagahi kea udun Roroi Tavuha non God samsamwara kea nu lai lalaiau be nai vevea.

¹²Nam avkari Kraes Jisas nonda Ratahigi, kea nu lai hui wasi lalaiau, bwatuna be kea mwa butu aluku i nu lai rovoga lalaiau be nav lol rovoga lalainia.

¹³Lol taro nu ḡao huba inau nan avo vai alun Kraes i nan wehi bonogainia i nan lol lalan̄an ginau be nav lol ḡagarasia. Take God nu seserai lalaiau sine hagavi bwatuna be nan hav ilo te havanau be nan lolia. Nan hav binihi te mwasigi.

¹⁴Take hogoi non nonda Ratahigi nu lai duluainia lalaiau, i mai hogoi gea nu mai i binihimwasigi garagusi i lolotabetabe lalai gida duluai be tam bulu lol Kraes Jisas.

¹⁵Havanau be nam bevea kea mwasigi, i mwa du be gov lai ḡoḡo duluainia: Kraes Jisas nu himai vai lol ureure be vi varahura atat bwatigoro, alolora inau nan hantai liura.

¹⁶Take nu lai sine hagavi lalaiau huria be aloloku, nan hantai liu ira bwatigoro duluai, Kraes Jisas mwa seserai dumwia be kea mwa haḡo alen̄ n̄ava be n̄olina sigai. Sine n̄ava maiau mwa dau malele hurira be rai binihimwasiginia i rav lai rahuana vai tuai.

¹⁷Lalai Ratahigi Vurai be mwa lavoa ḡoro vai tuai, kea sihav mate tehe, kea be tasav gita te dumwia, kea n̄an God, tanon binihi marahi i sarisari vai tuai i vai tuai! Amen.

¹⁸Timoti, nituku, nam laia lalainigo avoan wasi be mwa dadariha mai avoan vevsera be nu hagainia hurigo lol taro nu ḡao huba. Nam bevea kunia lalainigo huri be gov hurira i gov bwalo tavuhai.

¹⁹Gov binihimwasigi garagusi tagaro i gov lol havanau be gom iloe be nu vavtutu. Atatu rituai ram binihi marahinia, i nora binihimwasigi garagusi mwa bora kun waḡa be mwa saḡa.

²⁰Himenaeus i Aleksanda ran lolia kunia, i nan hagainira lalai Setan huri be rav huhuinia be rasav avo tehe vai alun God.