Read Hatam NITRITI 16 Bible Online

NITRITI 16 - Hatam bible

NITRITI 16

¹Lene Sarai no pijet yo ba, yai nimunggwom hi bigyo. Noni bon nide awak sop Hagar di mben Mesir.

²Lene Sarai pai bak Abram “TUHAN tak kep da bidiyai dimunggwom hi bigyo. Gima rino ma ayem njita tut awak de dima. Mpaba noni miyai nimunggwom hi bida e?” Lene Abram ce tut nitnem nihyet nghwak him.

³Gima rino Sarai ndo Hagar bak Abram binok nitnem ndrim. Mun dini pek kep mem Abram niabiati noni bong ei minu Kanaan mem nijam ari bingwam simnai tu.

⁴Lene Abram yem njita tut Hagar apino Hagar nghop. Tirigi kan tut gi nghop tu lene ningon jei biningwes pri gau Sarai.

⁵Gima rino Sarai nso tut bak Abram bipai “Nani rino abindei ba, Hagar ningwes pri gau da.[11] Dindo noni bina ba, tirigi noni kan lo, nghop tu lene ningwes pri gau da kikau kwei bipek ammani kep. Nna ba TUHAN mbus singonti leu binhyepo jo nibreisi tut tou leu sani di bon mun di igbit.”

⁶Lene Abram buhup “Nna ba noni ne ade awak rin ba, anyeng tak kep noni. Abon mun igbit angon kanti bitut noni hak ug.” Lene Sarai sibut tut Hagar nindig bibor apino Hagar nang leu.

⁷Lene TUHAN de malaikati tau kep noni ei iggum ndigsi tirigi dut minyei leu minyei bousi di jo kak puig di ug ei Syur ba,

⁸hig ser noni “Hagar na di Sarai de awak e, akwei leu hantou i? Ba, aug ei hantou bu i?” Lene Hagar buhup “Dinang leu sop ndig di Sarai.”

⁹Lene malaikati dima pai bak “Ma angkwei hanyen ndam ade sop ndig dima ba, aba abou coi mem nihyet.”

¹⁰Lene binut nihyet bu bipai “Mporo midibindei ba, ade nintun him yamti di bram yam nya idigek kep mpia ba, bit bon tungwatu nya ikwop imangti kan bi.

¹¹Jei bi lene ayai apmot lene ma ajem ninyeng Ismael lewo TUHAN miap ahyet tirigi po aba ayai nggwei bahara pima.

¹²Noro apmot niyai munti nya midem kep nok keledai di bit bon ipijuk kan bi ba, noni srep tut yahagom lene yahagom isrep tut noni. Noni mimbres nonti leu nide bat nya yahagom bibong ter.”

¹³Lene Hagar hig ningon eisi bikan “Singat Allah bou siyai him tu lo, simai bigyo!” Gima rino noni jem TUHAN di mbrap bit noni pima ninyeng Allah Di Ngig Niyai Kep Da.

¹⁴Apino tungwatu nya ijem minyei bousi ei Kades kin Bered ikieti dima ninyeng “No Di Niyaijo Di Ngig Niyai Kep Da”.

¹⁵ Lene Hagar gwam tut nipmot bak Abram leu api Abram jem ninyeng Ismael.

¹⁶Mpe dima lene Abram de njap ug ei ari bingwam ningot muhwindaningai ba, muhwindagom.