Read Hano 2 Pita 3 Bible Online

2 Pita 3 - Hano bible

2 Pita 3

¹Ira tuaku, geki gairuan avoana be nan ravae lalai kimiu be vi bului mwasigi binihimiu be giv vinihi dumwia.

²Nam doron be giv vinihi dum ira avoana be ira atatun vevsera sabuga ran avoinia tuai, i giv vinihi dum avoan wasi be nonda Ratahigi i varahu nu laia sivi ira hala.

³Nu tavuha maragai huri kimiu be giv ilo tavuhai havanau be vi loli lol ira nogonan gubwen̄i. Atatu rav manuhi kimiu. Kera rav rahu ba lol ira bwatigoro kun be ram doroni.

⁴Kera rav vevea be, “Jisas nu tatauleo be vi mai mulei. Kea behe? Ira tamanda ran mate, take Ureure mwa du radu kunia be nu gitana lol taro be nu loliana.”

⁵Take kera ran hav doron te didi vinihi dum havanau be nu loli tuai, gin avoana non God ute atamare i ureure mwa loli. Ureure nu loliana nin wai i gin wai,

⁶i nin wai haḡea, wain wailuluvi mwa lol kaburai ureure ata amua.

⁷Take God mwa lol dautau ute atamare mai ureure be rav togo radu vaivotu gubwen̄in vevegi vi mai. Vuri vi taura lol gabi i vi lol kaburai atat vuroga duluai.

⁸Take gisav vinihi te malioi ginau gaituvwa geki ira tuaku. Lalai Ratahigi gubwen̄ gaituvwa nu ḡun taul vasan̄vulu, i taul vasan̄vulu nu ḡun gubwen̄ gaituvwa n̄an.

⁹Ratahigi Kea mwa hav ravrava tehe huri havanau be mwa datauleo huria la hala be sinombu ravrava ram ilo tavuhai halana be rav take God mwa dogo maḡemu mai kimiu. Kea mwa hav doron te atatu Vwate be vi sala, take mwa doron Sinombu duluai be rav leahi lolora i rahura.

¹⁰Take gubwen̄in Ratahigi vi mai kun atat Surasura. Mahao vi vano mai silo gaivua ginau duluai alolora vi van kaburai gin gabi, i ureure mai ginau duluai alolona vi oda kaburai,

¹¹La hala gea ginau duluai vi lolian kaburai! Haḡe hava lalan̄an atatu haḡea mwa du be vi vora kunia? Kimiu mwa du be giv rahu lol rahuanan vui i giv lol rovoga lalai God,

¹²Kunia be kimiu gim hohovi huria i gim ḡarere dotomua huri maiana non God. Lol taro be gubwen̄i gea vi mai mahao vi lol kaburaiana gin gabi, i ginau duluai alolona vi rovo gin hahavwani.

¹³Take God nu lol tatauleo vwate lalai gida, i gida tam hohov ute gara amare i ute gara lol ureure aia be tavuha mwa dogo.

¹⁴Ira tuaku, lol taro be gim hohovi huri ginau geki be vi loli, giv lol ron̄oe be giv togo dagai nin vuro i dagai nin totoa bibili i han̄ora. Giv lol ron̄oe be giv lol tamwata mai God.

¹⁵Giv Vinihi dumwia be gida tam rahu bwatuna nonda Ratahigi nu maḡemu. Tuada Pol, nu vevea lalai Kimiu avoan gaituvwa n̄an lol taro be nu ravae lalai kimiu mai mataisao be God nu laia lalainia.

¹⁶Nu ravae huri ginau geki lol non avoana duluai. Ginau rituai lol avoana non Pol ran ririhai be tav iloe, i atatu be ram hav ilo te halana i ran mandamanda lol binihimwasigi ram bev avoana tentene huria. Kera mulei ram bev avoan tentene huri ira ravrava Sabuga dodolua, take kera ram lol kaburainira sibora lol taro be ram lol ginau geki.

¹⁷Ira tuaku, mulei be gin ron̄oe huri ginau geki, giv gitaḡoro. Gisav lin̄ te ira atat bwatigoro be rav tomuai dagai kimiu gin alen̄ lete be ram lolia. Giv gitaḡoro bere gim hovi nin nomiu binihimwasigi wasi.

¹⁸Take giv mauri lol hogoi i mataisao non nonda Ratahigi varahuda Jisas Kraes. Sarisari lalainia Kadogaha i vai tuai! Amen.