Read Hano 1 Jon 2 Bible Online

1 Jon 2 - Hano bible

1 Jon 2

¹Ira nituku nam ravae geki huria be gisav vuroga tehe. Take be tas vuroga, Jisas Kraes atat vavtutu mwa du la lolmatan God huri gida. Kraes kea nonda tataroi gabe mwa lai dagai vuroda i vuron sinombu duluai lol ureure.

²Kraes nu ron̄ gagarasi sibona be men lai dagai vuroda i vuron ureure duluai.

³Mahavana be tam dabe God, tam iloe mwasigi be tam dabe God.

⁴Take be tas garoinia ba bevea be tam ilo God i tam hav tabea tehe, kunia tam dentene i mwasigi mwa hav togo tehe aloloda.

⁵Gida tav tabe God mwasigi n̄ano be tav tabea liu, i tam iloe be gida ira atatuna.

⁶I be tas vevea be gida tam dogo lol bulbuluana mai God, gida tav huri malelen Jisas Kraes mwasigi.

⁷Ira noḡu buluana, nam ravae geki mwa hav vora te gin binihiva be nam lai silo gara lalai kimiu. Ta kea n̄an haḡea radu be nan laia lalai kimiu la bwativuna, i roroi haḡea be gin ron̄oe.

⁸Take mwasigi be silo gara, i gim ilo mwasin binihivanana, kun gabe Kraes mwa iloe. Kimiu giv gita dum ute meto be vi mata hara i mwasin gigita mwa ḡigita huba.

⁹Take be tas garoinia ba bevea be tam dogo lol ute rani i tam barihai atat dodolua, kunia gida tam dogo radu lol ute meto.

¹⁰Take be tas tabe atat dodolua tam dogo lol gigita i tam hav lol te atat dodolua be rav hovi lol bwatigoro.

¹¹Be gida tam barihai atat dodolua, nonda lagoana i togoana mwa dogo lol ute meto.

¹²Ira nituku, nam ravae geki lalai kimiu, bwatuna be vuromiu nu binihi kaburainia la ihan Kraes.

¹³Ira tama, nam ravae geki lalai kimiu, bwatuna be gim ilo wani gabe nu togo mai kimiu la bwativuna. Ira mwalaḡelo, nam ravae geki lalai kimiu huria be kimiu gim muramura ḡoro bwatigoro.

¹⁴Ira naturirigi kokolo, nam ravae geki lalai kimiu, bwatuna gabe gim ilo Tata. Kimiu ira tama, nam ravae geki lalai kimiu bwatuna be gim ilo wani gabe nu togo mai kimiu la bwativuna. Ira mwalaḡelo, nam ravae geki lalai kimiu, bwatuna be kimiu gin muramura. Roroi non God nu ḡata garagusi huba lol sibwen̄imiu, i kimiu gim muramura ḡoro bwatigoro.

¹⁵Gisav tabe te alen̄an ureure, sage ginau gabe non ureure. Be giv tabe ureure gisav tabe te dum Tata.

¹⁶Nonda binihiv hahantai duluai geki mwa mai nin ureure, binihiva nan doroniva huri rebehi, doronivanan matada, i doronivanan roso. Ginau kera geki vwate mwa hav mai tehe nin God.

¹⁷Ureure mai ginau be mwa lalagoinia vi nogonogo kaburai. Take be tav tabe God, tav rahu vai tuai.

¹⁸Ira nituku, mwa abena be ureure men nogo. Gim iloe be ivwalu Kraes men mai kadogaha, ira ivwalu non Kraes ran mai huba. Bwatuna haḡea tam iloe be nogonan ureure mwa abena.

¹⁹Sinombu kera geki tam mai nin nomai vatugigi, take ram bano bwatuna be la mwasigi, kera ram hav vora te mai kamai mwasigi. Be sivora kera bul mai kamai mwasigi ras togo mai kamai. Take kera ram bano i mwa ḡigilaga be kera ram hav vora tehe bul mai kamai.

²⁰Kraes mwa lol sabugainigo gin Vui Sabuga. I kadogaha kimiu duluai, gim iloe.

²¹Nam hav ravae tehe lalai kimiu bwatuna be gim hav ilo te mwasigi, ta nam ravae lalai kimiu bwatuna be gim ilo mwasigi. I gim iloe be tenteneana mwa mai nin mwasigi.

²²Ihei hangea tenteneana? Kera gabe ram bevea be Jisas kea mwa hav vora te Kraes. Ihei tehe gabe mwa bevea kungeki kea ivwalu non Kraes, i mwa siehira saraḡo Tata mai Nituna.

²³Be tas siehi naturigi tas siehi Tamana mulei. Take be tas vevea be tam dabe Nitui, tam dabe Tamana mulei.

²⁴Giv tu wasigi alun roroi gabe gin ron̄oe muana vi ḡata lol sibwen̄imiu. Be roroi gabe gim ron̄oe muan mwa dogo alolomiu, kunia giv togo lol Nitui i lol Tata.

²⁵Nitui nu tatauleo lalai gida huri rahuana vai tuai.

²⁶Nam ravae gi avoan dura lalai kimiu huri sinombu kera gea be ram domuai bwarebware kimiu.

²⁷Kraes mwa batavuhai kimiu gin Vui Sabuga! I vui mwa dogo alolomiu, i gim hav mom doron te atatu mulei be men vagahi kimiu. Vui kea nu mwasigi i mwa bagahi kimiu huri ginau duluai. I giv tu wasigi nan alun Kraes, kun gabe vui mwa bagahi kimiu be giv tu wasigi aluna.

²⁸Ira nituku, giv tu wasigi alun Kraes i mahavana be kea vi tabagilu, tav tu wasigi i tasav mom hili tehe mai nonda busbusiana.

²⁹Gim iloe huba be Jisas Kraes kea atat vavtutu. I ira hei gabe ram lalaḡo bavtutu kera ira nitun God.