Read Hatam NITRITI 15 Bible Online

NITRITI 15 - Hatam bible

NITRITI 15

¹Mpe hi bu lene Abram ngat-hi-ngat bimiap TUHAN nihyet di pai binoni “Abram e, attin au. Lewo midinyohou nani leu mun di kinei hagom leu api midiyai mun di kei nindig bibor binani yo.”

²Lene Abram buhup “TUHAN Di Ninyeng Jei Bibor e, midinggon ndei gi kei nindig bibor di ayai bida dima i? Lewo diyai dimunggwom hi bi ba, ditde awak di Eliezer leu Damsyik mporo miba nokep ditde ndigban hagom.

³Abindei ba, dibon dimunggwom bat nya hi bi. Gima rino ditde awak miba nokep mun di dinyeng tut hagom.”

⁴Lene Abram miap TUHAN nihyet di pai binoni “Ade awak miba nokep mun di anyeng tut nya bi. Noro nanti apmot mporo miba nokep hagom.”

⁵ Lene TUHAN buwak Abram ug ei nisai leu api pai binoni “Ma acap ser mpia-bbed him bibou akwop bidem ham mpia-bbed him nya nimangti hagom ug e. Lewo ade nintun him yamti di bram yam nya imangti midem kep ham dima yok hagom nimangti.”

⁶ Lene Abram ba ningon com TUHAN. Gima rino TUHAN joi sut noni nok no di pwoi TUHAN ningona.

⁷Lene TUHAN pai binoni “Dani ne TUHAN rin ba, dibuwak nani kwei leu atimieisi ei minu ndig Ur ei minu Babilonia leu binhyepo dipek minu dini hagom bina nok ade hanjop nsi.”

⁸Lene Abram buhup “TUHAN Di Ninyeng Jei Bibor e, notou midikan tut bipia diba dakep minu dini hagom i?”

⁹Lene TUHAN buhup “Ma ajem sapi niwek hi kin kambir niwek hi nikre hi di ide njap ug ei ari bingwam ningai kwei ba, abikrau kin ha tekukur nibo gom kin hakimoi mbrei nindig nibo gom kwei biDa.”

¹⁰Lene Abram jem mindhe-ndhe dima yok kwei leu api bui bisrat hacan leu api dimig nite hi hammi yam bibuhup yam ei nipuig can noro noni srat ha nya bi.

¹¹Lene ha di nok hacam krubri nya idwop kwei biteu eisi noro Abram jji yok leu.

¹² Tirigi mpia sindi cut niti lene Abram bong mai apino ttin nindig ba, ningon nde bibor.

¹³ Leu api TUHAN pai binoni “Ei nidipti bu lene ade nintun him yamti di bram yam nya mporo minok awak ei ingkiaisi ba, ngkiai ico kep yok nindig bibor kikau mem nijam ari bingwam sratus bitai.

¹⁴ Noro midikes hukum ei ngkiai dima yok dip drek dip gi ico kep yo di intun nani him binok awak nya. Mpe dino yo di intun nani him imbut leu ingkiaisi lene yoni mittei ndigban nindig bibor bikwei sut.

¹⁵Ade njap mijei bibor ba, ug ei ade njap ningwig honti lene amai kin angon di jo nyahan leu api ade bat nya itig angut ei dihyeiti.

¹⁶Lene ei nidipti bu mem nijam di agnyon bat nya ignyon bat nya igyaijo lene ade nintun him yamti di bram yam nya mporo mingkwei hanyen ei sirini. Lewo midijji mben Amori leu minu dini bigyo bibou ikum ei ide nimbukti nindig bibor bu ug e leu api mpe dima lene midikes hukum ei yok dip.”

¹⁷Tirigi TUHAN pai nok lene mpia jinjui su ba, mun di nok tong nsi tut hum mmup di ndok bibor kin hyem njeng cem tau kros kwei bidwim njiriek mikwau nipuig can pima nikieti.

¹⁸ Mpe dima lene TUHAN preu ei bit Abram bipai “Dipreu ei mem ade nintun him yamti di bram yam nya bipia mporo midipek minu dini hagom biyok binok ide hanjop nsi. Hanjop nsi dini ninyanti leu minu Mesir nikwas yamti kikau ug bipek Minyei Efrat.

¹⁹Bitut mben Keni kin Kenas kin Kadmon,

²⁰kin mben Het kin mben Feris kin mben Refaim,

²¹kin mben Amori kin mben Kanaan kin mben Girgasi kin mben Yebus yahagom itimieisi.”