Read Hano Visirai 5 Bible Online

Visirai 5 - Hano bible

Visirai 5

¹Nan ḡita buka lulun̄i mwa eno la mwatuana gabe mwa dogo la tanon togotogon ratahigi; i ravrava nu masiri saraḡo alolona i avare, i nu goroan wasigi gin tigoro gaibitu.

²Haḡe nam ḡita enjel vwate mwa bato gin silo gaivua mwa bevea be, “Ihei nu dadariha be vi vugeri buk lulun̄i geki?”

³Take atatu vwate sigai nin amare, sa teti lol ureure, sa aten ureure be men vugeri buk lulun̄i ba ḡita lolona.

⁴Nam dei maragai bwatuna be atatu vwate mwa hav habweana tehe be kea nu dadariha be vi havan̄ buk lulun̄i ba men ḡita lolona.

⁵Haḡe vwate alolora ira bwatmetua mwa bevea lalaiau be, “Gosav dei tehe, gitae! Laion ata la varan Juda, gabe hou gaivua ata la varan Deved, kea nu muramura lol bwaloana, i vi roto dum lok gaibitu i vi vugeri buk lulun̄i.”

⁶Haḡe nam ḡita nitui sipsip mwa du boralolon tanon togotogon ratahigi, haḡe ginau rahu gaivasi ran dalisia mwa bulu mai ira bwatmetua. Haḡe nitui sipsip mwa bisirai kun be nu wehiana huba. I mauana i matana gaibibitui, i geki ira Vui non God gaibitu, gabe nu horana vai lol ureure duluai.

⁷Haḡe nitui sipsip mwa bano mwa lai dagai buk lulun̄i la mwatuana gabe mwa dogo la tanon togotogon ratahigi.

⁸I mahavana be mwa laia, ginau rahu gaivasi mai ira bwatmetua n̄avul gairua domwan gaivasi ram hiv bwaubwau goro nitui sipsip. I vatvatahara kasbol an̄oga ran masiri gin gaibonboni, gabe tataro duluai non sinombu non God.

⁹Ram lol iboi gara ram bevea be: “Giḡo gon dadariha be gov lai buk lulun̄i i gov roto tigoro huri buka be vi mavugeri. Huri be giḡo gon bwalo, i gin mateanan gin mateanan nom ron̄ ḡagarasi mwa boligo huri sinombu non God alun varan sinombu duluai, lalan̄an avoana, i lalan̄an vanua mai lalan̄an atatu be gulira dodolua.

¹⁰Gom lolira gi varan ira tataroi, be rav lalaḡoi God gida, i rav tomua lol ureure.”

¹¹Nam ḡitae i nam ron̄ silon ira enjel vasan̄vul vaivusi i tari vaivusi! Ram du dalis tanon togotogon ratahigi, ginau rahu gaivasi, mai ira bwatmetua,

¹²i ram lol iboi gin silo gaivua be: “Sipsip gabe nu wehiana, kea n̄an nu dadariha be vi lai tomuai i tavwe gaivua liu, mai mataisao i muramura, binihi marahi, sarisari i lol roroai!”

¹³I nam ron̄ ginau rahu duluai lol ute atamare, i teti lol ureure i aten ureure i lol tahi, i ginau rahu lol ureure duluai, ram lol iboi ram bevea be: “Lalainia gabe mwa dogo la tanon togotogon ratahigi i lalai nitui Sipsip tav lol roroainira, tav gogonainira, tav lol roroai ihara, i tai vev lua nora muramura, vai tuai tuai!”

¹⁴Haḡe ginau rahu gaivasi ram bwaliua be, “Amen!” Haḡe ira bwatmetua ram hovi vai ataa ram ḡogonainira.