Read Hano Hibru 10 Bible Online

Hibru 10 - Hano bible

Hibru 10

¹Silo be God nu laia lalai Moses, kea vorate nun tavuha huri mwasin ginau be ram dogo, i ran hav melmelo te tavuha kun mwasin ginau mwasigi be rav mai. God vataha taulu ira tataroi ram lol tataroi la hala gaituvwa n̄ano be rav lai lua vuron atatu. Take la hala geki silo geki si hav lol te dum atatu be ram mai aben God be rai vavtutu.

²Atatu be ram ḡogonai God la hala geki ran hav melmelo tehe la lolmatan God. Ran vahala radu lol nora bwatigoro. Be ras melmelo tavuhai, mwa hav tu tehe be rav lol tataroi be vi lai dagai vurora.

³Take vataha taulu ira tataroi geki ram lol atatu ram binihi dum vurora,

⁴huribe dagan buluki i nani si hav lai te dagai vuron atatu gubwen̄ vwate.

⁵Bwatuna ginau kerageki, amua Kraes mwa lol vatuvwai be vi mai lol ureure, mwa bevea lalai God be, “Gom barihai be atatu rav lol hogoi i tataroi tuntun, take gom lol vatuvwai rebehiku vwate huba.

⁶Gom hav samsamwara tehe gin alen̄a be ram lol tataroi tuntun la olta be ramen lai dagai vurora.”

⁷Kraes mwa bevea mulei be, “God nam lol vatuvwai be nav lol hano be gov vevea, kunia be ran ravae lol nom bukan silo.”

⁸Muana mwa bevea be, “Gom barihai be atatu ram lol hogoi i tataroi tuntun lalainigo. Gom hav samwara tehe be ram dun sipsip be men lai dagai vurora.” Ginau kerageki be atatu ram lolia ran vavtutu mai silo take God mwa hav ron̄ te mwandavuha gin ginau kerageki.

⁹Ataguna Kraes mwa bevea be, “God nam lol vatuvwai be nav lol hano be gom doronia.” La avoana geki mwa lai dagai alen̄ ata tuai huri tataroi tuntun mai hogoi i mwa dau alen̄ gara aluna.

¹⁰La alen̄an tataroi tuntun gara God mwa lin̄ Jisas Kraes be men mate vatuvwa n̄ano be men lol gida tam melmelo, tam sabuga, kunia be mwa doronia.

¹¹Vataha gubwen̄i ira tataroi non ira Jius ram lol nora rovoga be vaivusi ram lol tataroi la alen̄a n̄an gea. Take alen̄a gea sihav lai te dagai vuron atatu.

¹²Take Kraes mwa lin̄ rahuna be men lai dagai vuron atatu duluai. I alen̄a be mwa lolia be mwa mate vatuvwai mwa lai dagai vuron atatu vai tuai be si hav nogo tehe dumwi. Ataguna mwa dogo mahuri la mwatuan God.

¹³Mwa hohovi aia vaivotu God vi lol ira ivwalu rav togo halaten bwalagena.

¹⁴La tataroi tuntun gaituvwa n̄an gea Kraes mwa lol atatu duluai ram sabuga i ran vavtutu duluai, i gov togo kunia vai tuai.

¹⁵I Vui Sabuga mulei mwa bev lua ginau kerageki lalai gida, Ratahigi mwa bevea be,

¹⁶“Lol taro be vi mai tatauleo gara geki be nav lolia mai noḡu sinombu nav tau noḡu silo lol irubwira i nav taua lol binihira.”

¹⁷Mulei be Ratahigi mwa bevea be, “Nasav vinihi te dum kaburai vurora, nam lai dagai vurora, i nav vinihi malioi ira vuro keragea.”

¹⁸Lol taro be God mwa lai dagai vurora, mwa hav tu tehe be atatu vi lol tataroi tuntun lalai God be men lai dagai vurora.

¹⁹Ira tuaku, bwatuna be Jisas nu mate huri gida, kadogaha tan dadariha be tav haroro lol vawavwana be Ute Sabuga Liu.

²⁰Jisas mwa havan̄ hala gara vwate huri gida huba. Kea n̄ano hala i rahuana kunia be mwa sivi gavu be nu tuḡoro vwavwana be nu Sabuga be nu Sabuga Mutai.

²¹Kadogaha Jisas mwa mai gi nonda vagahi gaivua be mwa ḡitaḡoro gida.

²²I huri ginau geki nu tavuha be tam mai sosori aben God be binihinda vi melmelo i nonda binihimwasigi garagusi ran wasi. Amua binihinda ran bibili gin vuroda, mwa melmelo be tam ḡagaru lol wai melmelo.

²³Tav haḡo wasi nonda doronhohov be tav bev luae, bwatuna be tam dau nonda butuana alun God be vi haḡo batugehi non tatauleo.

²⁴Nu tavuha be tav binbinihi huri gida gaitutuvwai be tav bulubului gida be vi lol gida tav wasi be tav bului atatu i be tav lol alen̄ tavuha.

²⁵Tasav lin̄ te ḡoḡoana lol imwa tataro kunia be rituai ram lolia. Ninia gea tav turatura gida gaitutuvwai tagaro, bwatuna be gubwen̄in Ratahigi mwa abena be men mai.

²⁶Tam ilo ginau duluai be mwasigi. Be tav vuroga vataha gubwen̄i i tam hav haḡo te wasi mwasigi, tataroi tuntun vwate sigai be nu dadariha be vi lai dum dagai vuroda.

²⁷Tav matagun God n̄ano i tav hohov vevegi be vi mai kun gabi gaivua be mwa lol oda kaburai kera be ram bwalo mai God.

²⁸Be atatu vwate vi n̄andu silo be atatu gairua sa gaitolu ram dame be nu vahala rav vevegia i rav wehi bamatea be sine hagavi sigai.

²⁹Ke kun hanigi huri atatu be mwa lai binihiv hantai huri Nitun God? Binihin atatu kera gea mwa hantai huri dagan tatauleo non God be vi lol dum melmeloinira nin vurora? Ram bevea be daga gea kea ginau vuroi n̄ano i ram av hantai vai alun hogoi non Vui Sabuga? Atatu gea non vevegi vi wasi liu!

³⁰Tam iloe be God mwa bevea be, “Alen̄ rabaraba mwa dogo maiau i inau n̄ano be nai vol muleinira.” I mulei God mwa bevea be, “Inau Ratahigi i nai vevegi ira atatuku.”

³¹God gea mwa rahu vai tuai i tuai i be tav ḡao lol limana be vi vevegi gida, kea ginau matagui vwate be nu hantai maragai.

³²Nu tavuha be giv togo ba binihi mulei huri gubwen̄i amua be ran ḡao huba be rahun God nu votui kimiu. Gin habwe taro ririhai ivusi take taro keragea ran hav tau te kimiu ata.

³³Gubwen̄ rituai ram bev bwarebware kimiu lolmatan atatu i ram lol bwarebware kimiu.

³⁴Gom bului atat binhimwasigi be ram dogo lol vauvauhi. I lol taro be atatu ram mai ram lai dagai nomiu vataha ginau take kimiu gim samsamwara n̄ano, huribe gim iloe huba be nomiu vataha ginau rituai ram dogo be ran tavuha liu, i be rasav van te dagai nin kimiu.

³⁵I huri ginau geki mwa du be giv tu wasigi huribe tavwemiu gaivua mwa dogo be giv laia.

³⁶Giv lin̄ maḡemu, bwatuna giv lol hano be God mwa doronia i giv lai havanau be God nu tatauleo be vi laia lalai kimiu.

³⁷Baebol mwa bevea be, “Lol taro vwelvwele n̄ano wani gea be vi mai vi visirai, i ginau vwate sigai be vi tuḡoroe.

³⁸Ira noḡu atat vavtutu rav vinihimwasigi i rav rahu. Take be vwate alolora vi van burigai nasav ron̄ te mwandavuha ginia.”

³⁹Take gida vorate atatu kunia be tav van burigai, ba sala. Gida atatun binihimwasigi garagusi alun God i kea vi varahu gida.