Read Hano 2 Timoti 2 Bible Online

2 Timoti 2 - Hano bible

2 Timoti 2

¹Haḡe giḡo Timoti, nituku, gov tu wasi lol hogoi be tan laia lol Kraes Jisas.

²Giḡo gon ron̄oau huba be nan toretore lolmatan sinombu. Gov haḡo wasi ira toretore uhu i gov taua la liman atat tavtavuha be rav toretore dumwi lalai atat dodolua.

³Gov bete lol taro ririhai be gam haḡoe kun atatun bwaloan tavuha non Kraes Jisas.

⁴Atatun bwaloana mwa doron be vi lol samsamwarai non tomuai huria, be ihei tehe be mwa lol rovoga lol tanon bwaloana sihav sabwelei te non taro mai ginau ata vataha gubwen̄i.

⁵Mulei atatun rovoana kea mwa rovo maira be ram rovo, mwa du be vi tabe ira silo duluai. Be si hav tabe te silo, si hav hae te dum sivigi.

⁶Atatun ute loloara be mwa lol rovoga hahavwani huba mwa du be kea muan atatu be vi lai tavwena alun ginaganiana be ran mauri.

⁷Gov vinihi huri hano be nam bevea, bwatun be God vi lai halana be gov ilo halan ginau duluai.

⁸Gov vinihi dum Jisas Kraes, nu tomare nin mateana, kea ata lol imwan Deved. Geki Roroi Tavuha nam doretore huria,

⁹i nam ron̄ ḡagarasi bwatuna Roroi Tavuha, i kadogaha ram bauhiau gin gao talai kun atatun wehi surai. Take silo vagahi non God kea mwa hav togo tehe lol imwa vauvauhi.

¹⁰Kunia inau nam dame gin maḡemu lol taro ririhai kera geki huria be kera be God nu gita luara rav lai dum varahuva gea be mwa du mai Kraes Jisas i mwa lai sarisari be sihav nogo tehe.

¹¹Mwasin avoan vagahi geki: “Be gida tav mate maia, tav rahu mulei ba do maia.

¹²Be tav mahin̄a ḡoro ron̄ ḡagarasi, gida mulei tav gitaḡoro bul maia. Be tav visigai ḡoroe, Kea mulei vi varihai be vi dame ḡoro gida.

¹³Be gida tasav tu te wasigi, kea vi tu wasigi radu, bwatuna be sihav ruruhia te dum sibona.”

¹⁴Gov vagahi rahurahui ginau kera geki, vev daua lalai sinombu lolmatan God be rasav vigaigai te huri ira avoana. Mwa hav bului te ihei, i mwa lol hantainira be ram roron̄tai.

¹⁵Gov lol ron̄oe lolmatan God be vi ron̄ mwandavuha ginigo. Gov mai gi atatun rovoga be gom hav busbusi tehe gin nom rovoga. Gov mai gi atatu be mwa bagahi atatu gin mwasin avoana non God la mwasin halana.

¹⁶To dagai nin avoan dadaloiga i avoan hahantai bwatuna be kunia vi tomuai sinombu hautu dagai nin God.

¹⁷Nora vagahi hantai gea vi ḡun manuga be mwa ḡan kaburai vigohomwa. Atatu gairua be ramuru bagahi avoan hantai geki, Himenaeus mai Viletus kera kunia.

¹⁸Ran derai mwasin avoan vagahi, ram bevea be tomarean mulei nin mateana nu lai tanona huba, i ram lol kaburai binihimwasigi garagusi non sinombu rituai.

¹⁹Take bwatbwatu be God nu taria sihav rihuan te dumwi; ira iha haḡea keragea ram du aluna: “Ratahigi mwa ilo kera be bilana,” i “atatu n̄oto be rai vora bilan Ratahigi rav mambu gin lalaḡov hantai.”

²⁰Lol imwa gaivua aia nu masiri gin beleti mai kasbol. Rituai be nu loliana gin vatan̄oga i vatlegiga, take mulei ginau be nu loliana gin gai i tan merameraga. Ginau rituai nu haḡoana huri raumatan hala, i rituai nu loliana huri rovoga son̄son̄o.

²¹Kera be ram lolira sibora ram melmelo nin Setan, rav haḡoana huri raumatan hala. Kera rav sabuga, rai vora huri Ratahigi, rav lol dautau huri lalan̄an rovoga tavuha.

²²Giv romaragai nin ginau hantai be ira malaḡelo mai ira dadaulato ram doron be rav lolia. Butu wasigi be gov lago bavtutu i haḡo binihimwasigi garagusi, lolotabetabe, i tamwata, bulbulu maira be ram butu alun Ratahigi alolon lolo melmelo duluai.

²³To dagai nin vagaigaian dadaloiga i vagaigaiana hantai, bwatuna be gom iloe be ram mauri vai lol bwaloana.

²⁴Atatun rovoga non Ratahigi sihav vigaigai tehe, take vi maḡemu lalai atatu duluai, vagahi tavuha i ron̄ mwan̄ava.

²⁵Atatun rovoga non Ratahigi vi haḡo sine maḡemu vi vagahira gin maḡemu kera be ram bigaigai. Haḡe God vi lin̄ira rav leahi binihira be rav dame ḡoro mwasigi.

²⁶I rav mamata rav romaragai nin Vidi non Setan, be mwa haḡo dumwira be rav lol hano be mwa doronia.