Read Hatam NITRITI 1 Bible Online

NITRITI 1 - Hatam bible

NITRITI 1

¹Ei nimbie him ngat tirigi Allah kinyon ei nipai tes dihyeisi kin mpia-bbed him kin mun di joti nya hagomti,

²lene dihyeisi dini wer minu bigyo ba, jo sinsiou. Muk di roi sindem biam bidem dihyei nisurti-nipekti hagom ba, nidinditi di dindi-kai nggai kep hagom. Mpe dima ne Allah de nisindemti[1] ugwa-kwei ei minyei ngwa dip.

³ Lene Allah pai “Ma nipigati piga. Leu api nipigati piga.”

⁴Lene ningon llei sut nipigati di piga leu api Noni kwas nipigati leu nidinditi bijo ter leu yam.

⁵Ba, Noni jem nipigati ninyeng “Njap” lene jem nidinditi ninyeng “Mmun.” Nok rino mmun pren leu api njap tek ba, gima ne njap gi nigom ri.

⁶Lene Allah pai bu “Ma niban di bikwas minyei ei mpia ttou nsi can bijo ter leu yam tau.”

⁷Gima rino Noni pai tes niban di bikwas minyei ei mpia ttou nsi can ba, bihi jo bijehei lene bihi jo anai. Lene dem igbit nipaisi.

⁸Lene Noni jem niban di bikwas minyei leu yam dima ninyeng “Mpia-bbed Him”. Nok rino mmun pren leu api njap tek ba, gima ne njap gi nican ri.

⁹Leu api Allah pai bu “Ma minyei gi hi di jo ei mpia-bbed him nibehei pima biam sok yam ei gom leu binhyepo dihyei ninjek dip tau ei nibreisi.” Lene dem igbit nipaisi.

¹⁰Lene Noni jem dihyei ninggati dima ninyeng “Mam Bei” ba, jem minyei di biam sok yam ei gom ninyeng “Muk Ngei”. Lene ningon llei tirigi Noni ngat mun di Noni pai tes dima.

¹¹Leu api Allah pai bu “Ma njita di bon ningan kin biei di bon ningat kin ningan hagom hei bidem dihyei nisurti-nipekti hagom leu binhyepo ningan hei bidem ninyeng hagom.” Lene dem igbit nipaisi.

¹²Gima rino njita ngan kin biei ngat kin ningan hagom hei bidem dihyei nisurti-nipekti hagom. Lene Allah ningon llei tirigi ngat mun di Noni pai tes dima yok.

¹³Nok rino mmun pren leu api njap tek ba, gima ne njap gi niningai ri.

¹⁴Lene Allah pai bu “Ma nipigati nibousi nya tau hak ei mpia-bbed him leu binhyepo bikwas njap leu mmun ba, bindo igbit njap kin ari bingwam kin bed di biang hou kin bed di biang mpia ngei nijeisi nya hagom.

¹⁵Nipigati nibousi nya mipiga ei mpia-bbed him ba, com digai dihyeisi.” Lene dem igbit nipaisi.

¹⁶Nok gima lene Allah pai tes nipigati nibousi di nindig ningat can. Gi hi di mpia njap di nindig bibor rinok nibousi mem njap lene gi hi di bed mmun di nindig lai-lai de rinok nibousi mem mmun. Lene Noni pai tes ham mpia-bbed him cem hagom.

¹⁷Lene Noni kon nipigati nibousi ningat can dima hacem ei mpia-bbed him leu binhyepo com digai dihyeisi.

¹⁸Ba, nipigati nibousi nya hi nok nibousi mem njap lene hi nok nibousi mem mmun. Leu binhyepo kwas nipigati ter leu nidinditi. Leu api Allah ningon llei tirigi ngat mun di Noni pai tes dima yok.

¹⁹Nok rino mmun pren leu api njap tek ba, gima ne njap gi nibitai ri.

²⁰Lene Allah pai bu “Ma wau nya kin mun di ha minyei kan nya hagom ngwig ei muk ngeisi ba, ha nya hagom dimba-dimba nyen ei hou him.”

²¹Gima rino Allah pai tes mindhe-ndhe di nindig krop di igyaijo ei muk jou kin mindhe-ndhe hi gom hi gom di igyaijo ei minyeisi kin ha nya hi gom hi gom cem. Lene ningon llei bibor tirigi ngat mun di Noni pai tes dima yok.

²²Lene Noni njei mun di kei bak mun dima yok hagom bipai bak mun di igyaijo ei minyeisi “Suar jidigek kep muk ngeisi nisurti-nipekti hagom.” Lene pai bak ha nya cem “Suar jidigek ba, jimangti kum eisi kikau.”

²³Nok rino mmun pren leu api njap tek ba, gima ne njap gi nimuhwi ri.

²⁴Lene Allah pai “Ma mindhe-ndhe nya igya bidem dihyei nisurti-nipekti hagom leu binhyepo idigek kep mpia. Gi hi di bong bigbehei nya kin gi hi di tungwatu nya ighyen kep nya cem gi nindig nya kin nimien nya hagom.” Lene dem igbit nipaisi.

²⁵Gima rino Noni pai tes mindhe-ndhe nya bitug kep dihyeisi hagom ba, ningon llei tirigi ngat mun di Noni pai tes dima yok.

²⁶Lene Allah pai bu “Nogindini ma ipai tes tungwatu nya noyam kin nyeni ba, idat nyeti. Leu binhyepo inyeng tak kep wau nya kin ha nya kin mindhe-ndhe nindigsi nya hagom. Gi hi di tungwatu nya ighyen kep kin gi hi di ibong bigbehei nya kin gi nindig nya kin nimien nya cem hagom.”

²⁷ Gima rino Allah pai tes tungwatu nya ba, bingon noyam kin Nonti. Noni pai tes no di pinai kin no di sop cem.

²⁸Lene Noni njei mun di kei bak yoni bipai “Ma jiyai jimunggwom bat nya imang bibor leu binhyepo jide nintun him yamti di bram yam nya midigek kep mpia bikieng kep dihyei nisurti-nipekti binyohou hagom. Dita jeni bijinyeng tak kep wau nya kin ha nya kin mindhe-ndhe di ibong bigbehei nya hagom.

²⁹Lewo dipai tes njita di bon ningan kin ningat kin biei ngat di bon ningan cem hagom bije nok jide njita.

³⁰Noro mem mindhe-ndhe nya kin ha nya hagom lene dipai tes mintu-minta kin mahai meng hagom bigyem nok ide njita.” Lene dem igbit nipaisi.

³¹Lene Allah ngig niyai kep mun di Noni pai tes nya hagom ba, ningon llei bibor. Nok rino mmun pren leu api njap tek ba, gima ne njap gi nimuhwindagom ri.