Read Hano 1 Timoti 3 Bible Online

1 Timoti 3 - Hano bible

1 Timoti 3

¹Havanau be nam bevea kea mwasigi: Ihei tehe be mwa mai gi tomuai mwa doron rovoga tavuha.

²Tomuai non uloilua sihav lol te ginau be sinombu rav vinihi hantainia, i vivora tasalana n̄an gaituvwa. Kea vi vwalaunia sibona gin mataisao, atat dodolua rav binihi marahinia. Vi laiḡoḡo dumwira be non tausala, i vi vagahi dumwi.

³Sihav mwin te lavoai waen sage si hav taltale tehe be men bwalo, take mwa du be vi maḡemu i vi lol dum tamwata, mwa hav dorodoron te homu.

⁴Kea vi vora tomuai tavuha vai la imwa, mwa haḡo naturirigi be ram bulbulu gin binihi marahi be nu masiri.

⁵Be atatu vwate mwa hav ilo te halana be vi tomuai ata la imwa kun hanigi. Kun hanigi wani gea vi gitaḡoro uloilua non God?

⁶Take tomuai huri uloilua vi vora atat metuaga sihav vora te malaḡel vuroi lol binihimwasigi garagusi sage kea mwa hav binihi te sagea sibona huribe kea sihav hovi tehe lol gaosani non atmate.

⁷Tomuai lol uloilua mulei mwa du be vi vora atatu be sinombu be ram hav togo te lol uloilua rai vinihi marahinia huribe rasav huriana tehe i nu hav sani tehe alun vidi non Setan.

⁸La hala n̄an gea, ira dikon atatu rav binihi marahinira, rasav vev te avoana be ran hantai. Kera rasav mwin te lavoai waen sage be rav lol ron̄oe be ramen ratahigiga gin hal tentene alun atat dodolua.

⁹Mai binihiv melmelo mwa du be rav huri hal dahuligi alun binihimwasigi garagusi kea be God nu lolia tam iloe.

¹⁰Giv haḡo ron̄ora amua. Vuvuri giv siv lin̄ira be rav lol rovoga kun ira dikon be gisav habwe te vahalana alura.

¹¹La hala n̄an gea, ira vavine mwa du be atatu rav binihi marahinira. Kera rasav vev te bwarebware atat dodolua. Rav vwalaunira sibora, i rav binihimwasiginira lol ginau duluai.

¹²Ira dikon mwa du be vivora tasalara gaitutuvwai n̄ano i rai vora ira tomuai tavuha lalai ira nitura i lalai ata lol imwara.

¹³Kera be ram bora Dikon rav lai binihi marahi nin atat dodolua i rav tu wasi lol nora binihimwasigi garagusi alun Kraes Jisas.

¹⁴Len̄len̄a be nam doronhohov be nav mai abemiu si hav vora te n̄ava, nam rav ginau duluai geki lalainigo kadogaha.

¹⁵Take be ginau vwate vi vahala batena be nam hav mai te radu, vuvuri gaituvwa be nam ravrava, gim ilo halana be giv togo kun be atatu ata lol imwan God. Imwa gea imwa tataro non God be mwa rahu vai tuai, gaitura i bwatutun mwasigi.

¹⁶Tanon binihiv gairuruai sigai, rahuda dahuligi huri gogonai gaivua maragai: Kea nu seserainia lalai gida lol rebehin atatu, nu dovon̄ainia be nu vavtutu lol Vui, i nu gitana gin ira enjel. Kea nu toretore lalainira be ram hav vora te ira varan Israel, binihimwasigi lol ureure, i God mwa lai luau vai amare lol sarisari.