Read Hano 1 Jon 3 Bible Online

1 Jon 3 - Hano bible

1 Jon 3

¹Giv vinihi lolotabetabe non Tata be kea mwa dabe maragai gida. Kea mwa dabe maragai gida i mwa uloi gida be ira nituna. Gida mwasin ira nituna. Take sinombu ata lol ureure geki ram hav iloe tehe be gida ira nitun God, bwatuna be ram hav ilo te God.

²Ira noḡu buluana, gida ira nitun God, take huria be tai vora atatu kun hanigi, kea mwa hav melmelo tehe lalai gida radu. Take tam iloe be mahavana be Kraes vi mai mulei, gida tai vora kunia, be tav gitae be kea mwasigi.

³Atatu duluai be ram haḡo doronhohov huri Kraes, rav melmelo kunia be Kraes nu melmelo.

⁴Ira hei duluai be ram buroga, ram n̄andu silo non God, bwatuna be vuroga kunia be mwa n̄anduana na silo non God.

⁵Gim iloe be Kraes nu mai be vi lai dagai vuron sinombu. I vuro vwate sigai aluna.

⁶sinombu gabe lolora mwa dogo haragaituvwa maia, rasav non buroga tehe. Kera gabe ram buroga ḡao, ram hav gita te Kraes, i ram hav iloe tehe.

⁷Giv gitaḡoro be ata dodolua rasav saruruhi te kimiu. Ihei gabe mwa lalaḡo bavtutu, kun gabe Kraes kea atat vavtutu.

⁸Atatu gabe ram buroga ḡaoḡao, kera nitun setan. Setan nu vuroga la bwativuna, take Nitun God nu mai be men lol kaburai Lalagova non setan.

⁹Ira nitun God rasav vuroga te ḡaoḡao, bwatuna be God mwa dogo alolora. Rasav vuroga te ḡaoḡao bwatuna be kera ira nitun God.

¹⁰Lalaḡova non atatu mwa seserainia be kea nitun God sage kea nitun setan. Kera be ram doron lalaḡov hantai, i ram hav tabe te ira tuara, ram hav vora te bilan God.

¹¹Roroi gabe gim ron̄oe la bwativuna, be giv tabetabe kimiu.

¹²Gisav vora te kun Ken gabe nu wehi bamate mwasin tuana. Huri hano be mwa wehia? Bwatuna be kea nu hantai i tuana nu hantai.

¹³Ira tuaku, gisav dan̄an̄a tehe bwatuna be atatu ata lol ureure ram barihai kimiu.

¹⁴Nonda lolotabetabe huri gida vatvataha mwa seserainia be, tan mwalue nin mateana vai lol rahuana. Take be gim hav lolotabetabe te kimiu, kea kimiu gim dogo radu lol muramura nan mateana.

¹⁵Be ihei tehe mwa wehi tuana kea wehiwehi surai, i tam iloe be wehiwehi surai, sigai alolon rahuana vai tuai.

¹⁶Gida tam iloe huri lolotabetabe huba bwatuna be Jisas nu lin̄ rahuna huri gida. I bwatuna haḡea tav lin̄ rahuda huri atat dodolua.

¹⁷Be gida nonda ginau abena i tam ḡita atat dodolua be nora sigai, ta be tam hav buluira tehe, tasav vev te dumwia be tam dabe God.

¹⁸Naturirigi gisav avo tehe n̄an huri lolotabetabe, take gin nom lalaḡova.

¹⁹Kunia haḡea be tam iloe be tam huri mwasin hala non God? Geki haḡea hala be tam iloe be God mwa dogo mai gida.

²⁰Gaituvwa n̄an be tasav ron̄ te mwandavuha, God gaivua liu nin nonda binihiva i doroniva kea mwa ilo ginau duluai.

²¹Ira noḡu buluana, be nonda ron̄ova mwa davuha mai God, kunia tasav busbusi tehe be tamen mai sosori mai God.

²²Be tas hudali te God gin havanau tehe kea vi laia lalai gida, bwatuna be tam dabea. I tam lol ginau be mwa samsamwara ginia.

²³God mwa doron be tav tau nonda binihimwasigi alun Nituna Jisas Kraes i tav tabetabe gida. Geki havanau gabe Jisas nu vevea be tav lolia.

²⁴Be gida tas tabe leohorai non God, Gida tav togo maia i Kea vi togo mai gida.