Read Hano Jemes 5 Bible Online

Jemes 5 - Hano bible

Jemes 5

¹Atat rosoga giv roron̄tai. Mwa du maragai be giv dei i giv ron̄ mwahantai bwatuna taro ririhai be mwa mai lalai kimiu.

²Rosomiu duluai nu boboga i bwatgarivi ram ḡan n̄oto gaisagamiu.

³Nomiu vatlegiga mai vatan̄oga ran dadaga, geki mwa seserainia be gin vahala. Dadagara geki mwa ḡan rebehimiu kun gabi. Gim haḡo nomiu homu huri nogonan gubwen̄i.

⁴Gim hav vol te ira turin nomiu rovoga be ram lol rovoga lol bilamiu talu. Giv roron̄tai huri nora haharigiana, huribe God roron̄o mwa ron̄ deiana non ira atatun rovoga.

⁵Rahumiu lol ureure nu masiri gin roso mai doroniva duluai be gim doronia. I ginau duluai be gim doronia giv lol dumwia. Kimiu gim buburu take gim len̄a be gubwen̄i gea gubwen̄in wehiwehi atatu.

⁶Gim bevegi atatu be ran vavtutu i gim wehi bamat atatu be ram hav hantai tehe mai kimiu.

⁷Ira tuaku, giv maḡemu vi votui taro be Ratahigi vi mai mulei. Atatun uteloloara mwa hohovi ḡoḡonai huri uhe vataha taro. Mwa hohovi ḡoḡonai huri bilan ririvuana be rav mauri nin tano.

⁸Kimiu mulei, giv maḡemu. Giv doronhohov, bwatuna Ratahigi vi mai vilvilehi.

⁹Ira tuaku, gisav av te lolhoroga vai alumiu gaitutuvwai. Be giv lol alen̄a geki God vi vevegi kimiu. Vevegi gea mwa abena huba!

¹⁰Ira tuaku, nu tavuha be giv vinihi dumwira atatun vevsera amua be ran avo huri ihan Ratahigi. Atatu ram lolira ram ron̄ mwahantai maragai take binihira mwa hav hovi tehe.

¹¹Bwatuna be kera ram du wasigi vataha mahavana i God mwa lolira ram ron̄ mwandavuha. Gim ron̄oe huba huri binihiv maḡemu non Job, i gim ilo ginau duluai be Ratahigi nu lolia lalainia atagu. Ratahigi nu tavuha maragai i mwa hagav atatu.

¹²Ira tuaku, lol taro be gim lol tatauleo, mwa hav tu tehe be giv vev ihan God, lol nomiu avoana, be men lol nomiu avoana men wasi. Gosav vev te ihan ginau atamare sa lol ureure be God nu lolia. Be giv vevea be “Uwe” giv vev uwe n̄ano sa be “Sigai” giv visigai n̄ano. Kebe gov lol alen̄a geki God sihav vevegigo tehe.

¹³Be atatu vwate mwa dogo ginau hantai vwate mwa dumwia nu tavuha be vi tataro. Be vwate mwa samsamwara nu tavuha be vi lol iboi.

¹⁴Atatu vwate be mwa haro vi uloi ira tomuain tataro. Rav tataro ba salil oel la harova gea lol ihan Ratahigi.

¹⁵I tataro non atatu be mwa binihimwasigi garagusi vi varahu ira harova; God vi varahu atatu gea. Kebe atatu gea nu vuroga, God vi vinihi kaburai vurona.

¹⁶Nu tavuha be giv vev lua vuromiu gaitutuvwai lalai kimiu gaitutuvwai, i giv tataro lalai kimiu gaitutuvwai i God vi varahu kimiu. Batena be atat binihimwasigi mwa dataro, tataro gea nu muramuraga maragai.

¹⁷Elaija kea kun gida, nu tataro lalai God be sihav uhe tehe, i nu hav uhe tehe lol vanua gea huri taul gaitolu idui.

¹⁸Elaija mwa dataro mulei i mwa uhe lol mahao ira ute loloara lol ureure ram mwasiga tavuha mulei.

¹⁹Ira tuaku duluai, be tuamiu vwate mwa ban dagai nin avoan mwasigi, vwate alolomiu vi bului wani gea be vi tabagilu mulei, atatu gea mwa lol rovoga tavuha geki. Atatu mwa bilohi binihin atat lete mwa dabagilu mulei la hal vavtutu mulei,

²⁰kea mwa barahu wani geki sihav mate tehe. Atat vavtutu geki mwa lol hal tavuha i mwa dugu kaburai vurona nin lalan̄an bwatigoro duluai.