Read Hano Hibru 1 Bible Online

Hibru 1 - Hano bible

Hibru 1

¹Tuai maragai huba ira atatun vevsera non God ran avoi seserai non roroi lalai ira sibida la hala ivusi.

²Take la nogonana kadogaha, God nu hora Nituna be vi lai roroi lalai gida. God nu tau ginau duluai gin Nituna, i ginau duluai vai gubwen̄ vwate, vi vora non Nituna.

³I Nitun God mwa haḡo mwasin roron̄o non God i sarisarina duluai, i kea nu ḡun God la hala duluai. Kea mwa haḡo bul ureure duluai, gin non avoan muramura. Ataguna be Nituna mwa dugu kaburai vuroda duluai, kea mwa domahuri la mwatuan roron̄o non God lol ute ata amare.

⁴Kea mwa mai amare liu nin ira enjel, i hano be mwa ihae gin iha roroa liu nin ihara duluai.

⁵God nu hav vevea tehe lalainira ira enjel vwate be, “Giḡo haḡea Nituku, bwatuna garigi Nam bora Tamamwa!” God mwa hav avo te hohoigi lalai enjel vwate ninira kunia be, “Nai vora Tamana, i kea vi vora Nituku!”

⁶I mahavana be God mwa lai mwasin Nituna muai bwana vai lol ureure, kea mwa bevea be, “Nu tavuha maragai be ira noḡu enjel rav hivbwaubwau kera duluai rav gogonainia.”

⁷I mahavana be God mwa avo huri ira enjel mwa bevea be, “Nam leahi ira noḡu enjel ram mai kun lan̄i i ira noḡu turin rovoga kun gabi lua mea.”

⁸Take God nu avo huri Nituna mwa bevea be, “Giḡo mwasigi God, i tanon nom ute Ratahigi Lavoa vi tu vai tuai! Nom muramura gi harahara huri vavtutu.

⁹Gom dabe vavtutu i gom barihai vahalana, i kunia inau, nom God nam ḡita luago. Nam uloi luago i nam loligo gin samwarana liu nin ira nom buluana.”

¹⁰Ravrava Sabuga mwa bevea mulei be, “La bwativuna God, giḡo n̄an gaituvwa be, gon tari bwatbwatun ureure i gom dau ureure duluai.

¹¹Rai mataltala i rai boboga kaburai kun ira gaisaga, take, giḡo gov togo vai tuai.

¹²Gov tan̄ora kun gao, i gov leahira kun gaisaga Take giḡo goi vora kunia vataha mahavana, i gov togo vai tuai.”

¹³God nu hav vevea tehe lalai non ira enjel vwate be, “Gov togo la mwatuaku vaivotu be nav tau nom ivwalu gi tanon vavarahin bwalagemwa!”

¹⁴Ira enjel havanau? Enjel kera n̄an ira vui gabe mwa horara be rav lalaḡo lalai sinombu be rav lai varahuva.