Read Hano Taetas 1 Bible Online

Taetas 1 - Hano bible

Taetas 1

¹Nin Pol, atatun rovoga non God i hala non Jisas Kraes nu horau be nav huhui ira sinombu gin binihimwasigi garagusi be God mwa ḡita luara i be nai buluira be rav ilo mwasigi kea be mwa seserainia lalai sinombu kunhanigi rav lol rovoga lalai God.

²Binihi mwasigi gea i iloute gea mwa mai nin doronhohov huri rahuana vai tuai, taro mwa siv bwativuga, i God sihav tentene te dumwi.

³La mwasin tarona be nu vavtutu, God mwa lin̄ ureure be vi iloe huri rahuana gea sivi toretore. Nu tau rovoga gea aluku i nan toretore gin avoan ḡaragara non God varahuda.

⁴Lalai Taetus, mwasin nituku lol binihimwasigi be gam betea. Hogoi tavuhai i tamwata nin God Tata i Kraes Jisas varahuda.

⁵Nan derainigo Krit be giv lol dum nogonogoi rovoga be mwa du be vi nogoiana huri be giv gita lua dum ira tomuai, lol ira bwatutun vanua, kunia be nan huhui halana lalainigo.

⁶Tomuai sihav vora te atatu be nu vuroga, tasalana vivora gaituvwa n̄ano, ira nituna atatu binihimwasigi. Take rasav vora te naturigi be ram daha i ram hav bulbulu tehe.

⁷Vwalaua non God tomuai, atatu be mwa hav vuroga tehe be vi lol bwatigoro be vi bugura sage vi lolhoro vilvilehi. Sihav mwin te daltalei waen, be vi doron be men bwalo, sa vi lol ron̄oe be vi rosoga alun hal lete alun atat dodolua.

⁸Tomuai wani be mwa lol vatuvwai be vi lai ḡoḡo tausala, vi tabe havanau be nu tavuha, vi mataisaoga, i vi to bavtutu, vi togo la hala be nu sabuga, vi togoinia sibona.

⁹Vi haḡo batugehi avoana be tanon butuana kea be tam bagahi ginia, tomuai vi bului sinombu gin mwasin silo vagahi i vi seserai dumwia lalainira be ram banburigai mwasin silo vagahi huri be kera ram bahala.

¹⁰Atatu ivusi ram lol ginau deḡeteḡe i ram bev ginau deḡeteḡe, huribe ram binhimwasigi non ira Jius.

¹¹Kera gea rav mambu, bwatuna be ram lol ḡoro atatu duluai gin silo vagahi be rasav vagahi te ginia. Kera ram rosoga gin hal hantai be ram lolia lalai sinombu.

¹²Vwate lol nora atatun vevsera sibora nu vevea be, “Ata Krit, atat tentene, ram dentene tagaro, ram bubugura i ram bwatbwatiḡoruga kun ira ginau rahu turu.”

¹³Avoana be atatun vevsera nu vevea kera mwasigi. Haḡe goi vev wasinia lalainira be kea ram bahala, be rai mai gi atat wasi lol binihimwasigi garagusi,

¹⁴Rasav lai te Israel i avoan wasi non sinombu be ram av doron te mwasigi.

¹⁵Ginau duluai ran melmelo lalainira be ran melmelo; take lalainira be ran masiri gin binihiv hahantai i ram hav binihi te mwasigi, lalainira ginau vwate nu hav melmelo tehe. Binihira mai alen̄ara ran hantai.

¹⁶Ram bevea be ram ilo God, take nora lalaḡova mwa dovon̄ainia be ram hav lai te ḡoḡoe. Kera ram barihai atatu, ram hav roron̄tai tehe, ira atat hahantai huri be rav lol te havanau be nu tavuha.