Read Hano Visirai 18 Bible Online

Visirai 18 - Hano bible

Visirai 18

¹I nan gita enjel vwate mulei mwa himai nin amare. Geki non muramura gaivua, i ureure mwa ḡigita, bwatuna be sarisarina.

²Enjel mwa bato amare mwa bevea be, “Hovita! Babilon muramura nu hovi i kadogaha vanuan ira vui hantai. Kea lulun ira vui ginau rahu bibili hantai i mai ira manu bibili duluai, i mai ira ginau rahu bibili varihaiana duluai.

³Atatu duluai lol vanua duluai lol ureure ram mwin waen wasi man vavine geki. Ira ratahigi lavoa duluai ata lol ureure ran vahala lol bwatigoro mai vavine geki. Ira atatun roso ata lol ureure ram rosoga bwatuna vavine geki huribe mwa dorodoron ginau ata lol ureure.”

⁴Haḡe nam ron̄ silo ata amare vwate mulei mwa bato mwa bevea be, “Noḡu sinombu, giv rov maragai nin Babilon. Gisav haroro tehe lol non bwatigoro i be kimiu bulu lol non silo vevegi!

⁵Vurona duluai mwa busvusi havava mwa holomare kun mahao. God mwa binihi dum non bwatiḡoro be nu lolia.

⁶Vi lolia lalainia kun gabe kea nu lolia lalai atat dodolua. Vi volia varua mulei amare aluna be nu lolia. Giv hogon bamasiri non pankeni gin waen be nu wasi liu, be wehiwehina nu wasi varua aluna amare be nu laia lalai kimiu.

⁷Vavine gea mwa binihi sagea sibona mwa lol rahuna gin ginau be volvol marahi. Kimiu giv lolia be kea vi ron̄ mwahantai maragai lol rebehina i binihina, vi dadariha kun non samwarana ata tuai. Mwa bevea gin mwasin lolona be, ‘Inau ratahigi lavoa vavine! Nasav vora te bwero dum n̄an haḡea sage be men ilo ron̄ovanan ron̄mwahantai.’

⁸Huribe kunia, lol gubwen̄ vwate kea vi ron̄ ḡagarasi gin harova i gin marogagasi i deiana. Gabi vi oda kaburainia, bwatuna be Ratahigi God vi vevegia gin non muramura.”

⁹Ira ratahigi lavoa duluai ata lol ureure gabe ram maturu bul maia i ram bulbulu alun non binihiv taltale rav deidei rav talan̄lan̄a, mahavana be rav gita ahu be mwa mwalue nin bwatutun vanua gea be gabi nu gan kaburainia huba.

¹⁰Non gagarasi vi lai mataguana lalainira, i rav tu banvano hautu ba bevea be, “Hagavi bwatutun vanua gaivua muramuraga gea! Hahagavi Babilon! Lol mahavan alo n̄an gaituvwa non silo vevegi vi mai.”

¹¹Kera duluai lol ureure be ram salei i ram bolvoligi rav deidei, bwatuna be atatu vwate mwa hav vol te dum nora vataha ginau.

¹²Atatu vwate sigai n̄an haḡea be men vol nora vatan̄oga, vatlegiga, raumatan vatu; ira lalan̄an gavu kun gav vatmwetoga, gav tastaso i gav memea; ginau n̄oto be ram lolia gin livon elevan, i gai bonboni, vatmerameraga, aean i raumatan vatlegiga;

¹³sinamon, vanila gaibonboni, mee mai vrankinsens; waen mai oliv oel, vulaoa melmelo, wit, buluki, sipsip, ira hos ira tanon lagoana, ira turin rovoga mai ira atat dodolua mulei.

¹⁴Ira atat rosoga ram bevea lalai Babilon be, “Ginau duluai gabe irubwimwa nu doronia ran vi roro maragai. Ira rosomwa mai sarisarimwa duluai rai vano kaburai vai tuai. Gosav mom lai te dum muleinira.

¹⁵Kera duluai be ram salei i ram bolvoligi ram bora ratahigi rosoga bwatuna vavine gea. Take mahavana be ram ḡita non gagarasi duluai, ram matagu maragai. Ram du dagai hautu ram dei i ram dalan̄lan̄a.”

¹⁶Haḡe ram haharigi amare ram bevea be, “Hagavi bwatutun vanua gaivua Babilon! Tuai nu sagae gin gav malumlumu i mwa sagae gin gav memea meto mai memea, i nu gagavua gin vatan̄oga mai ira vat maharavi mai vatlegiga.

¹⁷Take lol mahavan taro gaituvwa n̄an rosona vi matahara kaburai.” Ira vwalauanan waḡa duluai mai ira sinombu be ram ḡalo alun waḡa i ira atatun rovoga ran tu ban hautu, i maira duluai be ram rovoi halan rovoga mai homu lol tahi.

¹⁸Mahavana be ran gita ginau rahu be mwa mwalue nin non gabi, ram haharigi amare be, “bwatutun vanua gaivua haḡea geki be vanua vwate sigai kunia!”

¹⁹Ram bohai taniavu la bwatura i ram dei amare ram bevea be, “Hagavi bwatutun vanua gaivua Babilon! Kera duluai be ram rovo lol tahi ram bora ratahigi rosoga duluai alun non ginau. Take mahavan alo gaituvwa kunia bwatutun vanua vi masalan̄ai kaburai!”

²⁰“Ute ata amare vi samsamwara mai sinombu non God mai ira hala i ira atatun vevsera! God mwa bevegia huri hano be nu lolia lalainigo!”

²¹Haḡe enjel muramura vwate mwa domarei vat gaivutalele vwate i mwa bohainia vai lol tahi. Enjel mwa bevea be, “Geki haḡea hala be vi vohai bwatutun vanua Babilon vai ataa, i rasav mom ḡitae te mulei.”

²²“I silon iboi mai bua bava mai gore i vigo i sin̄sin̄i sihav mom ron̄oan te mulei. Atatun rovoga rasav mom dari te mulei rovoga lol bwatutun vanua gea, i gaigalolon raisi sihav mom datan̄i te mulei vai tuai!

²³Here sihav mom ḡigita te mulei halabehe lol vanua Babilon, i ira atat rasav mom bev te mulei tatauleon lagiana. Kera duluai be non atatun salsalei i volvoligi lol ureure, i gin non muramura hahantai kea mwa saruruhi varan sinombu duluai.”

²⁴Silo vevegi mwa mai la babilon huribe dagan atatun vevsera mai sinombu duluai mwa dogo aia. Uwe, dagan kera duluai be ram mate lol ureure.