Read Hano 1 Timoti 2 Bible Online

1 Timoti 2 - Hano bible

1 Timoti 2

¹Muana, nam bevea lalainigo be gov tataro bului sinombu, hudali God huri havanau ram doronia i gov lai avoan avkari lalainia.

²Tataro huri ira tomuai i kera be ram haḡo roron̄o huri be tav lai rahuana be nu mahuri i nu masiri gin tamwata i gogonai i binihi marahi huri God.

³Geki nu tavuha, i lol samsamwarai God varahuda,

⁴kea mwa doron sinombu duluai be rav rahu i rav ilo huri mwasigi.

⁵God gaituvwa n̄an i hala gaituvwa be atatu vi votui God. Hala gea sivi Kraes Jisas, kea sibona atatu.

⁶Nu mahin̄ainia sibona be vi vora varahun sinombu. Geki mwa lol ḡigilainia la mwasin tarona be God mwa doron atatu duluai be rav rahu.

⁷Ran gita luau be nai vora hala be nav vagahi ira Lolobon̄i be rav binihimwasigi garagusi i rav ilo mwasigi. Nam hav tentene tehe; ta nam bev mwasigi!

⁸Nam doron atatu vataha ute be rav tataro, rav hagai limara amare la hala be nu sabuga, be lol horo sigai i vigaigaiana.

⁹Mulei, ira vavine rav saga gaisaga tavuha be rav seserai binihi marahi i vwalaunia sibona rasav lol te il n̄an̄ava be rai viria sa be rav ulia gin ul an̄oga sa lalan̄an gitavanana sa gaisaga be volvol marahi.

¹⁰Leahia gea, rav lol lalaḡov gin sine tavuha, kea be nu vavtutu huri ira vavine kera be ram bevea be ram ḡogonai God.

¹¹Vavine vi lin̄ia vi huhui gin roron̄tai ḡoḡonai i vi lol vatuvwai be vi bulbulu lol ginau duluai.

¹²Take nam hav mahin̄a tehe be vavine vi vagahi sage vi haḡo roron̄o ḡoro atamwani, take vi roron̄tai ḡoḡonai,

¹³bwatuna be Adam nu taua amua vuvuri Iv.

¹⁴I Adam nu hav vorate atatu be teltele nu ruruhia, take vavine kea teltele nu sania i nu mai gi bwatigoro.

¹⁵Take vavine vi varahua sivi bavavana, kea be rai van rahurahu lol binihimwasigi garagusi, lolotabetabe, i togoan sabuga, mai vwalaua.