Read Hatam NITRITI 13 Bible Online

NITRITI 13 - Hatam bible

NITRITI 13

¹Lene Abram jo leu minu Mesir ba, nitnem yoni ingkwei hanyen ug ei minu Kanaan de hanjop ei nite bei mpia nibiho. Noni mbut tut nide mun di nyeng tut nya hagom ba, Lot cem bit.

²Abram nyeng bibor binyeng tut domba nya kin kambir nya kin sapi nya hagom mang bibor bitut perak kin mas.

³Noni bong-bong nyen kak puig sinon ndam minu ndig Betel bingkwei hanyen ug ei nide igkumti ei Betel kin Ai ikieti ba,

⁴tau kep nimbar hum dok po bon pima lene kuk no bak TUHAN hanyen bu ei sirima.

⁵Mpe dima lene Lot cem nyeng tut domba nya kin kambir nya kin sapi nya hagom mang bibor ba, bon nide ig bei nsi nya kin nide awak nya.

⁶Apino bit bon hanjop nsi dima bon nibresti bitut mintu-minta nok gi dem mem yo cin dini kin ide mindhe-ndhe nya ibong eisi kan bi.

⁷Apino yo di ighyen kep Abram de mindhe-ndhe nya kin yo di ighyen kep Lot de mindhe-ndhe nya igbroi yam. (Mpe dima lene mben Kanaan kin mben Feris igya bidem minu dima hagom.)

⁸Lene Abram pai bak Lot “Sani ne adig-ajoi rin ba, dem mem ade awak nya kin ditde awak nya igbroi yam bi.

⁹Gima rino ma sikwas yam hak ug. Ando igbit hanjop nsi di angon ngakei. Gino aug ei gimu lene da duug ei guhu.”

¹⁰ Lene Lot cap ser minu dima bingat mbang briep ndig ei Yordan nyai bingat lo, bon minyei nimangti kikau ug bipek minu ndig Zoar ba, noyam kin TUHAN de miai[10] kin minu Mesir cem. (Minu dima hagom nok gima nipou tirigi TUHAN cok tut Sodom kin Gomora bigyo.)

¹¹Gima rino Lot ndo mbang briep ndig ei Yordan nyai nok nide hanjop nsi leu api ikwas yam ba, Lot ug ei nite bei mpia nipriti.

¹²Abram gwam bibong hak ei minu Kanaan lo, Lot ba nide prak meng bohok ig jibei ei minu ndig ngot ei mbang briep ndig Yordan kikau ba, ug ei dideu Sodom.

¹³Mpe dima lene timiei minu ndig Sodom nya imbuk bibor ba, ibon sisar tut TUHAN.

¹⁴Niabiati Lot mbut tu lene TUHAN pai bak Abram “Ma aya ayati leu api acap ser minu dini hagom ei nite bei mpia nipriti kikau ug ei nite bei mpia nicutti ei nite bei mpia nijjai kikau ug ei nite bei mpia nibiho.

¹⁵ Leu mporo midipek hanjop nsi di acap ser dima yok hagom bina kin ade nintun him yamti di bram yam nya cem bijo ninno bijo kikau.

¹⁶Midibindei ba, ade nintun him yamti di bram yam nya mporo midigek kep mpia. Ningat ne bit bon tungwatu nya ikwop dihyei ndung nimangti kan bi. Bit bon ikwop yo di intun nani him imangti kan bi.

¹⁷Nogindini ma ambut bidem minu dini nisurti-nipekti hagom leu mporo midiyai hagom bina yo.”

¹⁸Gima rino Abram llet nide prak meng yati bimbut tut bohok hanyen ei biei pigig nghousi di ninyeng Mamre di tungwatu nya ipigig ser mem ide kwar di ikuk yok bak nya dideu Hebron. Lene noni dingug tig nindig bijo-jo yam dip nok nimbar hum dok mem binggei sut TUHAN.