Read Hano Visirai 12 Bible Online

Visirai 12 - Hano bible

Visirai 12

¹Haḡe nam ḡita dovon̄a vwate lol mahao kun gabe dovon̄an ginau gaivua vwate be tam len̄ai binihivanana. Haḡe vavine vwate mwa dogo gaisagana kun alo, i mwa dari vula aten bwalagena, i gai sosorin bwatuna visiu han̄vul domwan gairua.

²I kea mwa wahai gin bavavana, i mwa dei i mwa ron̄ḡagarasi gin ron̄ḡagarasin bavavana.

³I nam ḡita dovon̄a dolua vwate mulei mwa bisirai lol mahao. I aia drakon memea gaivu talele vwate, mai bwatuna gaibitu i mauana han̄vulu, i gai sosorin bwatu vatvataha bwatu.

⁴I mwa wehi dul tul tavalun visiu nin mahao vai lol ureure geki. Haḡe drakon mwa du la lolmatan vavine huri be nituna vi vora gim ḡan darihounia.

⁵Haḡe kea mwa haḡo nituna atamwani, i kea haḡea vi tomuai varan sinombu duluai la ureure gin bwata be aean. Take naturigi mwa bwirihian dagai mwa laiana lalai God mai non tanon togotogon ratahigi.

⁶Haḡe vavine mwa rov maragai vai la vanua vuroi, lol ute be God nu lol vatuvwainia huria, i vi gitan ḡoro aia huri gubwen̄ vasan̄vul vatuvwa, vudolua varua vena n̄avul gaiono.

⁷Haḡe bwaloana mwa du lol ute ata amare. Maikol mai non enjel ram bwalo mai drakon, bul mai nom enjel;

⁸take drakon mwa rihu holhole, i mahin̄ai mulei sigai huria mai non enjel be rav mom dogo mulei lol ute ata amare.

⁹I ram bohai kaburai drakon, kea teltele bwatavwega ataa lol ureure tuai be mwa uloiana be Atmate, sa Setan be mwa sine ureure duluai. Kea mwa bohaiana himai vai lol ureure geki, maira non enjel duluai.

¹⁰I nam ron̄ silo gaivua lol ute ata amare mwa bevea be, “Kadogaha varahuva non God mwa barahu gida! Kadogaha God mwa seserai non muramura kun gabe ratahigi Lavoa! Kadogaha non Wani Vurai mwa seserai non tanon lavoa! Huri be kea gabe nu tu la lolmatan nonda God i mwa bevegi ira tuada rani i bon̄i, nu vohaiana kaburai nin ute amare.

¹¹Ira tuada ran muramura ḡorora gin dagan nitui sipsip i gin mwasigi gabe ran seserai luae; i ran muramura bwatuna be ran hav sinsinei te rahura, take ran samsamwara be rai mate.

¹²Bwatuna gea samwarana, giḡo lol mahao, i kimiu duluai be gim du ataa! Take vi hantai maragai lalai ureure i tahi! Bwatuna be Atmate mwa himai hurigo, i kea nu masiri gin n̄alana i lolhoro, bwatuna mwa iloe be non taro vwelvwele maragai.”

¹³Haḡe drakon mwa ilo be kea mwa bohaiana vai lol ureure ataa, kea mwa dau bwatuna be mwa mwaloi vavine gabe men bava naturigi atamwani.

¹⁴God mwa lai gabaun mala gaivua gairua lalai vavine gea be vi gaga ginia vai la vanuana vuroi, i vi togo tavuhai aia huri taul gaitolu i udui. I aia vi rahu nin wehiwehiana non drakon.

¹⁵Haḡe drakon mwa luai wai gi wailuluvi be vi lai dagai vavine gea.

¹⁶Take ureure mwa bului vavine gea, i mwa dolom bebegai wai gea be mwa mwalue nin lolvwan drakon.

¹⁷Haḡe drakon mwa lolhoroi maragai vavine gea, i mwa domare be men bwalo mai ira varana duluai lol ureure, kera gabe ram dabe silo non God duluai i ram lalaḡo bavtutu huri mwasigi be Jisas mwa seserainia.

¹⁸I drakon mwa du huri tahi.