Read Hano Hibru 7 Bible Online

Hibru 7 - Hano bible

Hibru 7

¹Melkisidek kea ratahigi lavoa la vanua Salem, i kea Tataroi non God Holomare. I ataguna be Ebraham mwa bwalo mai ira ratahigi lavoa vuvuri mwa dabagilu, i aia Melkisidek mwa habwea i mwa batavuhainia.

²Haḡe Ebraham mwa hara non viloḡoana la tatan̄ana han̄vulu i mwa lai tatan̄an vwate lalai Melkisidek. (Iha gea Melkisedek, binihivanana be, “Ratahigi Lavoa huri alen̄ vavtutu,” i ihana mulei vwate ram bevea be, “Ratahigi Lavoa huri Salem,” gin binihivanana be, “Ratahigi Lavoa huri tamwata.”)

³Avoana vwate mwa hav ravana tehe huri tamana mai ratahina, sage tuagana sage sibina, sage be nu vora aia, sage ute be nu mate aia. Kea kun nitun God, i nu togo lol tanon tataroi ḡaoḡao mosmosianana sigai.

⁴Giv vinihi Melkisidek gea, be kea atat lavoa liu. Itake Ebraham gabe nonda bwatmetua tuai gea, nu hara ginau duluai be nu laia lol bwaloana tatan̄an han̄vulu, i nin tatan̄ana kera gea nu lai vwate lalai Melkisidek.

⁵Ira lalaḡo duluai ata la varan Livae be Silo mwa domuainira be rav lai ram hara bilara ginau duluai la tatan̄ana han̄vul gaitutuvwai nin ata Israel nora atatu n̄ano len̄len̄a be kera mulei varan Ebraham.

⁶Take kadogaha Melkisidek kea mwa hav vora te ata la varan Livae vwate, take mwa lai tatan̄an gina ganiana non Ebraham gea i mwa batavuhai Ebraham gea be God nu lai tatauleo duluai lalainia.

⁷Kadogaha mwa melmelo tavuhai be atatu be mwa batavuhaiau, atatu gabe ihana nu lavoa vi vatavuhai atatu be mwa dogo gin alen̄a hivhivo.

⁸I ira tataroi be ram dogo ram lai tatan̄an gina ganiana kera gea, kera atat vuroi i rav mate dumwi. Take Melkisidek gea be mwa lai tatan̄an gina ganiana gea, kea atatu gabe buka Baebol mwa bevea be, mwa rahu mwa dogo.

⁹Bisata tai vev dumwia kunia be, tuai mahavana be Ebraham nu vol tatan̄an gina ganiana gea lalai Melkisidek, kun gabe Livae mulei nu lai tatan̄an ginaganiana gea mulei lalainia.

¹⁰Take lol taro gea be tuai, Livae nu hav vora te radu. Kea ata la varan Ebraham vwate be nu vora atagu radui, ta huria be kea varan Ebraham, i mahavana be Ebraham mwa lai silo gogonai lalai Melkisidek kun gabe Livae mulei mwa lai silo gogonai lalainia.

¹¹God mwa lai non silo lalai ata Israel huria be varan lalaḡo be mwa mwalue nin varan Livae mwa du huba be men lalaḡo hurin alen̄ana. Take ira tataroi kera gea ran hav dadariha tehe be rav lol atatu rav vavtutu lolmatan God. Haḡe bwatuna be ira tataroi kera gea ran hav dadariha tehe, mwa du be lalaḡo vwate vi mom mai be nu hav ḡun te Eron n̄ano, take kun Melkisidek.

¹²I mahavana be lalaḡo gea mwa mwalue nin vara dolua, kunia mwa du be silo mulei gea vi leahi.

¹³Take kadogaha nonda Ratahigi Jisas, gabe avoana gea mwa bevea huria, kea nu mwalue nin vara dolua vwate. Take atatu vwate n̄an sigai la vara gea be men mai gi muai tataroi.

¹⁴Atatu ram iloe huba be kea nu mwalue nin varan Juda. Take Moses nu hav avo te n̄an haḡea huri vara gea tuai, mahavana be nu to mwa avo huri rovoga non ira tataroi.

¹⁵I kadogaha avoana gea mwa melmelo liu, huria be lalaḡo vwate be nu haḡo alen̄an Melkisidek.

¹⁶Kea mwa hav haḡo te rovoga non lalaḡo huri silo gea be mwa dovon̄ainia be varan ira tataroi. Kea mwa haḡo rovoga non lalaḡo huri muramuran rahuna gea be sihav nogo te dumwi.

¹⁷Bwatuna be lol buka Baebol mwa bevea be, “Giḡo tataroi kun tataroi gea Melkisidek vai tuai.”

¹⁸Avoana geki mwa lai dagai avoana gea gabe nu togo amua, bwatuna be nu hav muramura tehe, i sihav lol te dum ginau vwate.

¹⁹Silo non Moses gea nu hav dadariha te dumwi be vi vavtutui ginau vwate be nu vavtutu. Take kadogaha alen̄a vwate dolua be nu tavuha nu visirae huba, huria be tav tau nonda doronhohov wasigi aluna. I alen̄a gea mwa do mwa lai gida tan mai sosori gin God.

²⁰God nu lol non tatauleo wasi vwate tuai. Mahavana be kera dodolua tuai ran vora tataroi kea barabe nu lol tatauleo wasi kunia.

²¹Take Jisas nu mai gi tataroi, huri avoana gea be God nu lolia nu mai gi tataroi, huri avoana gea be God nu lolia nu lolia nu wasi huba gabe buka Baebol mwa bevea be, “God nu lol non tatauleo wasi huba, kea sihav leahi te dum non binihiva. ‘Giḡo gov haḡo rovoga non tataroi vataha mahavana, mosmosianana vi sigai.’ ”

²²I tatauleo gea be Jisas nu laia nu visirae lalai gida, nu tavuha liu nin ira tatauleo ata tuai.

²³I ginau vwate mulei be nu hav vora te kunia. Muana tuai kera gabe ira tataroi kera ivusi, bwatuna be kera atatu n̄an vuroi, i rav mate dumwi, i kunia rasav haḡo te dum nora rovoga huri mahavana n̄ava.

²⁴Take Jisas mwa do rahui, i sihav mate te dumwi. I mulei kea sihav lai te dum non rovoga gea be tataroi lalai atat dolua.

²⁵Haḡe bwatuna gea, mwa dau bwatuna garigi vaivotu mosmosianana sigai, kea vi varahu dumwira gabe ram huria, huria be rav hae dum aben God. Huria be kea vi rahu vai tuai, i vi tu vai tuai la lolmatan God, i vi tataroi hurira.

²⁶Jisas mwasigi nu votui tovtovo huri nonda muai tataroi. Kea atat vavtutu be non vahalana sigai, i ginau vwate nu hav lol te hantainia. Kea gaituvwa dolua nin atat hahantai, i God mwa daria haehae liu ninira duluai be ram dogo lol ute atamare.

²⁷Kea nu hav vora te kun ira muai tataroi dodolua be ran wehi sipsip vataha gubwen̄i be vi lol melmeloinira nin vurora amua, i ataguna rav siv wehi sipsip huria be vi lai dagai vuron sinombu dodolua. Hala gabe tataroi dodolua ran lolia kunia, Jisas nu nogoi nona la hal maron̄ron̄o vatuv mamaha n̄ano, mahavana be nu mahin̄ainia be men mate huri be vi lai dagai vuron sinombu.

²⁸Silo non Moses nu tari atatu lol taro gea ram bora muai tataroi, i be kera sibora nora muramura sigai i ram buroga dumwi. Take avoana non God gea be mwa mai atagun silo, i be God mwa bev ihana huri be vi lol wasinia, avoana gea mwa dari nitun God gea, gabe God nu lol bavtutui tavuhainia huba, be vi togo kunia vai tuai mosmosianana vi sigai.