Read Hano Hibru 12 Bible Online

Hibru 12 - Hano bible

Hibru 12

¹Gida sinombu ira atatu gabe ira gaitura non God ram du dalis gida, gabe tatan̄ana gabe ram du dalis gida gaivua maragai. Haḡe bwatuna gea, tav derai ginau duluai gabe ram duḡoro gida, i bwatigoro gabe ram haḡo wasi gida, i gida tav lol binihinda vi wasi, la hala gea be mwa du lol matada.

²Matada vi tutu alun Jisas vataha mahavana, huria be alen̄an nonda binihimwasigi garagusi nu mwalue n̄an ninia, i nu bwativuga la vavorana vai votui nogonana. Mahavana be nu hae be men mate la volovolo, nu hav derai te dagai hala gea. Nu gita batoia, be kea vi ron̄ mwa davuha nu hav mom binihia tehe be non duleana la volovolo gea vain busbusiana lalainia, kea nu samsamwara n̄ano. I kadogaha, kea mwa dogo lol ute ata amare la mwatuan Tanon togotogon Ratahigi God.

³Nu tavuha be kimiu giv vinihi dum taro ririhai duluai be nu dumwia, gabe ira tomuai lete ran tomare ram ban burigainia. I kunia nomiu binihiva si hav hovi tehe take giv tu wasigi lol nomiu binihimwasigi garagusi.

⁴Alun rahumiu be gin bwalo ḡoro bwatigoro, vwate nin kimiu mwa hav mate te radu.

⁵Bisata gin binihi malioi avoan dura gea be mwa eno lol buka Baebol. I God nu avo lalai kimiu kun gabe kimiu haḡea mwasin ira nituna? “Nituku, giv roron̄tai batena be nai vevegi kimiu, i binihimiu sihav hovi tehe batena be nam nav av surasurai kimiu.

⁶Huribe Ratahigi vi vevegi dumwira be nam dabe maragainira, i vi vevegi dumwira be mwa bevea be ira nituku.”

⁷Ginau duluai gabe mwa dum rebehimiu i rebehimiu mwa ron̄ ḡagarasi ginia, kimiu giv laia kun gabe silo vevegi gabe God Tata mwa laia lalai kimiu. Alen̄a gea mwa seserainia be God mwa lolia kunia lalai kimiu kun gabe mwasin ira nituna. Mwahav eno tehe hohoigi be naturigi vi togo n̄an kunia be tamana sihav vevegia tehe lol mahavana hovita.

⁸Be God sihav lol te alen̄a gea lalai kimiu, kun gabe mwa lolia lalai ira nituna, kea gin binihiva be kimiu gin hav vorate ira nituna, take ira nitun hala n̄ano.

⁹Hurin alen̄anda atatu, ira tamanda ram lai silo vevegi lalai gida, i gida tam bavora tam binihi marahinira huria. Take kunhanigi huri tamanda be mwa dogo amare? Gida tav vinihi marahinia i tav gogonainia liu ninia be tam ḡogonai tamanda ata lol ureure geki, i kunia gida tav lai rahuana.

¹⁰Ira tamanda ata lol ureure geki, mahavana be ram lai silo vevegi lalai gida, ram lolia huri mahavana vwelvwele n̄ano, dadariha mai nora iloute. Take God Tata mwa bevegi gida huri be men vavtutui gida, i tav bulu dum maia be tav gogona, kunia be kea nu gogona.

¹¹Gida tam iloe huba, be God mwa bevegi atatu vwate, silo vevegi gea sihav lol te atatu gea be vi ron̄ mwandavuha, take vi lolia vi ron̄ mwahantai. Take ataguna kera gabe God mwa bevegira, be men vavtutuinira, rav habwe vwain non silo vevegi. I la lolmatan God rahura vi togo bavtutu i vi togo tamwata.

¹²Haḡe bwatuna gea, kunia gabe buka Baebol mwa bevea be, “Kimiu giv rihui bwaumiu be ram rihu holhole rav rihu wasi mulei.”

¹³Nomiu lagoana vi vavtutu n̄ano la hala be nu tavuha. I be sivora bwalagemiu be si hantai, kun be bwau mwa ban burigai, ta kea vi tavuha n̄an mulei dumwi.

¹⁴Giv lol ron̄oe be giv togo lol tamwata lolmatan sinombu, i giv togo lol rahuan gogona. Be gosav haḡo te alen̄a geki, gosav gita te dum God.

¹⁵Giv gitaḡoro tavuhai kimiu be vwate nin kimiu sihav taleva tehe, be men van dagai nin hogoi non God. Gosav vora te kun bwatun vutu be mwa mauri i mwa mai gi gai garagara.

¹⁶Giv gita ḡoro tavuhai be vwate nin kimiu sihav vora te kun Iso, be rahuna nu hav vavtutu tehe, i mwa hav vinihi te dum God mulei. I kea mwa salei non tanon tuagai mai non roso. Take volin non tanon tuagai mai roso duluai gina ganiana n̄an vuroi, be kea nu gania vatuvwa mamaha.

¹⁷Tam ilo vevuriana be ataguna gea mwa doron be men lai mulei non tanon tuagai, i kea mwa ḡari maragainia be vi leahi hala gea be nu salainia huba, i kea mwa dan̄ihi maragainia, take sigai. I non hala gea nu lolia huba mwa du ḡoroe sibona.

¹⁸Gin hav mai tehe vai lol ute kun vusi Saenae be tam ḡitae i tav sibweri dumwia. Aia gabi tabwalue, dodo meto, sage siritano,

¹⁹kera ram ron̄ silon taiva be mwa datan̄i. Sinombu ata Israel ram ron̄ silo vwate mwa avo, take ram bevea be vi mambu

²⁰bwatuna be kera ram birururu maragai gin avoana gea be mwa bevea kunia be, “Ginau rahu vwate vi votui vusi geki, ta kimiu duluai giv vohae gin vat lalavoa vava vi mate.”

²¹I mahavana be Moses mwa gitae kunia mulei mwa ron̄ mwahantai maragai, i mwa bevea be, “Inau nam matagu maragai, i nam birururu huria.”

²²Ta kimiu gin hav ḡao tehe habwe ginau kungeki i gin mai la vusi Saeon, i la bwatutun vanua gaivua gea vanuan God rahu be sihav mate te dumwi. Geki Jerusalem ata amare, mai ira enjel sinombu ram ḡoḡo bulbul abena.

²³Kimiu gin mai lol samwaran bulbulu be nu tavuha maragai mai ira atatu non God kun gabe ira nituna muai bwana gabe ihara mwa du huba lol ute ata amare. I kimiu giv mai huri God huria be kea vi vevegi lalai atatu, i giv mai ba bulu mai vuin ira atat vavtutu be ran mate huba.

²⁴Giv mai huri Jisas, gabe kea atatu be vi tari mulei Tatauleo gara non God. I kimiu giv mai alun dagan Jisas gea gabe nu lol melmeloi kimiu, gabe mwa bev lua ginau gabe ran tavuha liu, ninia gea be dagan Ebol mwa bev luae.

²⁵Giv gitaḡoro, huria be gisav roron̄tai te God gabe mwa avo mai kimiu. Ata tuai be ran sin̄ohi bwerora be rasav ron̄ te roroi non God rasav habwe te dum hala vwate be rav romaragai. I kadogaha be tasav ron̄ te silon God be avo mai gida nin ute atamare, gida mulei tasav habwe te dum hala be tav romaragai.

²⁶Muana tuai, avoana non God gea nu lol ureure mwa ruru, take garigi mwa datauleo lalai gida be, “Nav lol tano vi ruru mulei varuana mai mahao mulei.”

²⁷Avoana gea be God mwa bevea be, “Vi vora vatuvwa mulei,” kea mwa lolia mwa seserainia mwa melmelo be God mwa bevea huri ginau ata lol ureure geki be kea nu taua. Kea vi lol ginau kera gea rai virururu, i vi lai dagainira. Take ginau kera gabe rasav virururu te dumwi, ginau n̄an kera gea rav tu dumwi.

²⁸Huri ginau kera gea tav avkari God, huri be mwa lai gida tam mai, i kea mwa bora nonda Ratahigi Lavoa. I kea Ratahigi Lavoa be non muramura sihav nogo te dumwi. Nu tavuha be tav gogonainia la hala be kea mwa samsamwara ginia, i be tai vinihi marahinia, i mulei tai mataguinia,

²⁹bwatuna be nonda God kea kun gabe gabi gaivua be vi oda kaburai vataha ginau.