Read Hano Taetas 3 Bible Online

Taetas 3 - Hano bible

Taetas 3

¹Vev serae lalai ira binihimwasigi be rav binihi marahi ira tomuai be ram haḡo roron̄o ira tomuai be ram muai ḡoro vanua, rav roron̄tainira rav lol vatuvwai be rav lalaḡoi tavuha,

²rasav vev te ginau hantai lalai ihei tehe, rav togo lol tamwata, i rav maḡemu i rav lol alen̄ vavtutu lalai sinombu duluai.

³Amua radui gida mulei tan dadaloiga. Tan dahadaha, tan lol bahala, i tan vora turi huri ginau ivusi be rebehida ran doronira i ran samsamwara ginira. Tan lin̄ rahuda vai lol vahalana i tam binbinihi hantai. Sinombu ran varihai gida, i gida mulei tan varivarihai gida.

⁴Take batena be lolotavuha i lolotabetabe non God varahuda nu seserainia,

⁵kea nu varahu gida bwatuna non sine hagavi. Nu hav vora te bwatun be huri rovoga tavuha be tan lolia haḡe tam bavtutu maia. Nu varahu gida sivi bwaga melmeloi gida gi sinombu gara sivi Vui Sabuga.

⁶God mwa hora non Vui Sabuga gaivua vai aluda sivi Jisas Kraes nonda varahu.

⁷Tam mai bavtutu mai God alun non hogoi, tam lai dum doronhohov be tav lai rahuana be sihav nogo tehe.

⁸Silo vagahi geki mwasigi, i nam doronia be giv ilo tavuhainia huri be sinombu rav ilo tavuhai halan ginau kera geki. Vuvuri kera be ram binihimwasigi alun God rav gitaḡoro be rahura rav lalaḡoi ginau tavuha. Ginau kera geki ran tavuha i rav bului atatu duluai.

⁹Take giv to dagai ninira be ram bigaigai daltale i ram avo alun vevurin vevuri hahantai ata lol imwa i vigaigai i ram biavoavo huri silo. Ginau kera gea mwasira nu sigai i rasav bului te atatu vwate.

¹⁰Atagun muan avoan vavanoi i gairuan avoana, tu dagai nin ihei be mwa bwativuga vigaigaiana.

¹¹Gov ilo dumwia be kera gea atat hahantai be ran masiri gin bwatigoro; Nora bwatigoro sibora mwa dovon̄ainia be ram vahala.

¹²Batena be nam hora Atemas sa Tikikas vai abemwa, gov lol ron̄ hala duluai be goi mai vai abeku Nikopolis, bwatuna be nan binihi tuhi huba be nav to aia lol taron ute hohoga.

¹³Gov lol ron̄ hala duluai be gov bului Senas kea atatun silo i Apolos alun halara huri be rav haḡo dum ginau duluai be ram doronia la halara.

¹⁴Nonda sinombu ran huhuinia be rav lai rahura huri lalaḡov tavuha be mwa lai havanau huri nora togoan tavuha be sihav hantai tehe.

¹⁵Kera duluai maiau ram hora nora avoan helheloi. Giv helheloinira be ram dabe gida lol binihimwasigi garagusi. Hogoi non God vi togo mai kimiu duluai.