Read Hatam NITRITI 17 Bible Online

NITRITI 17 - Hatam bible

NITRITI 17

¹Tirigi Abram de njap ug ei ari bingwam ningot muhwindatai ba, muhwindatai lene TUHAN tau kep noni bipai bak “Dani ne Allah Di Sindem Bibor ri. Ma abit dihyet ba, ayai mun bit leu dingon kanti kikau cem.

²Midibon gi preu bit nani. Midibindei ba, ade nintun him yamti di bram yam nya imang bibor.”

³Lene Abram kuk no biba ningwak bikik dihyei leu api Allah pai binoni,

⁴“Dipreu ei bit na bipia mporo midibindei ba, anok pung di mben imang bibor intun him.

⁵ Gima rino tungwatu nya mijem anyeng Abram bu bi lewo anyeng nijep rino Abraham.

⁶Midibindei ba, ade nintun him yamti di bram yam nya imangti ningot ndig apino ibihi igyai inyeng nibou ndig. Midibindei ba, anok pung di mben imang bibor intun him.

⁷ Dani midiyai bipek kep gi preu po di dipreu ei bit nani kin ade nintun him yamti di bram yam nya cem ba, gima ne gi preu di ngkiem bibor bijo ninno bijo kikau ri. Midinok ade Allah kin yo di intun nani him cem ide Allah.

⁸ Mbro nok gino abong angkiaisi ei minu Kanaan dini lo, mporo midiyai minu dini leu nisurti-nipekti hagom binani kin ade nintun him yamti di bram yam nya bijo ninno bijo kikau bidinok ide Allah ri.”

⁹Lene Allah pai bak Abraham bu “Suar nani kin ade nintun him yamti di bram yam nya jahagom jikrau kep gi preu dini kikau.

¹⁰ Suar nani kin ade nintun him yamti di pinai nya di bram yam nya yahagom igyai nibon midut sunat.

¹¹Suar jahagom jiyai nibon midut sunat nok mun di bindo tut Ditde gi preu di dipreu ei bit na.

¹²Hon kep ammani kui lene suar jipmot bat nya di ide njap ug ei njap muhwindaningai igyai nibon midut sunat ba, bitut jenti kin jide awak ei jide ig bei nsi kin awak di jiba mitiei wim yok leu ngkiai nya cem jahagom. Lewo nibon midut sunat ndo tut Ditde gi preu di dipreu ei bit je.

¹³Suar bikwop tungwagom-gom yai nibon midut sunat nok bindo ei jingutti di bindo bipia Ditde gi preu bit jeni dima jo kikau.

¹⁴Bikwop pinai tou rino yai nibon midut sunat bi lene noni minok Ditde limwa bu bi lewo noni krau kep gi preu dima bi.”

¹⁵Lene Allah pai bak Abraham bu “Ma ajem atnem ninyeng Sarai bu au. Hon kep ammani kui lene ninyeng rino Sara.

¹⁶Midinjei mun di kei bak noni leu api dibindei ba, noni migwam tut apmot gom bina. Midinjei mun di kei bak noni ba, noni minok pung nipmem di mben imang bibor intun him apino nide nintun him yamti di bram yam nya ibihi igyai inyeng nibou ndig.”

¹⁷Lene Abraham kuk no biba ningwak bikik dihyei leu api pa tut tirigi kan “Bit bon no di nide njap ug ei ari bingwam sratus gom yai nimunggwom kan bi. Bit bon Sara di nide njap ug ei ari bingwam ningot muhwindatai yai nimunggwom kan bi.”

¹⁸Gima rino noni hig ser Allah “Nggon rino asindui sut Ismael ba, nonti ba nokep mun di apreu ei bit da bi i?”

¹⁹Noro Allah srep “Atnem Sara migwam tut apmot bina leu api ma ajem ninyeng Ishak. Midikrau kep Ditde gi preu ei bit na dima tug hon nide nintun him yamti di bram yam nya bijo ninno bijo kikau. Nipreu eisi dima ug hon nohonti bi sren.

²⁰Dimiap ahyet tirigi ahara Da tut Ismael tu. Mporo midinjei mun di kei bak noni leu api noni bon nimunggwom bat nya ba, nide nintun him yamti di bram yam nya idigek kep mpia. Noni minok pung di minir nya ibou simnaibrimigcan intun him. Midibindei ba, nide mben idigek kep mpia.

²¹Noro gi po dipreu ei bit na pima mitug hon apmot Ishak ri. Sara migwam tut noni ei ari bingwam gi dip noyam kin bed dini.”

²²Tirigi Allah kes nihyet hon tu lene Noni kes Abraham bimbut leu.

²³Njap gom ndia lene Abraham ba sunat nipmot Ismael kin pinai nindigsi nya bitut nide awak nya ei nide ig bei nsi kin nide awak di noni ba mitiei biwim yok yahagom.

²⁴Tirigi Abraham de njap ug ei ari bingwam ningot muhwindatai ba, muhwindatai lene noni yai nibon midut sunat.

²⁵Ba, tirigi Ismael de njap ug ei ari bingwam simnaibrimigningai lene noni cem yai nibon midut sunat.

²⁶Ei njap gom ndia lene yahacem igyai nibon midut sunat.

²⁷Ba, Abraham de awak pinai nya yahagom igyai nibon midut sunat bit noni.