Read Hano Visirai 19 Bible Online

Visirai 19 - Hano bible

Visirai 19

¹Ataguna geki, nam ron̄ ginau mwa datan̄i lol ute atamare kun gabe ira silo ivusi, i ram haharigi ram bevea be, “Lol roroai God! Varahuva, sarisari, i muramura kea non nonda God!

²Bwatuna be non vevegi duluai nu mwasigi i nu dadariha. God mwa bevegi vavin rovrovoi homu huribe mwa salan̄ai beroveroi ureure gin busbusianan lalaḡov hantai. Take God mwa bevegia i mwa lai lalainia huria be kea mwa wehira be non atatun rovoga.”

³Haḡe vatugin sinombu mwa haharigi amare be, “Lol roroai Ratahigi! Ahu sihav mosmosi te dum nin rebehina be mwa onda vai tuai vai tuai.”

⁴Ataguna geki, ira bwatmetua n̄avul gairua domwan gaivasi mai ira ginau rahu gaivasi, kera duluai ram hiv bwaubwau ḡoro tanon togotogon ratahigi non God i ram ḡogonainia. Ram bevea be, “Amen! Lol roroai Ratahigi!”

⁵Haḡe silo mwa mwalue nin tanon togotogon ratahigi mwa bevea be, “Giv lol roroainia, ira atatun non rovoga mai sinombu duluai lalavoa i kokolo be ram ḡogonainia!”

⁶I nam ron̄ silon ginau kun gabe vatugin sinombu gaivua be mwa datan̄i kun gabe silon wai rovo i bwahilo gaivua. Nam ron̄ora be ram bevea be, “Uloi roroai God! Bwatuna be nonda Ratahigi God, i kea nonda Lavoa!

⁷I kunia tav garigari gida ba samsamwara i ba lol roroainia. Gubwen̄in lagiana non Nitui teti kadogaha i non vavine mwa hohovi huba.

⁸Vi sagana gin gaisagan lagiana malumlum legiga.” (Gav malumlumu geki la binihivanana, mwa du huri ginau tavtavuha be sinombu non God ran lolia.)

⁹Haḡe enjel mwa bevea lalaiau be. “Kera ram ron̄ mwandavuha huribe ran uloinira huri lagiana non Nitui Sipsip.” Haḡe enjel mwa bevea mulei be, “Ginau kera geki gabe God nu vevera ran mwasigi.”

¹⁰Nan sisiabwau lol bwalagen enjel i nam dau bwatuna nam ḡogonainia. Take enjel mwa bevea lalaiau be, “Gosav lolia te kunia! Inau atatun rovoga vuroi, kunigo mai atat dodolua gabe ram bevea huri Jisas. Gosav gogonai te atatu dolua take God!” Huribe mwasigi be nu seseraiana sivi Jisas, kea haḡea nu rihui ira atatun vevsera.

¹¹Nam ḡarere i nam ḡitae be ute atamare mwa mahavan̄i, i hos maita mwa du aia. Atatu be mwa rovo aluna mwa uloinia be, “Binihimwasigi garagusi i Mwasigi, i kea nu vavtutu vataha mahavana la non harahara sage lol mahavana be mwa bano lol bwaloana.

¹²Matana ran ḡun gabi tabwalue, i mwa dari gai sosorin bwatu ivusi. I mwa rav ihana aluna, take kea gaituvwa n̄an mwa ilo binihiva nan iha gea.”

¹³Haḡe kea gabe mwa rovo alun hos mwa sagasagai gaisaga n̄ava i nu masiri gin daga, i ihana be, “Avoana non God.”

¹⁴Haḡe vatugin bwaloana ata amare ram rovo la hos ataguna i ram sagasagai gaisaga n̄an̄av maita.

¹⁵I buan bwaloana mamagani la bwan̄ona mwa ban dotomua be vi bwalo mai varan sinombu. Kea vi tomuainira gin bwata be mwa loliana gin aean, i vi seserai lolhoro wasi non God muramuraga be vi varahi kaburai vwain gaon taligaon waen vai lol lulroro gaivua aia be ran lol hun gaon taligaon waen aia.

¹⁶Ravrava mwa en la gaisagana batoi ulun vwevwena be, “Ratahigi Lavoa Nora Lavoa.”

¹⁷I nam ḡita enjel vwate mulei mwa du alun alo, i mwa bato lalai ira manu duluai ata lol mahava be ram ḡaga mwa bevea be, “Gin mai ba bulu lol ginaganian lavoa non God!

¹⁸Giv gan dum vigohon ira ratahigi lavoa, mai ira atat lalavoa, mai ira tomuai duluai, ira hos, mai ira hei be ram rovo alura, ira atat rahurahu mai ira turin rovoga ira atat binihi marahi, mai ira hei dodolua mulei.”

¹⁹I nam ḡita ginau rahu mulei mai ira ratahigi lavoa ata lol ureure ram mai bulbulu ute gaituvwa. Ram bwalo maia be mwa dogo la hos maita mai non atatun bwaloana.

²⁰Take ginau rahu gea ram laia gi atat vauvauhi bul mai atatun vevsera tentene. (Geki atatun vevsera n̄an haḡe gea be nu lol ira ginau dan̄an̄a la ihan ginau rahu, huria be kea vi vataltale kera dolua be dovon̄a non ginau rahu mwa en alura, i ram ḡogonai nunu vatu.) Mwa bohai rahui ginau rahu mai atatun vevsera tentene vai ata lol numbun wain gabi tabwalue mai salva.

²¹Take atatun bwaloana duluai ram bwalo alun buan bwaloana mamagani be mwa du la bwan̄ona be mwa rovo la hos. Buan bwaloana gea mwa wehi bamat ira atatun bwaloana. I ira manu ram ḡan kaburai ginau duluai ata la rebehira.