Read Hano Visirai 10 Bible Online

Visirai 10 - Hano bible

Visirai 10

¹Haḡe nam ḡita enjel muramura vwate mwa himai nin amare vai ataa. Kea mwa bisirai lol dodo, i taban̄ao mwa dalisi la bwatuna; lolmatana nu gigita kun alo, i bwalagena ran ḡun gabi tabwalue.

²I mwa haḡo buka lulun̄i kolo lol limana mwa bugeria. Kea mwa dari mwatuan bwalagena la tahi i mwairina la vanua,

³i mwa ulo amare gin silo gaivua, i silona mwa datan̄i kun silon laion be mwa rurun̄udu. I ataguna be mwa ulo amare, bwahilo gaibitu ram ruru i ram bwaliua gin silo dara dumwi.

⁴Haḡe mahavana be ram avo, nam dau bwatuna be namen rav avoana be mwa mai lol bwahilo. Take nam ron̄ avoana mwa himai nin amare mwa bevea be, “Gov tahuli ginau be bwahilo gaibitu ram bevea; take gosav rav te batugehia!”

⁵Haḡe enjel gabe nam ḡitae be mwa du la tahi i la tano mwa hagai lua limana mwatua vai la mahao

⁶i mwa datauleo ḡaragara la ihan God, gabe mwa dogo vai tuai vai tuai, gabe nu tau amare i ataa lol ureure, i tahi, i ginau duluai gabe ram du alolora. Haḡe enjel mwa bevea be, “Sihav mom n̄ava tehe!

⁷Take mahavana be gaibitun enjel mwa uv bilan taiva, God vi lai dum non taritari dahuligi, be nu vevea lalai non ira atatun rovoga gabe ira atatun vevsera.”

⁸Haḡe silo gabe nan ron̄oe be nu avo maiau nin ute amare mwa bevea mulei lalaiau mwa bevea be “Van ba lai buka lulun̄i be nu vugeana huba, gabe mwa eno lol liman enjel gabe mwa du la tahi i la tano.”

⁹Nam bano aben enjel i nam hudalinia be men lai buk lulun̄i kolo lalaiau, mwa bevea lalaiau be, “Laia ba ḡania; vi garagara lol sibwen̄imwa, take la lol vwamwa vi lulumwu kun gabe hani gabe sukabak mwa daua.”

¹⁰I nam lai buka lulun̄i kolo nin limana i nam ḡania, i mwa buge ḡologolo lolvwaku kun hani. Take ataguna be nam gania, mwa ḡaragara lol sibwen̄iḡu.

¹¹Haḡe mwa bevea lalaiau be, “Goi vev lua roroi non God mulei huri varan sinombu ivusi, i lalan̄an atatu, lalan̄an avoana, i ira ratahigi lavoa ivusi.”