Read Hano Hibru 2 Bible Online

Hibru 2 - Hano bible

Hibru 2

¹Gida tav tari nonda butuana duluai alun havanau be mwa bevea lalai gida, huri be tasav sala tehe.

²Roroi gabe ira enjel ran seserainia, mwa seserainia be mwasigi, i ira hei gabe ram dahae i ram barihainia, rav habwe silo vevegi kun gabe vi vevegira.

³Be gida tas varihai hal gaivua geki huri halan varahuva, i kunia tav lol haninia be tamen romaragai nin silo vevegi? Ratahigi sibona kea muana be nu vevea huri varahuva, i sinombu gabe ran ron̄ roroi lol taro gea mwa seserainia lalai gida be mwasigi.

⁴God sibona nu seserainia be non roroi mwasigi, ginia be mwa lol ira ginau dan̄an̄a i tagaro gin non muramura duluai. I mwa hogoi non Vui Sabuga mulei lalai ira hei tehe gabe mwa uloinira huria.

⁵Tam iloe be God nu hav tau te non binihiv dau huri ureure aten muramura non ira enjel.

⁶Lol ute vwate lol Ravrava Sabuga, atatu vwate mwa bevea lalai God be, “Havanau mwa loligo be gom ḡita ḡoro kamai atatu? Hurihano gom lai binbinihi alumai ira mandamanda?

⁷Gom lol kamai gam dogo hivhivo halaten ira enjel huri mahavana vwelvwele. Take gom lai binbinihi radu lalainira gin roron̄o i binihi marahi.

⁸I gom dau ginau duluai aten nomai muramura!” God gom dau ginau duluai halaten nomai muramura i gon hav vahal te ginau vwate halaten nomai muramura. Take gam hav gita te dum n̄oton̄otoe radu be ginau duluai halaten nomai muramura.

⁹Havanau be gam ḡita dumwia kea Jisas, huri mahavana vwelvwele kea nu togo hivhivo halaten ira enjel. Gin sine hagavi non God lol non hogoi, Jisas mwa mate huri atatu duluai. I kunia be Jisas nu ron̄ḡagarasi i mwa mate huba, kea mwa lai tanoi haehae mai gai sosorin bwatu!

¹⁰Ginau duluai bilan God, i nu tau ginau duluai halaten non muramura. God nu lol mwasin ginau mahavana be nu lol Jisas mwa bavtutu gin ron̄ ḡagarasi, i rav lai ira naturirigi ivusi be rav lai sarisari non God. Huribe Jisas haḡea mwa domuainira be rav bulu lol non varahuva.

¹¹Jisas mai sinombu gabe mwa lolira ram sabuga, kera duluai ram bora vara gaituvwa. Bwatuna haḡea kea mwa hav busbusi tehe be men uloinira be ira tuana mai ira hogosina.

¹²Vaivotu mwa bevea radu lalai God be, “Nai vev ihamwa lalainira i lol iboi roroai lalainigo mahavana be ram mai ute gaituvwa huri gogonaiana.”

¹³Kea mwa bevea mulei be, “Nav tau noḡu butuana alun God.” Haḡe mwa bevea be, “Inau teti mai sinombu God mwa laira lalaiau.”

¹⁴Kamai sinombu lol rebehi i daga. Bwatuna haḡea Jisas mwa bora kun kamai vwate. Kea nu mate huri be vi lol kaburai atmate, kea nu muramura ḡoro mateana.

¹⁵Take kea nu mate mulei huri be men varahu gida duluai be tam dogo lol mataguanan mateana vataha gubwen̄i.

¹⁶Vi melmelo lalai gida be Jisas nu hav mai tehe be men bului ira enjel, take nu mai huri be men bului ira varan Ebraham.

¹⁷Kea vivora gida vwate huria be vi lol rovoga lalai God kun gabe nonda muai tataroi rahurahu i mwa dataroi ginia sibona huri tugu kaburai nonda bwatigoro.

¹⁸I kadogaha be kalkaliana i ron̄ gagarasi nu dum Jisas, kea vi bului dum ihei tehe be kalkaliana mwa dumwia.