Read Hatam NITRITI 24 Bible Online

NITRITI 24 - Hatam bible

NITRITI 24

¹Mpe dima lene Abraham wer andig-ndau bibor ba, TUHAN njei mun di kei bak noni bimpu noni tut nide midyai nya hagom ninno tu.

²Lene Abraham pai bak nide awak di wer andigpoi leu nindigsi nya di nyohou mun nyeng hagom di Abraham nyeng tut “Ma asu anda ei diko kieti.[16]

³Lene ma aheng bitug hon TUHAN di ninyeng tak kep mpia-bbed him kin dihyeisi dini ninyeng bipia mporo abuwak sop timiei hi leu minu Kanaan dini bak dipmot Ishak bi.

⁴Noro suar angkwei hanyen ug ei ditimieisi lene ma anggok sop hi leu dide bat nya bak dipmot Ishak nok nitnem.”

⁵Lene nide awak buhup “Notou gino misop dima kou sut gima kes nide ig bei nsi ei bi ba, kou sut gima bit da hanyen kwei ei ade minu dini cem bi i? Midibuwak apmot ug ei atimieisi dima e?”

⁶Noro Abraham srep “E bi! Ma abuwak dipmot hanyen ug ei minu ting dima jit au!

⁷Lewo TUHAN di ninyeng tak kep mpia-bbed him jem da kwei leu dicig kin dide bat nya itimieisi ba, preu ei mem da bipia ditde nintun him yamti di bram yam nya mporo miba yokep minu dini hagom. Noni rino micuk Nide malaikati gom di mpu na leu binhyepo abuwak sop gom kwei bak dipmot nok nitnem.

⁸Ne gino sop dima kou sut gima ahei sut noni kwei lene gi aheng pima ngot kep na bi. Noro ma abuwak dipmot hanyen ug ei minu ting dima jit au!”

⁹Lene awak dima su ninda ei niceu Abraham niko kieti lene beheng bipia noni miyai igbit Abraham nicuk noti nya hagom.

¹⁰Awak dima jem Abraham de unta nya ningut simnai bikon mimbron nindig bibor bikes ei unta nya dip buug sut ug ei Nahor de minu ndig ei Mesopotamia ei nite bei mpia nijjai.

¹¹Tirigi noni ug krau lene kes unta nya bikou simiak minyei bousi gom sir minu ndig dima nisai mem mmunti sri sop nya dima induk yam kwei bitau minyei.

¹²Lene noni ngat nadi bipai “TUHAN e, Na di Allah di andigpoi Abraham kuk no bak e, ma ampu da mem njap di ammani ba, ayai hagom bit leu nok apreu ei mem andigpoi tu.

¹³Nogindini dingat rin simiak minyei bousi dini lene mbigom sop nya leu minu ndig dini minduk yam kwei bitau minyei ri.

¹⁴Lene midahara sop gom leu binhyepo tin nide dibijig tut minyei bididut. Gino noni ce bipia didut ug leu api mitau minyei bak ditde unta nya cem bidut lene dikan tut bipia noni ne sop dino ando bak Ishak nok nitnem ri. Gima hagom nok lene midikan tut bipia ayai hagom bit leu nok apreu ei mem andigpoi tu.”

¹⁵Hammi tirigi noni kes nuhui tut nadi bigyo lene Ribka tau kwei bittei dibijig ei ninghat dip. Ribka nicig ninyeng Betuel ba, Betuel nipmem ninyeng Milka lene nicig ninyeng Nahor di Abraham nikinjoi pima ri.

¹⁶Ribka ne sop gwam nitta pilei di ubbu bibor ri. Lene noni kinyon ug ei minyei bousi bitau minyei leu api kui hanyen kwei.

¹⁷Lene Abraham de awak dor um noni bahara “Atin dibijig tut minyei hi bididut ug e?”

¹⁸Lene misop ce bipai “Arig e, adut ug. Lene noni kon dibijig leu ninghat bitin dibijig tut minyei binoni bidut.”

¹⁹Awak dima dut minyei bindei no tu lene misop dima pai bu “Miditau minyei bak Arig de unta nya cem bidut bindei yok ug e.”

²⁰Jei bi lene noni siber minyei niken leu dibijig ug ei bak di mindhe-ndhe nya idut kep minyei eisi leu api dor ug ei minyei bousi bitau minyei didiyam bu mem unta nya hagom bibou idut bindei yok ug e.

²¹Lene awak di Abraham de tou kep noni nggilun bahap niji bi bibou kan-kan nyen tut gino TUHAN buhup nide nadi tut misop dima ug e.

²²Unta nya idut minyei bindei yok tu lene awak di Abraham de hit mbrawin ningat gom bipindur ei misop nuhwap jou leu api kus srak mas ningat can bikui ei ninda pangti.

²³Lene hig ser noni “Acig ninyeng tou i? Nide ig bon nghim nsi nok gi dem mem gima cigit da kin ditde limwa nya kui nide ig binibong bit e?”

²⁴Lene misop buhup “Dicig ninyeng Betuel ba, Betuel ne Nahor kin Milka ipmot ri.

²⁵Nyende ig bon nghim nsi nok gi dem mem na di Arig cem lene gandum ntam kin njita mem ade unta nya cem nimang ndig no jo a.”

²⁶Lene awak di Abraham de kuk no binggei sut TUHAN,

²⁷bipai “Dinggei sut TUHAN di ditde andigpoi Abraham kuk no bak lewo jo nibreisi bipia TUHAN ningon gom ba, yai hagom bit leu nok gi po preu ei mem andigpoi Abraham pima tu. Noni bie tut da hammi ndam andigpoi nide bat nya tu.”

²⁸Lene misop dima bisau bingkwei hanyen ug ei nipmem de ig bei nsi bipui sut mun di bitimon noni hagom biyok.

²⁹Pui biyok nok rino Laban di Ribka nikijam brim nimig ug ei nisai buug um Abraham de awak di ya tut nide unta nya simiak minyei bousi.

³⁰Lewo noni ngat mimau di iba mas bibon di pindur ei Ribka nuhwap jou kin srak ningat can di kui ei ninda pang bou niyai him bimiap mun di Ribka pui sut andigpoi dima nihyet cem. Gima rino noni ug ngat Abraham de awak di ya tut nide unta nya simiak minyei bousi.

³¹Lene Laban pigo noni bipai “Ningat ne TUHAN njei mun di kei bak na di Arig tu! Aya hak ei nisai dini tut nggon i? Akwei bit da ba, suug ei ig bei nsi. Ditin ei nghim nsi gom mem na biditin ei mpia di dem mem unta nya cem tu.”

³²Lene andigpoi bit Laban ug ei ig bei nsi leu api Laban cug ndigban hagom leu unta nya bihyen yok. Lene noni tau minyei mem andigpoi kin nide limwa nya yahagom ibipiap imigya.

³³Tirigi Laban ngei njita bidem mem yok tu lene awak di Abraham de pai “Diyem njita bigyo bibou dipai dingon kanti bije nipou ug e.” Lene Laban ce bipai “Apai hak ug.”

³⁴Lene awak di Abraham de hap niji bipai “Dani ne Abraham de awak ri.

³⁵TUHAN njei mun di kei nindig bibor bak andigpoi ba, noni nyeng bibor. TUHAN yai mun nyeng hagom binoni nok domba nya kin kambir nya kin sapi nya kin unta nya kin keledai nya kin perak kin mas cem nindig bibor kin awak pinai nya kin sop nya hagom cem.

³⁶Tirigi nitnem wer sindig-ndau su lene noni yai nipmot bak Abraham leu api Abraham kes nide mun di nyeng tut pima hagom bak nipmot bu.

³⁷Lene andigpoi cuk da bipia suar diba neheng bipreu ei mem noni bidibit nihyet di sok kep da ngkiem ser nhyema dibuwak sop timiei minu Kanaan hi bak nipmot au.

³⁸Noro suar dinggok misop dima leu nicig nide bat nya ikieti. Gima rino cuk da ba, dibrim dimig kwei ei sirini.

³⁹Lene dihig ser andigpoi bipia notou mem misop dima gino kou sut mibit da i?

⁴⁰Lene noni buhup bida bipia TUHAN di noni bit nihyet habiei kwei bipek ammani kep micuk Nide malaikati hi kin da leu binhyepo diyai hagom bit leu ningon kanti. Mporo midibuwak sop gom leu nide bat nya ikieti mem nipmot nok nitnem.

⁴¹Gino nide bat nya ikou sut dihyet lene neheng pima mingot kep da bi.

⁴²Lene tirigi dikwei krau minyei bousi aponi pima lene di ngat nadi ei dingonti nna ba TUHAN di nok Allah di ditde andigpoi Abraham kuk no bak mimpu da biyai hagom bit leu nok Abraham ningon kanti mem da.

⁴³Lewo dingat rin simiak minyei bousi dima ba, gino sop gom kwei tau minyei lene dahara noni leu binhyepo nide dibijig tut minyei bididut.

⁴⁴Gino noni ce bipia didut ug leu api noni mitau minyei bak ditde unta nya cem bidut lene dikan tut bipia noni ne misop dino TUHAN ndo mem ditde andigpoi nipmot nok nitnem ri.

⁴⁵Hammi tirigi dikes duhui tut nadi bigyo rino Ribka tau kwei bittei dibijig ei ninghat dip. Lene noni kinyon ug ei minyei bousi bitau minyei. Lene dahara noni leu binhyepo dibijig tut minyei hi bididut.

⁴⁶Lene noni kon dibijig haninyai leu ninghat bipai bida bipia didut ug. Leu api noni mitau minyei mem ditde unta nya cem bidut. Gima rino didut minyei leu api noni tau hi kin bu mem unta nya.

⁴⁷Lene dihig ser noni tut nicig ninyeng. Leu api noni buhup bipia nicig ninyeng Betuel ba, Betuel ne Nahor kin Milka ipmot ri. Lene dipindur mimau mas ei nuhwap jou leu api dikui srak can ei ninda pang.

⁴⁸Lene dikuk da bidinggei sut TUHAN di nok Allah di Abraham cem kuk no bak lewo noni bie tut da kwei hammi ndam Abraham nide bat nya apino dingat Betuel nipmisop bou diyai him ba, midibuwak noni hanyen bak andigpoi nipmot nok nitnem.

⁴⁹Gima rino gino jitin ei mem jibibon Abraham nok gi kei ba, jiyai igbit jide niyai kepti di suar jibibon bak noni lene ma jipai bida. Gi bi lene ma jipai nok gima cem leu binhyepo dikos tut mun di diyai bu.”

⁵⁰Lene Laban kin Betuel ibuhup “TUHAN ndo ningon kanti tu lo, dem mem gima nikos tut bak noni bi.

⁵¹Ribka ningat rini ba, nisindui sut noni bibit Arig ba, abuwak noni bak Abraham nipmot binok nitnem bit leu TUHAN ningon kanti hak ug.”

⁵²Tirigi Abraham de awak miap ibuhup nihyetti dima lene kuk no binggei sut TUHAN.

⁵³Lene noni hit sinsun kin mimau perak kin mas bak Ribka lene njei mimbron di nibok kak bibor bak Ribka nikijam kin nipmem.

⁵⁴Lene Abraham de awak kin nide limwa nya yahagom igyem njita bidut minyei lene ibong bit Betuel nya mem mmun gom. Njap bigyoti lene ikiju leu api awak dima pai “Nimbut ri. Jikes da bidingkwei hanyen ndam Abraham ug ri.”

⁵⁵Noro Ribka nikijam kin nipmem isrep bipai “E bi. Ma Ribka bong bit nye mem ari gom bu e, he njap simnai e, nok leu api nikes noni bibit na.”

⁵⁶Lene awak di Abraham de buhup “Jicuon da ei au lewo TUHAN bindei ba, mun dini hagom pek kep mem da tu. Ma jikes da bidingkwei ndam Abraham hanyen.”

⁵⁷Lene ibuhup “Nnaba nihig Ribka nonti kwei pai ningon kanti binye.”

⁵⁸Gima rino ihig Ribka kwei bihig ser noni “Ajoi sut abit no dini e?” Lene noni ce bipai “I, dijoi sut.”

⁵⁹Gima rino ikes Ribka kin nide awak di nyohou noni leu nimien kwei ba, ibit Abraham de awak kin nide limwa nya di ibuwak noni biyuug sut.

⁶⁰Lene nikijam kin nipmem ipigo noni bipai binoni “Nnaba ade nintun him yamti di bram yam nya imangti ibou juta mang bibor o! Nnaba igya kep bihwen ide siceu nya ba, itimek leu itimieisi o!”

⁶¹Lene Ribka bri unta bit nide awak sop gwam tta pilei nya di igya kui noni lene ibit Abraham de awak ba, yahagom yehei bimbut hak.

⁶²Mpe dima lene Ishak kwei leu iggum ndigsi binjiriek minyei bousi di ninyeng No Di Niyaijo Ngig Niyai Kep Da kikau ba, bong ei minu Kanaan nite bei mpia nibiho.

⁶³Mpe di gom ne noni hei leu prak meng mem mmunti biya-ya nyen ei susti lene ngat lo, unta nya rino itau ma kwei.

⁶⁴Tirigi Ribka ngat Ishak lene noni juk leu nide unta dip.

⁶⁵Leu api noni hig ser Abraham de awak “Pinai tou rimbut susti ndam nye dima i?” Lene awak buhup “Noni ne ditde andigpoi pima ri.” Gima rino Ribka ba sinsun nghas binggai kep niimaisi.

⁶⁶Lene awak dima pui sut mun di pek kep mem noni hagom bak Ishak.

⁶⁷Gima ngwig lene Ishak buwak Ribka kwei ei prak meng nsi di nipmem Sara de leu api wak nok nitnem. Ningon ngakei Ribka nindig bibor ba, ningon nggan-triot hanyen lewo nipou ne ningon ngguk tut nipmem di mai leu noni.