Read Hano Hibru 3 Bible Online

Hibru 3 - Hano bible

Hibru 3

¹Ira tuaku mai ira hogosiku, God nu uloi lua gida huba. I Jisas kea atatu vwate be God nu uloi luae, be vi vora hala i muai Tataroi lalai gida be tam haḡo binihimwasigi garagusi.

²Kea nu tau non binihimwasigi alun God gabe nu uloi luae huri rovoga geki, kunia be Moses nu lalaḡo bavtutu lalai God alun non rovoga lalai sinombu non God.

³Tanon roroa mwa dogo alun wani be mwa haḡo imwa, liu nin imwa be mwa haḡoe. Haḡe la hala n̄an haḡea mulei kunia Jisas nu marahi la tanon binihi marahi roroa liu nin Moses.

⁴Atatu ran haḡo imwa, take God n̄ano mwa haḡo ginau duluai.

⁵Moses nu vora atatun rovoga tavuha lol imwan God, i nu vev serae huri havanau be God vi vevea vainon̄oiha.

⁶Take Kraes, kea nitun God, i mwa binihi garagusi be vi gitaḡoro la imwan God. Batena be tav binihimwasigi wasigi alun God, i tam dau nonda binihiva mwa du wasigi aluna, gida tam mai gi imwan God.

⁷Huri ginau gea, vi ḡunia be Vui Sabuga mwa bevea be,

⁸“Be kimiu giv ron̄ silon God gisav mom lol te bwatwasi kun ira sibimiu ran lolia tuai be gin tomare gim ban burigainia, i gim lol ron̄oe la vanua vuroi.

⁹God mwa bevea be, ram ban burigai maragaiau i ram hav doron tehe didi huriau, gaituvwa n̄an be ran gita havanau be nan lolia lalainira huri taul n̄avul gaivasi.

¹⁰Haḡe kunia inau nam lol horoi sinombu keragea i nam bevea be kera gea ram daltale lol nora binihiva i ram hav doron tehe be rav huri noḡu silo.

¹¹Inau nam lol horo i nam av garagara gin tatauleo wasi be, kera gea rasav haroro te dum bul maiau lol tanon mambuharai!”

¹²Kimiu ira tuaku mai ira hogosiku. Giv gitaḡoro be vwate nin kimiu lolona sihav masiri tehe gin binihiv hahantai, i kea sihav binihi te mwasigi God rahu, i kea vi taleva ninia.

¹³Kimiu gisav lolia te kunia. Avoana gea be mwa bevea vataha gubwen̄i be, “Garigi” mwa lulu aluda siboda, i kimiu giv avoinia lalai kimiu sibomiu huria be nomiu binihiva sihav hovi te dumwi. Hala n̄an gea be vi lol wasi kimiu huria be vwate nin kimiu sihav hovi tehe lol bwatigoro la alen̄ana be nu wasi.

¹⁴I gida duluai tam bulu alun rovoga non Kraes la bwativuna huri be tav haḡo te dum alun udun tatauleo non God vai votui nogonana.

¹⁵Geki haḡea havanau gabe ravrava sabuga mwa bevea be, “Garigi be kimiu giv ron̄ silon God, gisav mom lolia tehe kun ira sibimiu gabe ran lolia tuai, gabe ran tomare ram ban burigainia.”

¹⁶Ira hei haḡea be ran ron̄ avoana non God ram ban burigainia? Geki kera gabe Moses nu tomuai luara nin Ijip.

¹⁷Ira hei mulei gea be God nu lol horoinira huri taul n̄avul gaivasi?

¹⁸Ira hei gea be God nu lol non avoana wasi lalainira mwa bevea be, “Kera gea rasav haroro te dumwi vai lol tanon mambuharai abeku.” Geki kera n̄an haḡea gea be ram domare ram ban burigainia.

¹⁹I gida tam ḡita batoia be kera gea rasav haroro te dum aben God lol ute gea, huria be ram hav vinihi te mwasiginia.