Read Hatam NITRITI 21 Bible Online

NITRITI 21 - Hatam bible

NITRITI 21

¹Lene TUHAN njei mun di kei bak Sara bit leu nok noni preu sut ei mem noni nipou su.

² Dem igbit tto bou di Allah preu ei nipou su lene Sara tta buhun bigwam tut munggwom pinai bak Abraham tirigi noni wer andig-ndau su.

³Lene Abraham jem nipmot ninyeng Ishak.

⁴ Tirigi Ishak de njap ug ei njap muhwindaningai lene Abraham bon midut sunat ei ningutti bit leu nok Allah nicuk noti.

⁵Gima rino Abraham yai nipmot Ishak tirigi nide njap ug ei ari bingwam sratus gom.

⁶Lene Sara pai “Allah bindei bidiba dingon llei bibor bipa tut. Bikwop tungwa tou rino miap dinghapti tut dingon llei biborti lene noni miba ningon di llei bibor bipa bit dani bu.”

⁷Lene noni binut bu bipai “Nipou pini jug tou ripai bak Abraham bipia Sara miyai do bak nimunggwom i? Noro diyai munggwom pinai binoni tirigi noni wer andig-ndau su.”

⁸Tirigi Abraham nipmot wer ndig nut bidut do bu bi lene nicig bon pesta nindig bibor kep noni.

⁹Mpe di gom lene Ismael di Abraham kin Hagar po mben Mesir pima ipmot kek bit[14] Ishak di Sara nipmot.

¹⁰ Tirigi Sara ngat yok lene nso tut bak Abraham bipai “Suar acom sop di awak dimo nipmot yoni leu binhyepo nipmot miba nokep ade ndigban ndrim hi bi. Lewo suar dipmot Ishak ba nokep hagom.”

¹¹Lene Abraham ningon buhun tut Sara nicuk noti lewo Ismael cem nipmot ri.

¹² Noro Allah pai binoni “Dwai. Ma angon bos-bos nyen tut apmot kin awak di Hagar au. Ma ayai hagom bit leu nok Sara nicuk nati lewo ade nintun him yamti di bram yam nya po dipreu ei mem na pima yahagom mintun Ishak him.

¹³Midibindei ba, yo di intun awak dima nipmot him idigek kep mpia ba, inok mben nindig bibor. Lewo Ismael cem apmot ri.”

¹⁴Njapti kui lene Abraham yai njita kin aigmui mindhe ngkek tut minyei di joti cem mem igyem kak puig sinon bak Hagar leu api kon Ismael ei Hagar ninghim lene cuk sop dima buug hak. Lene Hagar mbut-mbut wai ei iggum ndigsi gom ei Bersyeba.

¹⁵Tirigi ide minyei ngwig leu yok tu lene Hagar kuk nipmot ei war behei.

¹⁶Lene pri bikuk no bigwam ei ting nok meter sratus gom leu api kan “Ayo! Siyai kou gima singat mot side dima mai o! Pai nok lene niyai nggwei kibor.”

¹⁷Lene Allah miap Hagar nipmot Ismael di pim leu api malaikati Allah de nihyet tibim kwei leu mpia-bbed him bipai Hagar e, Hagar e, apim tut nggon i? Ma attin bu au lewo Allah miap apmot nihyet tu.

¹⁸Akiju ba, akon apmot hanyen ba, apai-hi-paisi leu mporo midibindei ba, nide nintun him yamti di bram yam nya nok mben nindig bibor.

¹⁹Lene Allah piga Hagar niyai bibindei ba, noni ngat minyei bousi gom. Gima rino ba aigmui pima bitau minyei hi bak nipmot bidut.

²⁰Lene Allah nyohou Ismael ba, noni bindig nut lene bong-bong wai ei iggum ndigsi ei Paran. Mimbrek-mimbrek lene noni nok no di ngim igkei.

²¹Lene nipmem ug buwak sop Mesir hi ba, ndo bak nok nitnem.

²² Mpe dima lene Abimelekh kin Pikhol di nibou tentara ikwei ngat Abraham bipai binoni “Ningat ne Allah nyohou na bisindem tut na mem gima ayai ade midyai nya hagom.

²³Gima rino ma aheng bidani ei hanni ei Allah Noho bei bipia mporo aris bidani kin ditde nintun him yamti di bram yam nya bi sren. Lewo dipwoi angon ninno tu. Gima rino ma apwoi dingon ba, anyohou ditde minu di dinyeng tak kep dini cem lewo apek hanjop nsi ei angkiaisi dini ninno tu.”

²⁴Lene Abraham ce bipai “Diba neheng bipreu kep na bit leu angon kanti.”

²⁵Lene noni nso Abimelekh tut minyei bousi gom di Abimelekh de awak nya iba imbuk bisrin ser tu.

²⁶Lene Abimelekh buhup “Dikan tut yo di isrin ser minyei bousi dima bi. Lewo ambot kep tut bida bi sren ba, sindi nogindini api apai sut bida dini.”

²⁷Lene Abraham kwas domba nya kin sapi nya nimangti poi sut Abimelekh leu api yahacem ikwam minggwen.

²⁸Lene Abraham dimig nide domba nehen pap niwek ningut muhwindacan bu bigya ter.

²⁹Leu api Abimelekh hig ser noni “Ayai mun nok gima tut nggon i?”

³⁰Leu api Abraham buhup “Ma ayai domba mien poi dini leu da nok mun di bindo tut bipia dani rino ditig minyei bousi dini ba, dinyeng tak kep tu.”

³¹Gima rino tungwatu ijem minyei bousi dima ninyeng Bersyeba[15] lewo yo cin pima ipreu mun bit yam ei sirima.

³²Tirigi ipreu mun bit yam ei Bersyeba tu lene Abimelekh kin Pikhol ingkwei hanyen ug ei mben Filistin ide minu.

³³Lene Abraham ta biei tamariska nikioi gom ei Bersyeba. Hon kep njap dima kui lene noni kuk no bak TUHAN dino Allah Di Niyaijo Kikau ei sirima.

³⁴Gima ngwig lene noni bong ningkiaisi ei mben Filistin ide minu mem nijam di jei.