Read Hano 1 Timoti 4 Bible Online

1 Timoti 4 - Hano bible

1 Timoti 4

¹Kadogaha Vui Sabuga mwa bevea mwa melmelo be vai ataguna atatu rituai rav van dagai nin nora binihimwasigi garagusi. Rav huri Vui be mwa dentene i mwa huri silo vagahi non atmate.

²Silo vagahi kunia ram mai nin avoan tentene be atatun tenteneana kera be nora binihiva ram lol kaburainia kun be vat aruaru memea mwa lol kaburai ginau.

³Ram duḡoro sinombu be rasav lagi tehe i ram bevea lalainira be rasav gan ginaganiana rituai be God nu lolira be vi ganiana gin avkari nin sinombu be ram binihimwasigi i ram ilo mwasigi.

⁴Ginau duluai be God nu lolia nu tavuha i kea mwa hav tu tehe be vi varihaiana na ginau vwate kea be mwa laian ḡoḡo lol avkari,

⁵bwatuna be God nu lolia mwa sabuga gin non avoana i gin tataro.

⁶Be goi vev ginau kera geki lalai ira, tua goi vora atatun rovoga tavuha non Kraes Jisas. Avoana ata lol binihimwasigi garagusi vi loligo gov wasi lol binihimwasigi i silo vagahi tavuha be gov huria.

⁷Take gosav huri te vevuri dadaloiga be ram hav dame tehe mai mwasigi non God, take gov vagahigo sibomwa be gov lol rovoga mai God.

⁸Huhui rebehimwa be vi buluigo alun hala rituai take gov lalaḡo lalai God vi buluigo la hala duluai. Bwatuna be vi lai vatavuha lalainigo lol rahuana geki i vai lol rahuana vai tuai.

⁹Hano nam bevea mwasigi, giḡo gov ḡoḡo duluai noḡu avoana.

¹⁰Bwatuna haḡe geki be tam lol rovoga hahavwani; tam doronhohov huri God be mwa dogo vai tuai, kea be varahun sinombu duluai, liuhage kera kebe ram binihimwasigi.

¹¹Gov lai avoan wasi i gov vagahi ginau kera geki.

¹²Gosav lin̄ te atatu be rav gita bahivoinigo huribe giḡo mwalaḡelo n̄ano, take gov vora malele lalai ira atat binihimwasigi lol nom avoana, nom lalaḡova, nom lolotabetabe, nom binihimwasigi garagusi, i lol nom togoan melmelo.

¹³Vaivotu be nav mai be goi vasogo nom Baebol lalai atatu duluai i huri nom toretore i nom silo vagahi lalainira huri ravrava sabuga, vivora muan ginau lalainigo.

¹⁴Batena be ira atatun vevsera ran lai avoana lalainigo i ira tomuai lol uloilua, ran tau limara alun bwatumwa. God nu lai muramura lalainigo be gov lol non rovoga. Gosav mom dau te muramura gea be vi togo bonogai.

¹⁵Mwa du be gov lol rovoga kera gea, i gov tau binihimwa duluai vi tu wasi alun ginau kera gea, huri be sinombu rav gitae be giḡo gom ban rahurahu tavuhai lol rahumwa i lol nom rovoga mulei.

¹⁶Gov gitaḡoro tavuhai alen̄amwa, i avoana be gom do gom laia lalai sinombu. God gov lol silo vagahi be gom bevea. Be gov lolia kunia gov varahu dum muleinigo, maira be ram roron̄tainigo.