Read Hatam NITRITI 22 Bible Online

NITRITI 22 - Hatam bible

NITRITI 22

¹ Mpe hi bu lene Allah bingon Abraham ningon gomti bihig noni “Abraham e?” Lene Abraham miap bipai “We? Da rini!”

² Lene Allah binut bu bipai “Ma abuwak apmot gom ngat di Ishak di angon ce bi ba, juug ei dihyei Moria. Suar abui noni bit leu nok mindhe-ndhe di abui leu api andig kep hum ei nimbar hum dokti ei mbigdip di midindo binani yo.”

³Njap bigyoti bu lene Abraham kiju birop biei mem gima ndig ei nimbar hum dokti bikes ei keledai gom dip leu api buwak Ishak kin nide awak nya ibou can ba, yuug ei mpia di Allah mbot kep binoni tu.

⁴Njap ningai bu rino Abraham cap ser mpia dima bingat mbigdip pima ei minu ting.

⁵Lene noni kuk awak cin pima bipai biyok “Jigwam ser keledai ei mpia dini. Dipmot nyeni nuug kikau ug ei handi duhu binikuk nye bak TUHAN leu api minikwei ngat je hanyen bu.”

⁶Abraham kon biei mui di noni mindig ei nimbar hum dokti bikes ei Ishak ninghat dip lene nonti ttei singau kin huma. Yuug ei puig sinon tu lene,

⁷Ishak hig nicig “Arig e?” Lene Abraham miap bipai “We?” Lene Ishak hig ser noni “Hum kin biei ne no sittei dini noro domba nimien dima sibui bisindig kep hum ei nimbar hum dokti bak Allah ritou i?”

⁸Lene Abraham buhup “Dwai. Allah Nonti mitin ei domba nimien hi mem sa yo.” Lene yahacem imbut kikau.

⁹ Tirigi ikwei krau mbigdip po Allah pai sut pima tu lene Abraham dingug tig nindig bijo-jo yam dip nok nimbar hum dok leu api kon biei binyohou prion eisi. Lene noni ngot nipmot Ishak nimig ninda kin yam leu api kon ba, kes ei biei mui dip.

¹⁰Leu lene noni su ninda bikus nide singau bipi bidat nipmot.

¹¹Noro TUHAN de malaikati gom nihyet tibim kwei leu mpia-bbed him bimbrua ser noni bipai “Abraham! Abraham!” Lene Abraham miap bipai “We? Da rini!”

¹²Lene TUHAN nihyet tibim ei malaikati dima nuhui him bipai “Ma akes anda leu apmot lene angget noni au. Nogindini dikan tut bipia akuk na biDa ba, apwoi dingona. Lewo angon tak kep apmot gom ngat dima leu Da bi.”

¹³Lene Abraham kon nibou bingat lo, domba nikre hi riwar pai nibou nggaiti ei a. Lene ug kat leu api bui bidigo lene ndig kep hum ei nimbar hum dokti biluei nipmot Ishak.

¹⁴Lene noni jem gumihyep dima ninyeng “TUHAN Tin Ei Mun Di Isuar”. Gima rino tungwatu nya ijem kep ninyeng “TUHAN tin ei mun di isuar nya ei Nide mbigdip tu”.

¹⁵Lene TUHAN de malaikati dima nihyet tibim kwei leu mpia-bbed him bipai bak Abraham nimbican bu,

¹⁶ “Dani ne TUHAN rin ba, deheng bitug hon Danti dinyeng. Ayai mun dini ba, angon tak kep apmot gom ngat dima leu Da bi.

¹⁷ Gima rino midinjei mun di kei nindig bibor bak nani ba, dibindei ba, ade nintun him yamti di bram yam nya imangti dem ham mpia-bbed him kin iggum ei muk nipimat cem nimangti. Yoni migya kep bihwen ide siceu nya yahagom bitimek.

¹⁸ Mben dihyeisi dini hagom mporo mijoi sut gima dinjei mun di kei bak yoni bit leu nok dinjei mun di kei bak ade nintun him yamti di bram yam nya drek dip gi abit Ditde nicuk nati tu pima.”

¹⁹Gima ngwig leu api Abraham kin Ishak ingkwei hanyen bisin nide awak nyati leu api yahagom ingkwei hanyen ug ei Bersyeba. Lene Abraham tot mpia ei sirima.

²⁰Niabiati Abraham ngkwei hanyen leu Nungug Moria tu lene noni miap nikinjoi Nahor ninghapti bipia nitnem Milka gwam tut nipmot bat nya ibou muhwindaningai binoni.

²¹Nipmot mighumbou ninyeng Us lene Us nikinjoi bat nya inyeng rino Bus kin Kemuel di Aram nicig,

²²kin Kesed kin Hazo kin Pildas kin Yidlaf kin Betuel.

²³Lene Betuel bon nipmisop Ribka. Milka gwam tut nipmot bat nya ibou muhwindaningai dini bak Nahor di Abraham nikinjoi.

²⁴Lene Nahor bon nitnem ndrim Reuma ba, noni gwam tut nipmot bat nya ibou bitai binoni ba, inyeng rino Tebah kin Gaham kin Tahas kin Maakha.