Read Hano Visirai 3 Bible Online

Visirai 3 - Hano bible

Visirai 3

¹Gov rav noḡu avoana vi vano lalai enjel lol uloilua Sadis ba bevea be, “Geki roroi niniau gabe Vui gaibitu be ram mai nin God mai visiu gaibitu. Nam ilo hano be gim lolia; nam iloe be atatu ram bevea be gim rahu, take gin mate!

²Mwa du maragai be giv mamata. Rahumiu vi tu wasigi rahurahu kun amua. Huria be nam habwea be havanau be gim lolia, nu hav vavtutu tehe mai noḡu God.

³Giv vinihi dum silo vagahi be ran vagahi kimiu tuai aluna: giv vinihi mwasigi nia i giv van burigai nin vuromiu. Be gisav mamata tehe, nav mai huri kimiu kun gabe, atat surasura, i gisav ilo te dum mahavan taro gabe nai mai;

⁴take kimiu ata Sadis, gaiviha n̄an alolomiu be gaisagara ran melmelo, nora lalaḡova nu vavtutu. Giv lago bul maiau, i giv sagasagai gaisaga maita maiau huribe gin dadariha be giv lolia kunia.

⁵Kera gabe ram muramuraga lol taron bwaloana, rav sagasagai gaisaga maita kun geki, i nasav lai te dagai dum ihara nin bukan rahuana. Haḡe nai vev luae lolmatan Tata maira non ira enjel be, kera noḡu atatu.”

⁶“Be bweromiu abena, giv roron̄tai huri havanau gabe, Vui mwa bevea lalai ira uloilua!”

⁷Gov rava noḡu avoana vi vano lalai enjel lol uloilua Viladelvia ba bevea be, “Geki roroi nin wani gabe nu sabuga i nu mwasigi. Kea nu haḡo gaihavan̄i be non Deved, i mahavana gabe mwa havan̄ gatava gea, atatu vwate sihav goro te dumwia, i mahavana be mwa ḡoroe, atatu vwate sihav havan̄ te dumwia.

⁸Nam ilo alen̄amiu ata Viladelvia i nam iloe be nomiu muramura kolo n̄ano, take gim haḡo batugehi noḡu avoana, i gim hav sigi te ihaku be kimiu noḡu atatu. Nam havan̄ gatava lol matamiu, gabe atatu vwate sihav goro te dumwia.

⁹Giv roron̄tai! Huri tatan̄ana gea be bilan Setan, ira atat tentene gea be ram bevera be kera ira Jius, take ram dentene, inau nav lolira rav mai ba hiv bwaubwau lol bwalagemwa. I kera duluai rav iloe be, inau nam dabego.

¹⁰Bwatuna be kimiu gim du wasigi alun noḡu tatauleo, i nav gita ḡoro tavuhai kimiu mulei lol taro ririhai be mwa mai lol ureure be men lol ron̄ sinombu duluai ata lol ureure.

¹¹Nai mai mulei vilvilehi, giv gitaḡoro tavuhai havanau tehe gabe, gin laia huba, huria be atatu vwate sihav surainigo tehe alun tavwen nom rihu maragai.

¹²Nav lolira be ran muramuraga lol bwaloana rav mai gi gai mahan̄an imwa tataro alolon imwan noḡu God, i sihav derai te dumwia. I nav rav ihan noḡu God aluna, i ihan bwatutun ihan vanuan noḡu God, Jerusalem gara, gabe vi himai vai ata nin ute amare nin noḡu God. I nav rava ihaku mulei aluna, iha gara.”

¹³“Be bweromiu abena, giv roron̄tai huri havanau gabe Vui mwa bevea lalai ira uloilua!”

¹⁴Kea mwa bevea be, gov rava noḡu avoana lalai vanua Laodisia ba bevea be, “Geki noḡu avoana, gabe nam bev Amen lol tatauleo non God. Inau non gaitura vwate gabe nan mwasigi, i nam hav tul te burigai noḡu avoana. Inau bwatun ginau tau non God duluai.

¹⁵Nam ilo alen̄amiu huba ata Laodisia. Lol nomiu rovoḡa kun be gim hav hahavwani tehe i gim hav masisi tehe mulei, inau nav garigariau liu huri kimiu!

¹⁶Bwatuna be kimiu gim do ududui n̄an kun gabe gin aruarua dadariha i gin masis dadariha n̄an. Inau nav nogo nin kimiu kun gabe nam luai kimiu nin lolvwaku!

¹⁷Gim bevea be, ‘Inau nam rosoga liu, noḡu ginau duluai abena be nam doronia take gim hav iloe tehe be’, kimiu gim hiruga be gim hantai maragai, i gim davuha kun hanigi! Gim hiruga, gim la vuroi, i gim matagaraga.

¹⁸Nam bevea lalai kimiu, be giv vol rau vatan̄oga lalaiau, rau matan vatu be nu lol melmeloinia huba huria, be giv vora ratahigi rosoga. I giv vol gaisaga maita ba sagasagainia, i ba saga ḡoro nomiu busbusiana. Giv vol rau gabe wain mata ba daua la matamiu, huri be gov gita dum ute.

¹⁹Atatu gabe nam doron maragainira, nam av wasigi lalainira, i nam lai silo vevegi lalainira. Bwatuna gea, kimiu giv leahi binihimiu i giv van burigai nin vuromiu.

²⁰Giv roron̄tai! Inau nam du lolvwan gatava nam dorodoro; be ihei mwa ron̄ siloku i mwa havan̄ gatava, inau nav haroro lol imwana ba ḡan ginau bul maia, i kea vi gan ginau bul maiau.

²¹I lalainira be ram muramura, nav lai tanoi lalainira be rav tomahuri bul maiau lol tanon togotogon ratahigi, kun gabe inau nam muramura, i garigi inau bul mai Tamaḡu lol non tanon ratahigi.”

²²“Be bweromiu abena, giv roron̄tai huri havanau gabe Vui mwa bevea lalai ira uloilua!”