Read Hatam NITRITI 11 Bible Online

NITRITI 11 - Hatam bible

NITRITI 11

¹Habiei ei nimbie him lene tungwatu dihyeisi dini hagom imbrap nihyet gom ngat bimiap yam hyet.

²Tirigi yoni ibong-bong wai bidem minu dima ei nite bei mpia nipriti lene ikwei krau briep bou him di nyan bibor ei minu Babilonia biwin ide minu ndig ei sirima.

³Lene ipai biyam “Jikwei ba, iba igtuyap bibon tig mma lene indig kep hum binggwes kei.” Gima rino iba igtuyap bibon tig mma mem ibingot ig leu api iba aspal ningei bikingkrai kin yam.

⁴Lene ipai biyam bu “Jikwei ba, iwin minu ndig nijep bu bitut ig di ibon ninggre di jo-jo yam dip anai kui sur mpia-bbed him. Leu binhyepo ibiyai inyeng di jei ba, intek gimahap bidem dihyei nisurti-nipekti hagom bi.”

⁵Lene TUHAN juk kwei leu gwamti bingat tungwatu nya ide minu ndig di nijep bitut ig di ibon ninggre di jo-jo yam dip anai di timiei dihyeisi dini ingot bou inda him.

⁶Lene Noni kan “Yo dini inok mben gom ba, imbrap ighyet gom ngat cem ba, sindi ikinyon ei igyai munti nya bit leu ingon kanti. Jei bi lene isindem mem igyai mun nyeng hagom bit leu ingon kanti bu ug ri.

⁷Nna ba nyeni nihwou ndam yok ba, ninggek tut ighyet leu binhyepo imiap yam hyet bu bi.”

⁸Gima rino TUHAN bindei ba, tungwatu nya yahagom intek gimahap bikieng kep dihyei nisurti-nipekti hagom leu lene ikes inda tut ide minu ndig di iwin pima.

⁹Gima rino tungwatu nya ijem minu ndig dima ninyeng Babel lewo TUHAN nggek tut tungwatu dihyeisi dini yahagom ighyet ei sirima leu api gima bindei ba, yahagom intek gimahap ug ei dihyei nisurti-nipekti hagom.

¹⁰Daptar dini tibim tut Sem de nintun him yamti di bram yam nya inyenga. Tirigi minyei pingge leu dihyei ninjek dip ug ei ari bingwam can tu ba, Sem de njap ug ei ari bingwam sratus gom leu api noni yai nipmot Arpakhsad.

¹¹Sem yai Arpakhsad leu api nide njap ug ei ari bingwam sratus muhwi bu ba, noni yai nipmot bat nya hi kin bu.

¹²Tirigi Arpakhsad de njap ug ei ari bingwam ningot ningai ba, muhwi leu api noni yai nipmot Selah.

¹³Arpakhsad yai Selah leu api nide njap ug ei ari bingwam sratus bitai ba, ningai bu ba, noni yai nipmot bat nya hi kin bu.

¹⁴Tirigi Selah de njap ug ei ari bingwam ningot ningai leu api noni yai nipmot Eber.

¹⁵Selah yai Eber leu api nide njap ug ei ari bingwam sratus bitai ba, ningai bu ba, noni yai nipmot bat nya hi kin bu.

¹⁶Tirigi Eber de njap ug ei ari bingwam ningot ningai ba, bitai leu api noni yai nipmot Peleg.

¹⁷Eber yai Peleg leu api nide njap ug ei ari bingwam sratus bitai ningot ningai bu ba, noni yai nipmot bat nya hi kin bu.

¹⁸Tirigi Peleg de njap ug ei ari bingwam ningot ningai leu api noni yai nipmot Reu.

¹⁹Peleg yai Reu leu api nide njap ug ei ari bingwam sratus can ba, muhwindatai bu ba, noni yai nipmot bat nya hi kin bu.

²⁰Tirigi Reu de njap ug ei ari bingwam ningot ningai ba, can leu api noni yai nipmot Serug.

²¹Reu yai Serug leu api nide njap ug ei ari bingwam sratus can ba, muhwindacan bu ba, noni yai nipmot bat nya hi kin bu.

²²Tirigi Serug de njap ug ei ari bingwam ningot ningai leu api noni yai nipmot Nahor.

²³Serug yai Nahor leu api nide njap ug ei ari bingwam sratus can bu ba, noni yai nipmot bat nya hi kin bu.

²⁴Tirigi Nahor de njap ug ei ari bingwam ningot can ba, muhwindatai leu api noni yai nipmot Terah.

²⁵Nahor yai Terah leu api nide njap ug ei ari bingwam sratus gom ba, simnaimuhwidip brimigtehibitai bu ba, noni yai nipmot bat nya hi kin bu.

²⁶Tirigi Terah de njap ug ei ari bingwam ningot muhwindacan leu api noni yai nipmot bat nya di inyeng rino Abram kin Nahor kin Haran.

²⁷Daptar dini tibim tut Terah de nintun him yamti di bram yam nya inyenga. Nipmot bat nya inyeng rino Abram kin Nahor kin Haran ba, Haran yai nipmot Lot ba,

²⁸Haran mai ei nitimieisi ei minu ndig Ur ei minu Babilonia mpe dino nicig niyaijo yo.

²⁹Lene Abram wak nitnem Sarai ba, Nahor wak nitnem Milka di Haran nipmisop lene Haran yai nipmot gom bu di ninyeng Yiska.

³⁰Lene Sarai pijet ba, bit bon yai munggwom kan bi.

³¹Mpe dima lene Terah hei sut nipmot Abram kin nignyon Lot di Haran nipmot kin Abram nitnem di Sarai leu api ijo leu minu ndig Ur ei minu Babilonia bihigom ba, yuug ei minu Kanaan. Tirigi ikwei krau puig sinon ei minu Haran lene ibong hak ei sirima.

³²Terah de njap ug ei ari bingwam sratus can ba, muhwi leu api noni mai ei minu Haran.