Read Hano Visirai 14 Bible Online

Visirai 14 - Hano bible

Visirai 14

¹Haḡe nam ḡarere i nam ḡita Nitui Sipsip mwa du la Vusi Saion; i tovtovon sinombu gabe ram du bul maia vasan̄vul vudolu vatuvwa vena n̄avul gaivasi domwan gaivasi (144,000), gabe ihana mai ihan tamara nu ravara alun rera.

²I nam ron̄ silo mwa himai nin amare mwa roro kun silon wai saribwatu, kun silon dumdumwianan bwahilo mwa dabwahu gaivua. Mwa datan̄i kun silon atatu be ram pelei la vatahanan pelei gaivua.

³Sinombu vasan̄vul vudolu vatuvwa vena n̄avul gaivasi domwan gaivasi ram du la lolmatan tanon togotogon ratahigi, i la lolmatan ginau rahu gaivasi mai ira bwatmetua; ram lol ira iboi gara be atatu dodolua rasav lol te dumwia. Alolon atatu duluai, kera n̄an gea be rav rahu nin vurora.

⁴Kera be geki atatu n̄an gabe ran rarainira i ran hav bibili tehe gin rebehin vavine; kera ran gogona. Ram huri daltali nitui sipsip halabehe tehe be kea mwa bano. God nu vol luara huba i mwa lai luara nin atat dodolua. Ram bora muan atatu be ran vora hogoi lalai God mai nitui sipsip.

⁵Kera gea tenteneana mwa hav mwalue tehe nin bwan̄ora; ira atat vavtutu.

⁶Haḡe nam ḡita enjel vwate be mwa ḡaga haehae butbutui lol mahao, mai roroanan Roroi Tavuha be nogonana nu sigai be vi vev luae lalai sinombu lol ureure, i lalai lalan̄an atatu i lalan̄an vara, mai avoana, i tatan̄an vanua.

⁷Kea mwa bevea gin silo gaivua be, “Gogonai God ba lol roroai non tanon lavoa! Huri be tarona mwa mai huria be vi vevegi atatu duluai. Gogonainia gabe nu tau ute amare, i ataa, i tahi mai ira matavuravuran wai!”

⁸Haḡe gairuan enjel mwa huria be mwa domua, mwa bevea be, “Kun vavine be nu hovi! Bwatutun vanua Babilon nu hovi! Nu lol non sinombu duluai ram mwin non waen wasi huri bwatigoro!”

⁹Haḡe gaitolun enjel mwa huri tagun gairua mwa bevea gin silo gaivua be, “Ihei tehe gabe mwa ḡogonai ginau rahu mai nununa, i mwa lai dovon̄a alun rena sage la limana,

¹⁰vi mwin waen non God sibona, waen huri non lol horo, gabe kea mwa salilia alun muramura liu vai alolon lahan non lolhoro! Kera gabe rai mwin waen gea rav ron̄ ḡagarasi maragai gin gabi i salva la lolmatan ira enjel sabuga mai nitui Sipsip.

¹¹Haḡe ahun gabi, gabe mwa havwanira, mwa hae vai tuai vai tuai. Tanon mabuana sigai aia rani sa bon̄i huri ira hei gabe ram ḡogonai ginau rahu gea mai nununa, huri ihei tehe gabe mwa lai dovon̄a alun ihana.”

¹²Bwatuna ginau geki, atat non God rav tu wasigi, ihei mwa dabe leo horai non God i mwa du wasigi alun Jisas.

¹³Haḡe nam ron̄ silo mwa himai nin amare mwa bevea be, “Gov ravae geki be: Samwarana lalai ira hei gabe mwa dau bwatuna kadogaha rav mate alolon rovoga non God!” Vui mwa bevea be, “Uwe mwasigi! Ram mambuharainira nin nora rovoga hahavwani, bwatuna be vwain nora rovoga hahavwani vi vano bul maira.”

¹⁴Haḡe nam ḡarere, i nam ḡita dum dodo maita, i ginau mwa dogo alun dodo maita, gitanana nuḡun atatu, mai gai sosorin bwatu alun bwatuna vatan̄oga, i bua teḡe mamagani lol limana.

¹⁵Haḡe enjel vwate mulei mwa mwalue nin imwa tataro i mwa haharigi amare gin silo gaivua lalai wani gabe mwa domahuri alun tenlan̄i, mwa bevea be, “Gov tai gin nom bua teḡe mamagani ba hara ḡoḡo ginaga, bwatuna be tarona mwa mai; ureure mwa metue huri harahara!”

¹⁶Haḡe wani gabe mwa dogo alun ten lan̄i mwa wahai non bua teḡe lai ureure be men tai hara ḡoḡo hinaga.

¹⁷Haḡe nam ḡita enjel vwate mulei mwa mwalue nin imwa tataro lol mahao, i kea mulei mwa haḡo bua teḡe mamagani.

¹⁸Haḡe enjel vwate mulei gabe, mwa muai ḡoro gabi, mwa mwalue nin olta. I kea mwa haharigi gin silo gaivua lalai enjel gabe mwa haḡo bua teḡe mamagani mwa bevea be, “Taia gin nom bua teḡe, ba dan̄ kaburai vwain gaon taligaon waen ata lol ute loloara lol ureure, bwatuna be ira vwain gaon taligaon waen ran metua!”

¹⁹Haḡe enjel mwa wahai non bua teḡe la ureure, mwa dai ira vwain gaon taligaon waen, i mwa bohainira vai alolon tanon rama huri waen huri lolhoro non God.

²⁰Haḡe vwain gaon taligaon waen mwa ramana alun tanona, atagun bwatutun vanua, i daga mwa rov lua rama huri vwain gaon taligaon waen kun wailuluvi be mael gaituvwa i udui, i nu roro kun n̄avan gaituvwa.