Read Hano Visirai 6 Bible Online

Visirai 6 - Hano bible

Visirai 6

¹Nam gita nitui sipsip mwa n̄andu muan tigoro vwate alolon tigoro gaibitu be ram du alun buk lulun̄i gea, i nam ron̄ vwate alolon ira ginau rahu gaivasi mwa bevea gin silo gaivua kun silon bwahilo mwa bevea be, “Mai”.

²Nam ḡarere i nam ḡita hos maita. I atatu be mwa dogo aluna mwa haḡo ihu, i mwa dari gaisosorin bwatuna. Mwa rovo la hos kun atatu be nu muramura lol bwaloana huba, i mwa bano be men muramuraga mulei.

³Haḡe nitui sipsip mwa n̄andu gairuan tigoro; i nam ron̄ gairuan ginau rahu mwa bevea be, “Mai!”

⁴Hos vwate mwa bisirai mulei, nu memea. Atatu be mwa dogo aluna mwa lai muramura huri bwaloana vai lol ureure, huri be atatu rai wehi mulmuleinira sibora. Kea mwa haḡo buan bwaloana gaivua vwate.

⁵Haḡe nitui sipsip mwa n̄andu gaitolun tigoro; i nam ron̄ gaitolun ginau rahu mwa bevea be, “Mai!” nam ḡarere i nam gita hos meto vwate. I atatu be mwa dogo aluna mwa haḡo tovtovo lol limana.

⁶Nam ron̄ ginau be mwa datan̄i kun silo gabe mwa mwalue nin ginau rahu gaivasi, i mwa bevea be, “Tovtovon bereti huri homu be tovtovona nu dadariha huri gubwen̄ gaituvwa. I raisi be homuna nu dadariha huri gubwen̄ gaituvwa. Ta gov derai gai oliv mai gaon taligaon waen!”

⁷Haḡe nitui sipsip mwa n̄andu gaivasin tigoro; i nam ron̄ gaivasin ginau rahu mwa bevea be, “Mai!”

⁸Nam ḡarere, i nam ḡita hos vwate mulei mwa bisirai gulina nu vano huba kun gabe nu mate huba. I atatu be mwa dogo aluna, ihana mateana, i atatu vwate mulei be mwa huria, ihana be, Tanon Mateana. I God mwa lai muramura lalainira be raru vi wehi bamat udun sinombu be mwa dogo lol ureure, gin maro mai harova i ira ginau turu.

⁹Haḡe nitui sipsip mwa n̄andu gailiman tigoro. I nam ḡarere aten olta be ira vui be ran mate tuai huba huri avoana non God i ran tu wasigi, gi gaitura vaivotu nogonana.

¹⁰Ram haharigi gin silo gaivua ram bevea be, “Ratahigi God mwasin roron̄o, sabuga i mwasigi! Gosav mom hohovi tehe, goi vevegi sinombu ata lol ureure, ba lai silo vevegi lalainira, huri be ran wehi bamat kamai.”

¹¹“God nu saga ḡorora gin gaisaga maita vatvatahara, i mwa lai tanon mabuana vai tuai lalainira, vaivotu be atatu rituai be ran lol rovoga bul mai kimiu, sa ira tuamiu be mwa du be atatu ras wehi bamatera kun gabe ran wehi kimiu tuai. I mwa du be tovtovona huri kimiu duluai gea vi visirae amua.”

¹²Haḡe nam ḡita nitui sipsip mwa n̄andu gaionon tigoro. I sogai mwa ruru, i alo mwa metoga i mwa han̄oraga kun gaisaga meto, i vula mwa leahi kun daga mwa memea.

¹³I visiu ram hovi vai ataa lol ureure, kun gabe vwain vik be mwa hav mena te radu be lan̄i wasi mwa herei dulia vai lol tano.

¹⁴Haḡe mahao mwa mataltala kun gabe raun buk lulun̄i, i ira ute vusvusi duluai mai ira vusi ram dagatagara nin tanora.

¹⁵Haḡe ira ratahigi lavoa duluai ata lol ureure mai ira tomuai, ira rosoga mai muramura, i atatu dodolua mulei, ira turin rovoga i atat rahurahu ram hili duluai lol malan̄a i lol vatu la bobon bwabwa duluai.

¹⁶Ram uloulo lalai ira vusi mai ira vatu duluai be, “Hov haravui kamai ḡoro lolmatana be mwa dogo la tanon togotogon ratahigi, i nin lol horo non nitui sipsip!

¹⁷Gubwen̄ hantai huri nora lol horo teti kadogaha, i ihei haḡea vi bwalo dum ḡoroe?”.