Read Hano Jemes 1 Bible Online

Jemes 1 - Hano bible

Jemes 1

¹Inau Semes atatun rovoga non Ratahigi i Jisas Kraes: Avoan helheloi i mwa bano lalai sinombu non God be ram du vataha ute lol ureure.

²Ira tuaku lol taro be gim dogo ririhai giv masiri gin samwarana,

³bwatuna be gim iloe be taro ririhai geki ram haḡo ron̄ nomiu binihimwasigi garagusi, i geki vi lai ron̄ mwan̄ava.

⁴Lol taro be atatu ram lol gita rahumwa gov seserai ron̄ mwan̄ava. Vuvuri gov vavtutu tavuha i vi haraharai i gov haḡo ginau duluai be gom doronia.

⁵Take be ihei mwa doron mataisao vi hudali God huria. Kea nu maḡemu i samsamwara be vi laia lalai sinombu, i kea vi laia lalainigo mataisao.

⁶Take batena be gom hudali God mwa du be gov binihimwasigi take gosav binihi te gairuruai. Atatu be mwa binihi gairuruai kea kun navo lol tahi be lan̄i mwa hereinia.

⁷Atatu be ram binihi gairuruai, ram binihi ginau gaivua vaituvwa, rasav vinihi tuhi te dum huri hano be ram lolia. Rasav vinihia tehe be God vi lai ginau vwate lalainira.

⁹Ira binihimwasigi be ira hiru mwa du be rav ravwega, bwatuna God mwa lolira ram ratahigiga lol vui.

¹⁰Kera be ram rosoga mwa du be rav ravwega, bwatuna God nu seserainia lalainira be ram hiruga lol vui. Ira roso rav mate kun virangai lol mwanea.

¹¹Alo mwa domare mai hahavwan wasi mwa lol ririvuana ram ḡoru. Virangai ram hovi i gulina nu vano. La hala kunia atat rosoga rav mate lol taro be ram ḡitaḡoro radu nora rovoga.

¹²Taro be sinombu kalkaliana mwa haḡo ron̄ora ram du wasi rahurahu, mwa du be rav samwara. Ataguna be ram seserai nora binihimwasigi God vi tavwera gin rahuana vai tuai. God nu tatauleo lalainira duluai be ram dabea.

¹³Lol taro be sinombu ram do lol kalkaliana rasav vevea tehe be God mwa ḡaliau, “Hantai sihav ḡal te dum God,” i God sibona mwa hav ḡal te ihei.

¹⁴Take sinombu ram lai kalkaliana batena nora doroniva sibora mwa domuainira i ram vidi aluna.

¹⁵Doroniva uhu mwa mauri i mwa lai mateana.

¹⁶Ira tuaku be nam dabe kimiu gisav vora te kun taltaleana huria.

¹⁷Lalaḡov tavuha duluai i hogoi tavuha duluai ram mai nin God. Ginau tavtavuha keragea ram mai nin God be nu lol alo, vula, ira visiu, i kea mwa hav leahi tehe kun gigitan ginau keragea be ram leahi.

¹⁸God nu vinihi tuhi be vi lai rahuana sivi avoan mwasigi be tai vora raumatan ginau duluai lol ginau duluai be nu lolia.

¹⁹Ira mwasin tuaku be nam dabe kimiu, mwa du be gov roron̄tai i gov maḡemu lol avoana. Gosav lolhoro te vilvilehi,

²⁰bwatuna be lolhoro si hav bului te dum rahumwa be vi vavtutu kunia be God mwa doronia.

²¹Vuro i alen̄ deḡeteḡe gov tau dagainia nin rahumwa. Gin ron̄ maḡemu gov lai ḡoḡo silo vagahi non God i gov rivua lol irubwimwa. Silo vagahi geki vi varahu rahumwa.

²²Gov lol hano be silo vagahi non God mwa bevea; batena be gom roron̄tai gom hav lol te ginau vwate huria, gom dentene lalainigo sibomwa.

²³Kera be ram ron̄ silo vagahi take ram hav lol te ginau vwate huria, ran ḡun atatu be ram ḡitara lol kilasi.

²⁴Ram ḡita lolmatara i ram ban dagai vilvilehi ram binihi malioi nora gitava.

²⁵Take kera be atat ron̄ mwandavuha mwasigi kera haḡea ram hiḡehiḡe tavuha huri silo vavtutu non God be mwa lol sinombu ram maribwesi, i ram hiḡehiḡe rahurahu huri avoana non God. Ram hav vinihi te malioi hano be ran ron̄oe, take ram dabe havanau be silo vagahi non God mwa bevea. Kera be ram lol ginau geki rav samsamwara maragai.

²⁶Kimiu gim binibe gim haḡo wasi nomiu binihimwasigi? Batena be gom hav vwalau te tavuhai meamwa, nom binihimwasigi kea ginau vuroi n̄ano, i gim dentene mulei lalai kimiu.

²⁷God mwa laiḡoḡo binihimwasigi be nu melmelo, i vahalana sigai binihimwasigi geki mwa domuai atatu be ramen gitaḡoro ira mandue, ira bwero be ram hahagavi huri buluiana i vi lolira rav melmelo dagai nin alen̄an rahuana ata lol ureure.