Read Hano Visirai 22 Bible Online

Visirai 22 - Hano bible

Visirai 22

¹Haḡe enjel mwa bagahiau gin wai rovo gabe nu gigita kun gabe kilasi, i waina mwa lai rahuana. Wai rovo geki mwa mai nin tanon togotogon ratahigi gabe God mai Nitui Sipsip ramuru dogo aluna.

²Haḡe mwa rov sivigi hivo bora sinen vanua. Dalis wai rovo tavaluna i tavaluna ira gai gabe ram bwavwae lalan̄an vwaina dodolua vataha vula alolon taulu. Vwaina ram lai rahuana i ram barahu ira varan sinombu duluai.

³Silo vevegi mulei sigai lol bwatutun vanua. God mai Nitui Sipsip raru vi togo alun tanon togotogon Ratahigi Lavoa. I ira sinombu non God rav gogonainia aia.

⁴Kera rav gita lolmatan God i ihana vi ravana la rera duluai.

⁵I ute bon̄i mulei sigai aia. Atat vwate sigai alolora be ram du aia be vi doron here sa gigitan alo. Ratahigi God vi gigitainira i rav tomua vai tuai.

⁶Haḡe mwa bevea lalaiau be: “Avoana kera geki rav mwasigi, i mwa du be vi vinihi mwasigiana na Ratahigi God n̄ano mwa domuai rahun non atatun vevsera, i kea n̄an gaituvwa be nu hora non enjel be vi seserainia lalai ira non atatun rovoga havanau be vi loli be ramen loli darihou.”

⁷Jisas mwa bevea be, “Giv roron̄tai!” “Nai mai mulei n̄an darihou! God vi vatavuhainira be ram daibwero huri roroi ata lol buka geki.”

⁸Inau Jon, i inau haḡea atatu gabe nan ron̄ ginau kera geki i nan gitae. I ataguna be nan gita ginau kera geki i nan gitara, nan sisiabwau gin gogonaiana lol bwalagen enjel gabe nu vagahiau ginia.

⁹Take enjel mwa bevea be, “Gosav lolia te kunia. Inau atatu n̄an kunigo, inau atatun rovoga n̄an kunigo mai ira tuada i ira atatun vevsera mai ira hei duluai gabe ram ron̄ avoana duluai ata lol buka geki. Take giv gogonai God n̄an gaituvwa.”

¹⁰I kea mwa bevea lalaiau be, “Gisav tu te ḡoro avoan vevsera ata lol buka geki. Tarona mwa abena huri ginau geki be rav loli.

¹¹Ira atat hahantai rav lalaḡoi lalaḡov hantai ḡaoḡao, i ira atatun taḡana rav taḡa ḡaoḡao. Take ira atat tavtavuha rav lalaḡo tavtavuha ḡaoḡao i ira atatu sabuga non God rav to sabuga ḡaoḡao.”

¹²Nam ron̄ avoana geki mwa bevea be, “Gitae nam mai vilvilehi maragai. I mahavana be nai mai mulei ba lai tavwe lalai ira hei duluai huri nora lalaḡov tavuha.

¹³Inau Alva i Omeka, Muana i Nogonana.”

¹⁴God vi vatavuhainira duluai gabe ram bwaga gaisagara. Kera rav gan dum vwain gain rahuana vai tuai. I rav haroro dum la matgatavan bwatutun vanua.

¹⁵Take atatu be ram lalaḡo hantai, ira vwiriu meto, gabwaleva i ira atat bwatigoro, i kera be ram gogonai nunu buhiga, maira duluai be ram doron be ramen tentene tagaro i ramen togo deḡeteḡe tagaro.

¹⁶Inau haḡea, Jisas. Nan hora noḡu enjel be vi vev ginau duluai geki lalainigo i mwa bano lalai ira uloilua. Inau haḡea mwasin varan Deved. Inau visiu sarisari huri mabon̄i.

¹⁷Haḡe Vui mai tasalan Sipsip Kolo, ramuru bevea be, “Mai!” Atatu duluai be ram ron̄ avoana kera geki, mwa du be rai vevea be, “Mai!” Atatu duluai gabe ram mandou mwa du be rav mai. Atatu duluai gabe ram doron wain rahuana, mwa du be rav mai ba mwinua huribe nu mahin̄ainia huba.

¹⁸Geki haḡea noḡu avoan dau lalai atatu duluai gabe ram ron̄ avoan dau huri avoan vevsera huri buka geki. Be ira ihei tehe mwa dari birin ginau ata alolon buka geki, God vi lolira rav ron̄ ḡagarasi huri ginau hahantai duluai alun lalaḡov hantai ata alolon buka geki.

¹⁹Haḡe be ihei tehe vi lai dagai te havanau tehe nin buka geki, God vi lai dagai rahuana ninia huri gain rahuana vai tuai mai bwatutun vanua sabuga be mwa bevea huria alolon buka geki.

²⁰Wani gabe nu vev avoan vevsera geki nu vevea be, “Nai mai n̄an darihou!” Uwe, Mwasigi, Ratahigi Jisas, mai darihou!

²¹Hogoi non Ratahigi Jisas na togo mai kimiu duluai. Amen.