Read Hatam NITRITI 2 Bible Online

NITRITI 2 - Hatam bible

NITRITI 2

¹Nok gima lene nipai tes mpia-bbed him kin dihyeisi kin mun di joti nya hagom put tu.

² Ug ei njap gi nimuhwindacan lene Allah yai Nide midyai nya hagom biput leu api kes ninda tut.

³Lene Noni yai gi kei bak njap gi nimuhwindacan dima bipai sut bipia bon ninyeng ba, ndo nok njap nindig di ikuk nye bak Allah lewo ei njap dima ne Noni kes ninda tut midyai tirigi Nide midyai put leu su.

⁴Nok gima tut gi ipui sut mpia-bbed him kin dihyeisi dini kin mun di joti nya hagom tirigi Allah pai tes nya. Tirigi po TUHAN Allah pai tes mpia-bbed him kin dihyeisi dini kin mun di joti nya hagom pima lene,

⁵njita kioi hei ei dihyeisi bigyo lewo Noni pai tes mpia di but kin tungwatu nya mem igyai miai bigyo.

⁶Noro minyei nggou tau hak kwei leu dihyei jou biprok dihyei ninjek dip hagom.

⁷ Mpe dima lene TUHAN Allah kam dihyei ndung poi mien ba, op nok tungwatu leu api hi ninnei di bindei niyaijo ei nuhwap nsi apino tungwatu dima yai niyaijo.

⁸Lene TUHAN Allah pek hanjop ei minu Eden ndam mpia nipriti bipai tes miai leu api kes tungwatu di bon pima eisi.

⁹ Noni bindei ba, biei di kei-kau di ngat ningat di kei bibor bikwop ninyeng hagom hei ei miaisi. Lene Noni ta biei di bindei dino tungwatu nya igyaijo kikau kin biei di bindei dino tungwatu nya ingon dor niti tut gi kei nya kin gi kinei nya.[2] Noni ta biei dini hacem ei miai ninggimau.

¹⁰Lene minyei bousi gom biam kwei leu Eden biyai ningei bak miai handi dima hagom bikwas ninggram bitaisi ei Eden nisai.

¹¹Minyei ninggram gi nigom rino Pison biam kikau bibikrop tai minu Hawila.

¹²Handi dima mas di nibok kak bibor nibousi kin mini mbris di nibok kak kin tig permata no jo a.

¹³Lene minyei ninggram gi nican rino Gihon biam kikau bibikrop tai minu Kus.[3]

¹⁴Lene minyei ninggram gi niningai rino Tigris biam ei minu Asyur nite bei mpia nipriti. Lene minyei ninggram gi nibitai ninyeng rino Efrat.

¹⁵Lene TUHAN Allah kes tungwatu pima ei miai Eden leu binhyepo yai miai eisi binyohou.

¹⁶Lene Noni sok kep tungwatu bipai “Disindui sut na ba, apuk biei ngat ei miaisi dini hagom ba, ayem bit leu angon kanti.

¹⁷Noro harin dima apuk biei ngat di bindei tungwatu nya ingon dor niti tut gi kei nya kin gi kinei nya ba, ayem a. Leu gino ayem biei ngat dima lene amai hak mem njap dima.”

¹⁸Lene TUHAN Allah pai bu “Tungwatu bong binongkom lene gini kei bi. Midibon nisut gom di dem mem gima mpu noni.”

¹⁹Gima rino Noni kam dihyei ndung poi mien ba, op nok mindhe-ndhe mambei nya kin ha nya ei hou him hagom leu api jem hagom kwei bak tungwatu dima mem gima ngat ninyeng dima miyai bak mindhe-ndhe dima yok. Mpe dima lene sindi nitriti mem mindhe-ndhe di itug kep dihyeisi kin hou him hagom igyai inyeng ri.

²⁰Gima rino tungwatu yai ninyeng bak mindhe-ndhe di idigek kep dihyeisi kin hou him hagom. Noro hi dem noni haigtu nok nisut mem gi mpu noni bi.

²¹Lene TUHAN Allah bindei ba, tungwatu dima niiman buhun bibong mai leu api Noni kus ninggang njum gom tirigi bong mai leu leu api ba ninghui bittem kep ser nibokti hanyen.

²²Lene Noni ba ninggang njum dima bibon sop gom bibuwak noni kwei bak tungwatu dima.

²³Lene tungwatu dima pai “Niri! No dini noyam kin dani ba, ninjum leu da dinjum lene ninghui leu da dinghui ri. Midijem ninyeng “No di sop” lewo Allah kus noni leu no di pinai.”[4]

²⁴ Gima rino no di pinai mikes nicig nipmem nya ei ba, nitnem yoni ibong gom leu binhyepo yahacem inok gom.

²⁵Mpe dima lene no di pinai kin no di sop yahacem ingat ngu noro immai sut bi.