Read Hano 2 Pita 2 Bible Online

2 Pita 2 - Hano bible

2 Pita 2

¹Tuai nu vora atatun vev sera dentene lol sinombu non God, kunia n̄an be kimiu ira vagahi tentene rituai abena lol nomiu tatan̄ana. Kera rav hili ba bagahi ginau be ran hav vavtutu tehe---vagahi be rav lol atatu rav sala. Kera mulei rav varihai didi lai Ratahigi Jisas, Be nu vol mulei nora togoan mwaribwesi. Kera rav lol hantai vilvilehi nira sibora.

²Ivusi rav huri nora hal bwatigoro i ram bev avoan hahantai huri hala be nu mwasigi.

³Ira vagahi tentene kera geki ram doron nomiu homu, i kera rav haḡo kimiu i rav tentene lalai kimiu. Nora harahara ran avo vai alura tuai mwa mai radu i nora hantai mwa mwasigi.

⁴Lol taro be ira enjel ram buroga, God nu hav lin̄ira tehe be rav maribwesi nin vevegi. Nu horara vai lol tanon mateana i nu taura lol malan̄an ute bon̄i aia be ram hohovi huri vevegi.

⁵I God nu vevegi ureure amua lol taro be nu hora wailuluvi lol ureure be nu masiri gin atatu be ran avo vai aluna. Take God nu varahu Noa, kea be nu toretore huri havanau be nu vavtutu mai God, i atat dodolua gaibitu maia.

⁶I mulei God nu lol bwarebware ira bwatun vanua hantai Sodom i Komora, Ginia be nu tunura vaivotu be ran bebega. Nu lol ira bwatun vanua kera geki ram bora malele huri havanau be vi loli lalainira be ram avo vai alun God.

⁷Take nu varahu Lot nin ira bwatun Vanua kera geki. Lot, atat tavuha, nu ron̄ mwahantai bwatuna rahuan hantai huri atat bwatigoro.

⁸(Lot Be nu vora atat tavuha, take bwatuna be nu togo mai atat bwatigoro vataha gubwen̄i, Lolona tavuha be nu to maira nu ron̄ ḡagarasi gin bwatigoro be nu gitae i nu ron̄oe.)

⁹Ratahigi nu iloe kun hanigi haḡea be vi varahura gabe ran lol rovoga lalainia lol taro hantai be vi mai. Kea vi haḡo atat bwatigoro i vi vevegira, Lol taro be ram hohovi huri gubwen̄in Silo Vevegi.

¹⁰Silo Vevegi gea liuhage lalainira be ram dogo ram lol bwatigoro lol rebehira sibora ram doronia i ram hav doron te roron̄o. Ira Vagahi tentene kera geki ran wasi i ram lol havanau be ram doronia. Ram hav matagu tehe be rav avo vai alun ira enjel.

¹¹Take ira enjel, be ran wasi liu i ran muramura liu ira vagahi tentene, Gisav av te vai alura gin avoan hahantai amua lolmatan Ratahigi.

¹²Take atatu kera geki ram avo vai alun ginau be ram hav ilo te huria. Kera ram bora kun ginau rahu turu be ram lol ginau i ram hav binbinihi tehe, ginau rahu turu be ran vora huribe vi haḡoan batugehi i vi wehiana. I, kun ira ginau rahu turu, ira vagahi tentene kera geki rav lol kaburainira.

¹³Kera ran lol sinombu be rav ron̄ ḡagarasi, i kera sibora rav ron̄ ḡagarasi. Geki volira huri havanau be ran lolia. Ran hav busbusi tehe be rav lol bahala lol ute melmelo lolmatan sinombu, i kera ram bora kun totoa bibili i han̄ora lol davolamiu. Ram ron̄ mwandavuha tentene lol taro be ram ḡan ginau mai kimiu.

¹⁴Vataha mahavana ram ḡita vavine be ram doronia, i nora doroniva huri vuro mwa hav haraharai tehe. Ran tomuai sinombu be ran mandamanda vai lol vidin vuro, i ran Vagahi sibwen̄ira be rav doron liu. God vi vevegira!

¹⁵Ira vagahi tentene kera geki ran derai mwasin hala i ram sala, i ram huri hala be Balam nu huria. Balam kea nitun Beo, gabe nu doroni be rav volia huri lol bahala.

¹⁶Take don̄ki, be mwa hav avo te dumwi, mwa bevea lalai Balam be kea mwa buroga. Nu avo mai Silon atamwani i nu tuḡoro binihiv taltale non ira atatun vevsera gea.

¹⁷Ira vagahi tentene kera gea ran kun matavuravura be wai sigai ninia i dodo be lan̄ wasi mwa herei kaburainia. Ute met dodoga lol bon̄i mwa dogo hurira.

¹⁸Ram bev avoan sasagerega be binihiva ata alolona sigai. Gin nora doroniv bwatigoro ram domuai sinombu vai alolon vidin vuro---atatu be ram siv tau bwatuna be ramen romaragai nin atatu be ram dogo lol vahalana.

¹⁹Ram datauleo lalainira be rav maribwesi, take kera sibora ram hav maribwesi tehe. Kera ram bora turin rovoga huri ginau be vi lolian kaburai. Huri atatu ram bora atat vauhi huri havanau tehe be mwa domuai nira.

²⁰Kera ram maribwesi huba nin bwatigoro lol ureure i ram ilo non Ratahigi i varahuda Jisas Kraes. Take kebe rav tabagilu lol bwatigoro i ginau kera gea rav tomuai nira, i ginau geki vi hantai vi liu ninia amua.

²¹Uwe, Nu tavuha hurira be rasav man ilo te hal vavtutu ninia be ras iloe i ras vanburigai nin vagahi sabuga be nu laiana lalainira.

²²Havanau be ram lolia nu ḡun avoan mwasigi geki: “Vwiriu mwa dabagilu mulei huri havanau be nu luainia,” i, “Ataguna be boe mwa bwagana, mwa ban mulei mwa rahainia lol bili.”